ڕاپیمای ٢٥ ڕوە پەی ئازاڎیی ڕابەروو گەلوو کوردی عەبدوڵا ئۊجالانی هەشتەمین ڕۊنە شاروو مانتەس لا جۊلیاینە بەرڎەواما.

تەماموو ڕاپیمایەکەینە پەی هۊشیارکەرڎەیۊ گەلی و دەوروبەری هەزاران وەڵێکریێوۍ بەشۍ کریێ، دۊسیەکۍ دەربارەو هەلومەرجوو گۊشەگیری سەروو ڕابەروو گەلوو کوردی عەبدوڵا ئۊجالانی دریۍ بە ڕێکوزیا و ئەرەمەرزیایەکا.

چا ئەرەمەرزیایا سەرشا دریا، ڕۊنامەو (Courrîer de Mantes) پەشتگیریی وێش  پەی گەلوو کوردی نیشانە دا و ئەرەیاوناش جە ٣٠ کانوونوو دووەمیوە ڕۊو یەرەشەممەی سەروو ڕاپیمایی درێژی و کۊبییەیۊو کۊڵنی و گۊشەگیری، هەواڵۍ وەڵا کەراوە.

نوێنەراو ڕاپیمای دەربارەو هەلومەرجوو گۊشەگیریی ڕابەروو گەلوو کوردی عەبدوڵا ئۊجالانی دۊسیێوەشا پێشکەشوو شارەوانیی شارەکەی کەرڎە.

 تەماموو ڕاپیمایەکەینە  ٢٥ چالاکۍ بە جۊشۊ گۊرانیێشا واتۍ و چندین جارۍ درووشمێشا پەی ئازاڎیی ڕابەروو گەلوو کوردی عەبدوڵا ئۊجالانی بەرزۍ کەردێوە.

هامسەرۊکوو جەدەکە-فەی شاهین پۊلات وەرڎەموو شارەوانیینە قسێش کەردۍ و واتش: "بەڕێز ئۊجالان جە ڕاو فیکروو کۊنفیدراڵیزمی دیموکراتیکوو وێشۊ، تاکە کەسا بتاوۊ ئاشتی وەرکەوتوو دلیڕاسینە و بەتایبەت کوردستاننە چەسپنۊ. پێویسا بزانییۊ، ئەردۊگانی فاشیست هەزاران وانیارۍ و ئەکادیمیۍ و ڕۊنامەوانێش وستێنۍ زیندان و هەزاران کەسێش کۊچبەرۍ کەردێنێ.  

داوامان جە هێزە میاننەتەوەییەکا ئانێنە: ئەردۊگان پەیماننامە میاننەتەوەییەکێش ئیمزۍ کەردێنێ، وەلێم دژوو گەریلاکاو ئازاڎیی کوردستانی چەکی کیمیاوی بەکار مارۊ، پەی بەیاگەیاونای مەرجەکاو پەیماننامەکا، پێویسا فشارش وزیۊ سەر".

ئا کارتۍ سەرانسەروو ڕاپیمایەکەینە کوۍ کریێوە ڕوانەو ئیمراڵی کریێ.

دماو ڕاپیمایەکەی  کۊمەڵەو جڤاکی مانتەس لا جۊلیاینە کۊبییەیۊ گەلی کریا.

ڕاپیمایەکە سەوای شاروو لەس موراوخینە وەرنیشتوو پاریسینە کریۊ، هەرپاسە ڕۊو یەرەشەممەی سەعات ١٨:٠٠ فیلمێوە نیشانە مدریۊ.