٧ ژەنە زینڎانیۍ سیاسیۍ جە زینڎانی ئەوینینە، جە پەیامېوەنە بۊنەو یۋەمین ساڵوەگېڵ و سەرهۊردای "ژەنۍ، ژیای، ئازاڎیی"وە داواشا جە ڕای گردینە و ئېرانی و جەهانی کەرڎ،"با بە سەڎاو ۋېنیشاندەراو ناڕەزایی دلېینەو گەلوو ئېرانی".
٧ ژەنە زینڎانیۍ سیاسی جە زینڎانی ئەوینی تارانینە، بە نامەکا "ئازادە عابدینی، سپیدە قولیان، شەکیلا مۆنفەرێدی، گوڵڕۆخ ئیرایی، نێرگس محەمەدی، مەحبوبە ڕەزایی و ویدا ڕەبانی، بۊنەو یۋەمین ساڵوەگېڵ و سەرهۊردای "ژەنۍ، ژیای، ئازاڎیی"وە پەیامېوەشا ۋەڵا کەرڎۊ.
جە پەیامەکەنە کە جە هەژماروو تویتەرو نېرگز محەمەڎیېنە ۋەڵاکریانۊ، ئامان،"ئېمە ژەنا زینڎانی سیاسی ژینڎانوو ئەوینی پۍ پاڵپەشتی جە خەڵکی و بەربڕیەی ناڕەزایی دژوو حکومەتی، جە ڕۊو ١٥ و ئەیلولیوە جە حۊشۍ زینڎانینە مان گېرمۍ".
جە بەشېوەتەروو پەیامەکەینە ئامان،" ساڵۍ سەروو کوشتەو ژینا ئەمینیېنە بە دەسوو هېزەکا ئېرانی ۋیەرڎ. کوشتەی و جە قەنارەدای ناڕەواو کوڕوو کناچا ۋڵاتیما جە جاڎەو زینڎانەکانە، کۊرکەرڎەو ۋېنیساندەرا، گېرتەی و ئەشکەنجەدای و زینڎانیکەرڎەی ۋېنیشاندەرا زامېوەن دلۍ ڕۊحیمانە. بەڵام هاموەخت هیواو پاڵنەرېوەن پۍ ۋەردەوامی دای بە کۊشیایما تا میاومۍ بە سەرکۊتەی".
ئا ٧ ژەنە زینڎانیۍ حەرپاسە ئاماژەشا پانەی کەرڎەن،"ئېمە پېسە ژەنا زینڎانی سیاسی جە زینڎانی ئەوینینە، چنی گرڎوو ئازاڎیی وازاو یەکسانی وازا،پېسە پەشتیوانی جە مەردموو ئېرانی وبەربڕیەی ناڕەزایی ۋەران ۋەر بە سیاسەتی تنوتیژی، سەرکوتکەرانەو بۍ ڕەحمانەو دۊڵەتوو ئاینی دیکتاتۊری، جە ڕۊو ١٥ و ئەیلولیوە جە حۊشۍ بەشوو ژەنا زینڎانی ئەوینینە مانی گېرمۍ و هامدەنگ و پاڵپەشتی گەلی بیمۍ".
جە ئاخروو پەیامەکەینە ئامان، داوا جە ڕاو گرڎینەو ئېرانی و جەهانی کەرمۍ با بە سەڎاو ۋېنیشاندەرا و ناڕەزایی دلېینەو گەلوو ئېرانی و هامکارېما بیدۍ.
