لایەنە شیعەکاو پەرلەمانوو عێراقی سیاونویسوو یاساێوەشا پەی هەمواروو یاسێ کەسیێ (قانون مەدەنی) پێشکەشوو پەرلەمانی کەردێنە. سیاونویسەکەنە مافوو خاوەندارێتی وەنەو ئەدایا هورمگێریۆوە و ڕەوایەتیی بە بەشوودای کناچێ ٩ساڵێ مدۆ. بارەو هەوڵەکاو یاساو باری کەسیوە، ئەندامەو هەرمانوکاروو بەروو تاژێ، سوهام شەنگالییە واتەواچێوەنە چەنی ئاژانسەکەیما ئی پەرسێشە هورسەنگنێ و کاریگەرییە نەرێیەکاو یاسایەکێش بەرێ وستێ.

ئەوەڵوو قسەکاشنە سوهام شەنگالییە بەرش وست پەرلەمان پی سیاونویسە یاساییەوە گەرەکشەن، ڕەوایەتی بدۆ بە عەقڵیەتوو داعشی و واتش:" گەرەکشانە پی قەرارەیە  کناچێ زارۆڵێ و گلێرگەی قڕ بکەرا، چی ساڵاو دمایینە سەرانسەروو جیهانینە ژەنی بە درووشموو "ژەنی، ژیوای، ئازادی" سەرەوردایشا کەرد و پا سەرەوردایە مۆرەو وێشا دا وەنەو تارێخی. پەوکای وەختێوە چانەنە سیاونویسوو یاساو باری کەسی مبۆ بە پەرسەو پەرلەمانوو عێراقی و ڕاسیینە ڕێککەوت نییەن، ئی سیاونویسەیە پێسەو هجوومێوە دژوو سەرەوردای ژەنا موینا، پیێ دەسەڵاتدارێ جە هێزوو ژەنا متەرسا، پەوکای پێسە هجووم مکەرا".

'گەرەکشانە پی یاسێ ڕەوایەتیی بدا بە عەقڵیەتوو داعشی'

بەردەوامیی قسەکاشنە سوهام شەنگالییە باسش کەرد، ئی سیاونویسە یاساییە کاریگەریی وەنەو بڕێو لایێنە نەکەرۆ، بەڵام  بۆ بایسوو وەشکەردەی کارەساتی گلێرگەنە و پێسە بەردەوامە بییە:" گەر زارۆڵە چا عومرەنە بلۆ دلێ هامسەرگیرییوە، ئەی چەنی ئەزموونو زارۆڵەییش بکەرۆ، ئینەیچ ڕا پەی فرەژەنیی مکەرۆوە و تەرسەکێش فر فرێنە. عێراق وەڵاتێوی فرە نەتەوەن، پەوکای بڕێ نەتەوانە شووکەردەی زارۆڵا تاوانا، و دلێ گلێرگەو ئێزدییچەنە تاوانا،پەوکای سیاونیسوو یاسێکێ لاو گلێرگەی ئێزدییوە پەسەندە نییەنە. هیچ جیاوازیێوە نییەن بەینوو عەقڵیەتوو داعشی و یاسێکێنە، ڕۆشنەن گەرەکشانە پی یاسێ ڕەوایەتی بە عەقڵیەتوو داعشی بدانە. دیما داعش جە فەرمانەو ٢٠١٤و سەروو گلێرگەی ئێزدیینە هەمان چێوش وەراوەروو زارۆڵە کناچا کەرد."

'تا ئاخر مکۆشییەیمێ'

ئاخروو قسەکاشەنە ئەندامەو هەرمانوکارووو بەروو تاژێ شەنگالییە بانگەوازش وەنەو گردوو ژەنا کەرد، دژوو ئی سووکایەتییە بەیاوە جواب و بێدەنگی هورنەچنا و واتش:" پیسە ژەنە ئێزدییا هامسانوو ژەناو عێراقی دژوو ئی سیاونیسوو یاسێ مکۆشییویمێ، تا بەتاڵەش مکەرمێوە،ژەنی جیهانەنە ئێشێوی هامبەششا هەن، پەوکای تا ئاخر دژش مکۆشییەیمێ. داوا جە تەماموو ژەناو عێراقی و نوێنەراو گردوو ژەنا مکەرمێ دژوو ئی سووکایەتییە بێهەڵوێستێ نەبا و بکۆشیا."