لەقوو وانوو کۊمەڵەو یاساشناسا پەی ئازادیی (ئۊهەدە)، کۊمەڵەو پەشتیوانی وەنەو بنەیانەو زینڎانییا و سزادریایا (توهای-دەر) و سەندیکاو پارێزنەراو وانی سەبارەت بە پاشێلکارییەکاو مافەکاو ئینسانی زینڎانوو جۊروو ئێڵی پانۊسینە ڕاپۊرتێوەشا ئامادۍ کەرڎە و جە کۊنفڕانسێوە ڕۊنامەوانیینە دلێنەکەشا ئاشکرا کەرڎە.

 هامسەرۊکەو ئۊهەدەی واننە مەهتاب ئیشیکە ڕاپۊرتەکێش واناوە و دلێشنە ئانەش وست ڕووە، کە دیداریشا چەنی لالە کابیشەنۍ و نازلیجان باریشەرۍ زینڎانوو پانۊسینە کەرڎەن.

ڕاپۊرتەکێنە ئامان، کە نزیکەو ٤٠ سەرواز و پاسەوانا زینڎانی هجوومشا کەرڎەن سەروو ژەنا و ئەشکەنجەشا دێنۍ. هەردووە ژەنە زینڎانیکریێکۍ پەی ماوەو ٤ سەعاتا بە بەستەیۊ بەرازی (بەستەیۊ دەس و قاچی و ورواستەی) ژوورێوەنە ئازیێنێوە. بە قسۍ ئا دووە ژەنە زینڎانییا ڕاوەبەراو زینڎانەکەی سەرشاوە مردێنۍ و هەڕەشۍ کوشتەیشا وەنە کەردێنۍ و مامەڵەی خراپشا چەنی کەردێنۍ.

حەر بە پاو ڕاپۊرتەکەی سەروازۍ و پاسەوانۍ زینڎانەکەی قژۍ ژەنەکاشا کێشتێنۍ و دماوە کەلەپچەشا کەردێنۍ و سواروو سەیارەی ڕینگیشا کەردێنۍ و فاڕێنێشاوە پەی خەسەخانەی.

بەشێوە تەروو ڕاپۊرتەکێنە ئامان، کە زینڎانییە  پیێکۍ دژوو ئەشکەنجەدای ئا دووە ژەنە زینڎانییا، چالاکیی ناڕەزایەتییشا کەرڎەن، وەلۍ ڕاوەبەراو زینڎانی دژوو ئا زینڎانییە پیایا دەسشا کەرڎەن بە وەنەپەرسایۊ دیسپلینی.

ئانەیچە بەروزیان، کە وەختوو چەمپەنەکەوتەینە چەنی ئا دووە ژەنە زینڎانییا هەڵای یاگۍ ئەشکەنجەیشا پۊوە دیارە بیێنە و ڕاپۊرتەکەنە داوا کریان، کە دەمودەس بارەو ئا ڕووەدایۊ وەنەپەرسایۊ کریۊ، چونکوم ئەشکەنجە تاوانە دژوو ئینسانیەتی و پێویسا بکەرەکێش بەزوویی سزا بدریا.

ئاخریچۊ وچییان کە ژیوای ژەناو زینڎانی  ئینا خەتەرنە و مشۊم دمایی بە ئەشکەنجەدایشا بارییۊ.

س.ز