بە پاو هەواڵیوی ڕۆنامەو Der Standard a Avûstûryay، بریاوەکاو خەڵاتووو نۆبێلی داواو ئازادیی ڕابەروو گەلوو کوردی عەبدوڵا ئۆجالانی مکەرا.

بەپاو هەواڵەکەی، ٦٩ بریێوی خەڵاتوو نۆبێلی نامیوی هامبەشەنە کە ئاراستەو ڕەجەب تەیب ئەردۆغانوو سەرۆککۆماروو تورکیایشا کەردەن داواشا کەردێنە، ڕابەروو گەلوو کوردی عەبدوڵا ئۆجالان ئازاد بکریۆ و پەرسەو کوردی بە بەئاشتییانە چارەسەرە بکریۆ.

جا هەواڵەکەنە کە میشل ڤۆڵکەری نویستەن ئامان: "٦٩ بریێوێ خەڵاتوو نۆبێلی جە نامێوی هامبەشەنە کە پەی سەرۆککۆماروو تورکیای ڕەجەب تەیب ئەردۆغانیشا کیانان، داواو ئازادیی ڕابەروو گەلوو کوردی عەبدوڵا ئۆجالانی و چارەسەری ئاشتییانەو کێشەو کوردیشا کەردەن. ئەلفرێد جالینک بریاوەو خەڵاتوو نۆبێلوو ئەدەبیاتوو نەمسای یۆ جە ئیمزاکەراو نامەکەین. نامەکە بە نامێ چالاکو مافوو ئینسانی، جۆدی ویلیامزیوە نویسیان، کە ساڵەو ١٩٩٧ خەڵاتوو نۆبێلوو ئاشتییش ورگێرتەن.

چی هەواڵەنە زانیاریی سەروو  گۆشەگیریی سەروو ڕابەروو گەلوو کوردی عەبدوڵا ئۆجەلانی دریان و ئاماژە پانەیە کریان، کە ڕابەروو گەلوو کوردی یۆ جە کەسایەتییە بنەڕەتییەکاو چارەسەروو پەرسەو کوردی  و تا ئارۆیچ دلێ کۆشیای گەلوو کوردینە، پەی شوناسی و ئازادیی پێسەو سەرەکی موینیۆ.  زیندانۆ چندین جارێ داواو چارەسەری ئاشتییانەو تورکیایش کەردەن و پا بۆنەوە گەریلاکاو کوردستانی ئایربەسشا ئەرەیاونان، بەڵام ئەردۆغان مانگەو تەمموزو ٢٠١٥ بەڕسمی دماییش بە قۆناغوو ئاشتی و ئایربەسی ئارد و تورکیا دەس بە فشارەکاش پەی سەروو پارت و ڕێکوزیا کوردییەکاو نزیکوو پەکەکەی کەرد، عێراق و سوریانە هجوومش کەرد سەروو گەلوو کوردی."

هەواڵەکەنە سەرنجەیچ وزیێنە سەروو شۆڕشگێڵناو پارتوو کرێکاراو کوردستانی (پەکەکە)ی کە دژوو چەتەکاو داعشی سوریا و عێراقەنە ، ئانەیچ کە هەڵای ئەمریکا و بڕێ وەڵاتێ ئەورووپاییێ و حکوومەتوو تورکیای، پەکەکەی بە "ڕێکوزیاێوی تیرۆری" نامێ مبەرانە.

بە پاو هەواڵەکەی، بریاوەکاو خەڵاتوو نۆبێلی نامەکەشانە پەی ئەردۆغان، نیگەرانیی وێشا بۆنەو بارودۆخی نائینسانانەو دلی زیندانیوە بەروستەن و داواشا کەردێنە کە ئەردۆغان بگێڵۆوە سەروو ڕاو ئاشتی. وەروو ئانەیە بە ئاشتی گردوو قۆرتەکا چارەسەرێ کریانە و پێویسا تورکیا بە بەشداریی ئۆجالانی سەردەمێوی تازە دەس پەنە بکەرۆ و ئێمە باوڕما پاسنەن کە مشۆم گۆشەگیری ئیمرالینە دماییش بێ.

ئاخرۆ بەروزیان: "تورکیانە ساڵەو ١٩٤٩ـیوە ئەنداموو ئەنجومەنوو یۆبییەی ئەورووپایا، بواروو گۆشەگیرییوە گردوو پیمانە میاندەوڵەتییەکاش پاشێلێ کەردێنێ."