جە سەرنیشتوو ۋەرکەوتوو سوریاینە کە بەمەڵامەتوو هجومەکا دەوڵەتوو ئەرەگیری تورکیایۆ کارەبا بڕیێنە، قۊرتەو سووتەمەنی هەنە ، ئینەیچ پاسەش کەردەن فڕنوو ئاساوەکۍ بەعالی هەرمانە نەکەرا.
جە سەرنیشتوو ۋەرکەوتوو سوریاینە کە بەمەڵامەتوو هجومەکا دەوڵەتوو ئەرەگیری تورکیایۆ قۊرتەو کارەبۍ و ئاوۍ وەشۍ بیێنۍ، ئەرەنیشتۍ مەنتیقەکەی فرە بە زەحمەت نان دەس وزا.
یۆ چا خزمەتگوزاریا کە ئیدارەو ۋێڕاوەبەری سەرنیشت و ۋەرکەوتوو سوریای پێشکەش بە خەڵکیش کەرۆ، نانەواخانەن. فڕنوو گۊرەو شاروو قامیشلۊی. ڕووانە ٢٧ تەنۍ ئاردی بەکاربەرۆ و نزیکەو ٣١ هەزار کیسا نان ئاماڎە کەرۆ. واتە نزیکەو ٢٧٩ هەزار نانۍ پەچۆ. بەمەڵامەتوو هجومەکا دەوڵەتوو ئەرەگیری تورکیایۆ پۍ سەروو سەرنیشت و ۋەرکەوتوو سوریای، مەنتیقەکە بێ کارەبا مەنەنۆ و بەمەڵامەتوو هجومی پۍ سەروو وێستگەکا سووتەمەنیچ قۊرتەو سوتەمەنی وەشە بیێنە. ئینەیچ کاریگەریش کەردەن سەروو هەرمانەو نانەواخانەکا هەرێمەکەی. پۊکاتی فرە بە زەحمەت نان دەسوو ئەرەنیشتا مەنتیقەکەی گنۆ.
مزانمۍ ئی هجومۍ بەردەوامۍ با
سەرپەرشتیاروو فڕنوو قامیشلۆی عەبدول مەلیک شەلۆ و وەرپەرسوو شفتوو هەرمانکەردەی فڕنی محەمەد ئەمین خەڵەف سەروو ئی مژاریە قسێشا پۍ ئاژانسوو هەواڵی فورات (ANF)ی کەردۍ. شەلۆ واتش: "ئی هجومۍ تازۍ نیەنۍ و بەردەوام هجوم بیەن، خەڵکوو هەرێمەکەی چێروو هجومەکانە ژیۋای ۋێشا کەردەن. مزانمۍ هجومەکۍ دەوڵەتوو تورکی ئەرەگیری بەردەوامۍ با، پۊکەی پۍ ئانەی فڕنەکە بە عالی هەرمانەکەرۆ ١٣٨ کرێکارۍ هەرمانە کەرا. ئی هجومۍ ئاژێوە خراپشا وەشکەردەن. هەر مرۆڤێوە ئێمە، هەر وڵاتپارێزێوە مشۊم کۊشیۆنە و ئاگاڎاروو نانی و هەرمانەکێچشا با".
پێویسا نان پەچمۍ
محمەد ئەمین خەڵەف باسش چانەی کەرد، ۋەروو ئا هجوما کریان سەروو چێرخانەکا، جە ئیسەنە کارەبا جە ڕاو مۆلیدەیۆ بەدەس مۍ و واتش: "ۋەروو فرەیی هەرمان کەردەی مۆلیدەکۍ فرەو وەختی جە هەرمانە گنا، ئینەیچ بۆ بە مەڵامەتوو ئانەی جە چەمەڕای وەشکەردەیۆیشانە مردمۍ، بەڵام جە هەرمانکەردەی مەمردمۍ، پۍ حاسڵ کەردەی نانی پۍ گەلی. بە مەڵامەتوو تێکشیەی کارەبێوە بەدەسئاردەی هاردایچ قورس بیەن. دەوڵەتوو تورکی ئەرەگیری گەرەکشا پی هجوما هەرمانەو ئەرەمەرزیاکا مردنۆ، بەڵام سەڕەڕاو گرڎ چێوۍ جە هەرمانەکاو ۋێما بەردەوامۍ بیمۍ".
