ڕۊنامەوانۍ و نویسەرۍ پانیشتوو کوردستانی پەی وەرگێریی هەوڵەکاو وەرتەسککەرڎەیۊ ئازاڎیی ڕابەروستەی و هجوومەکا پەی سەروو ڕۊنامەوانا و نویسەرا، فیدراسیۊنوو ڕۊنامەوان و نویسەرە سەربەوۍ ئازاڎەکاشا ئەرەمەرزنا.
کۊنگرێوە ڕۊنامەوانینە فیدراسیۊنەکە لاو بڕۍ جە ڕۊنامەنویسا و میدیاکاوە ئەرەیاونیا و جە ئەرەیاونیای ئەرەمەرزنای فیدراسیۊنەکەینە ئاما: پێسە جوابێوە بە پەنەوازییەکاو ئیساتۍ کوردسانی،بە خاسما زانا فیدراسیۊنێوە جە (میدیاکارا، نویسەرە ئازاڎ و سەربەوێیا)، بەتایبەت ئانۍ بەڕاسی ئینۍ بەروو بازنەی سیاسیوە ئەرەبیاونمۍ، هەوڵۍ مدەیمۍ گرڎ لێوە دەوروو پرۊژێوە نیشتمانیی هامچەرخینە، پەی یەک ئامانجی کوۍ بیمێوە.
ده‌قوو یوه‌م به‌یاننامه‌و بۊردوو سەرپەرشتوو فیدراسیۊنوو ڕۊنامەنویسان و نویسەرا سەربەوۍ :
" پەی ڕای گرڎینی، نویسەرا و ڕۊشنویرە سەربەوۍ و میدیا و میدیاکارە ئەهلی و ئازاڎەکا"
پەشتیواناو ئازاڎیی ڕابەروستەی و ئازاڎیی کەلیما و قەڵەمۍ.
دۊخوو پانیشتوو کوردستانی و مەنتێقەکەی ناسەقامگیر و ئاڵۊزا، ڕۊ بە ڕۊ کاریگەرییەکاو ئی ناسەقامگیرییە ئاستی سیاسی و کۊمەڵایەتینە زیادتەر بەرگنۊ.
سەبارەت بە دۊخوو هەرێموو کوردستانی و مەنتێقە کوردستانییەکاو بەروو ئیدارەو هەرێمی، ناتەبایی سیاسی و کۊمەڵایەتیی دلۍ، جەدەسدای متمانۍ خەڵکی، نەبییەی گوتاری نیشتمانیی هامبەشی و نەخشەڕێوە ڕۊشنە بارەو پەرسە ستراتیژییە نەتەوەیی و نیشتمانییەکا، هەمانوەخت ناکاریگەربییەی ئۊپۊزسیۊنی، کە بتاوا یاگۍ هومێدوو فاڕایۊ خەڵکوو کوردستانی با بەرەو دۊخێوە ئارامتەر و پەروەرڎێوە سیاسی و کۊمەڵایەتیی خاستەر، هەرپاسە شکستئارڎەی جە وەشکەرڎەی ڕای گرڎینی سەبارەت بە پەرسە گرنگە ژیواییەکا، ڕەنگای بەشێوە چا سەبەبا با، کە نە تەنیا دۊخوو پانیشتوو کوردستانیش جە ڕووەی سیاسی، کۊمەڵایەتی و ئابوورییوە، ڕووبەڕوو چەقبەستەیێوە تەرسناکی کەرڎەنۊ، بەڵکوم ڕاوەشکەریچ بییەن پەی هەرچیی زیاتەر فراوانکەرڎەی ڕووبەرەکاو ستەمکاری و وەرتەسککەرڎەیۊ فەزاو ئازاڎیی ڕابەروستەی، وچکلەکەرڎەیۊ و جەقاڵبدای هەرمانۍ پیشەییانۍ سەندیکای و ڕێکوزیایەکاو گلێرگەی مەدەنی.
کۊو ئی سەبەبا و بێگومان هینۍ تەرێچ، کەم تا فرە، کاریگەرییشا سەروو پەرتکەرڎەی دەنگ و سەنگەی هەقەتینەو خانە کۊمەڵایەتییەکاو گلێرگەی و وزە و هێزوو یۊوسستەی ڕووبەروو ناڕەزایەتی و ڕووبەڕووبییەیۊ نەوەوستەمکاریوە نیانرە.
وەروو ڕۊشنایی ئی یاواینە و وانایۊیەنە، پێسە جوابێوە بە پەنەوازییەکاو ئیسەو کوردستانی، بە خاسما زانا فیدراسیۊنێوە جە
(میدیاکارا، نویسەرە ئازاڎ و سەربەوێیا)، بەتایبەت ئانۍ بەڕاسی ئینۍ جبەروو بازنەو دەسەڵاتی سیاسیوە، ئەرەبیاونمۍ و هەوڵێمدەیمۍ گرڎ لێوە دەوروو پرۊژێوە نیشتمانیی هامچەرخینە، پەی یەک ئامانج کوۍ بیمێوە.
ئی فیدراسیۊنە، ڕاسا لاو ژمارێوە کەسایەتییە ئازاڎ و سەربەوێیا جە ڕووەو ئینتیمای حیزبییوە، ئەرەیاونیۊ و سەرپەرشتی کریۊ، وەلۍ ڕووبەری کۊمەڵایەتیی هەرمانکەرڎەی و ئامانجەکاش، کوردستانی و گرڎینا. فیدراسیۊن، نەک تەنیا گەرەکشا پشتەو گرڎوو دەنگ و ڕەنگێوە ئازاڎیوە مرڎۊ،گەرەکیچشا کۊو دەنگ و ڕەنگەکا، کە وەرموو ئازاڎی و ژیواێوە ئازاڎیشا هەن، وێشا بە بەشێوە جە فیدراسیۊنەکەی، وەرم و ئامانجەکاش، بە بەشێوە جە وەرم و ئامانجەکاو فیدراسیۊنی بزانا، پەوکای ئەرەیاونمێش فیدراسیۊن بەرەش کریاوەن گرڎوو ئا کەسا ساعیبێش با، کە کۊشیا پەی فراوانکەرڎەی پانایی ئازاڎی ڕابەروستەی، دژوو ستەم و نادادی و سەرکوتکەرڎەی دەنگە ئازاڎ و یارایەکا جبەروو دەسەڵاتداراوە مرڎاوە.
ئامانجه‌كاو فیدراسیۊنی:
– هەوڵدای پەی فراوانکەردی فەزای گرڎینی.
– چەمنەپۊشتەی و قاودای گرڎ جووڵە و هەوڵێوە پەی وەرتەسککەرڎەیۊ ئازاڎیی ڕابەروستەی.
– هەوڵدای پەی وەشکرڎەی ڕایگرڎینی دژوو هەر یاسا و ڕێسوە، کە ئازاڎیی ڕابەروستەی وزۊ چێروو پەرساوە.
– مرڎایۊ و هەڵوێستئرمانای وەراوەروو هەر دەسدرێژی و پەلامارێوە پەی سەروو میدیا و میدیاکارا، نویسەرە سەروۍ و ئازاڎا.
– هەوڵدای پەی هەرمانۍ هامبەشۍ بە ئامانجوو ڕەخسنای دۊخێوە ئەرێی پەی هەرمانۍ میدیایۍ و ئازاڎیی نویستەی.
– وەشکەرڎەی پەیوەندی چەنی ئا ڕێکوزیایە جیهانییا، کە چەنی ئامانجەکاو فیدراسیۊنی کۊک و تەبا بۊ بە ئامانجوو بەجیهانییکەرڎەی ئا قۊرت و ڕاگێرییا پەی میدیاکارا و نویسەرا و ڕۊشنویرە سەربەوۍ و ئازاڎەکا وەش کریۊ هەرێموو کوردستانینە.
بۊردی سەرپەرشتیاروو فیدراسیۊنوو ڕۊنامەنویسا و نویسەرا سەربەوۍ "ڕۊنویس"
ئارۊ كۊنگرێوە ڕۊنامه‌وانینە فیدراسیۊنه‌كه ئەرەیاونیا و داواو پەشتیوانى جه ئازاڎیوازاو كوردستانی کەرا.
س.ز
