هامسەرۊکاو شارەکاو پارتوو دیموکراسی و یەکسانیی گەلا (دەم پارتی) ناوەندی گردینوو پارتەکەینە کوۍ بیێوە. کۊبییەیۊکەینە هامسەرۊکی گردینوو پارتەکەی، تونجەر باقرخان قسێش کەردێ. باقرخان تیشکەش وستە سەروو ڕەوشی ئاڵۊز و جەنگەکا جیهانەنە،  بەتایبەت ڕەوشوو وەرکەوتوو دلێڕاسەی. ئاماژەش کەرد بە هجووموو ئیسرائیلی پەی سەروو غەززەی و ئەرەیاوناش، کە گەلوو فەڵەستینی قڕ کریۊ و سیاسەتوو ئەرەگیرکاری بەرڎەواما، مەنتێقەکەیچ خەریکا بۊ بە مەیانێوە گەورەو جەنگی، قسەوباسوو و دایوسانا حیچ نیا. هەرپاسە جەختش کەرڎۊ چی بەینەنە تورکیا جە ڕاو هەڵوێستەکاشۊ پەشتیوانیی جە سیاسەتوو جەنگی کەرۊ.  

هاموەخت باقرخان تیشکەش وستە سەروو دۊخی خراپوو بژێوی، ئەوەخوایش کەرڎۊ ئی هەژارییە بەرئەنجاموو قەیرانی ئابووریین. هەرپاسە ئاماژەش کەرد بە ورچنییەی وەڵێوەختەو پارتەکەیشا، پێسە ئەزموونێوە تازەی جیهانەنە نامێش بەرد، ئەرەیاوناش حەرچند کەموکوڵییش بییەن، وەلۍ ڕێبازێوە دیموکراتیک پەرەش پەنە دریان. ئایندەنە کەموکوڵییەکۍ ڕاسۍ باوە. 

دماتەر باقرخان تیشکەش وستە سەروو ڕاپیمای و چالاکییەکا پەی ئازاڎیی ڕابەروو گەلوو کوردی عەبدوڵا ئۊجالانی و واتش: "چندین ڕێکوزیۍ ئێمە بەینوو ١-١٥ شوباتینە پەی ئازاڎیی جەسەیی بەڕێز ئۊجالانی ڕا پیما. پێسە دەم پارتی پەشتگیری چی ڕاپیمایە کەرمێ. بە گۊشەگیری کێشەکۍ چارەسەرۍ مەبا. بەپێچەوانەوە کێشەکۍ قووڵتەرۍ باوە. هۊکاری سەرەکیی ئی وەزعۍ تورکیای، گۊشەگیری و چارەسەرنەکەرڎە پەرسەو کوردین. ئەگەر ئی وەڵاتە گەرەکش بۊ وەرکەوتوو دلێڕاسەینە نوێنەرایەتیی ئاشتیی کەرۊ، با جیاتیی ئەرەمەرزنای بنکەی سەروازی، گۊشەگیری لا بەرۊ، جە ڕاو واتەواچی دایوسانایۊ شۊنەو چارەسەروو پەرسەو کوردیرە گێڵۊ. حەر هامکێشێوە کورد و عەلەوی و ژەنی و کرێکارۍ و گەنجێش نەبا چەنە ڕاش مەبۊوە، ڕەنگە ڕێبازوو سیاسەتوو ئادیشا دروۍ بۊ، وەلۍ هینوو ئێمە گفتوگۊ و دایوسانای و ئاشتیی تورکیاین. پەی ئینەیچە مشۊم تورکیایوە دیموکراتیک بونیاد بنیەیمێ".