هامسەرۆک و دەسەی ڕاوەبەری کەجەکەی جەمیل بایک جە چەمپنەکۊتەیېنە چنی ماڵپەڕوو شارپرێسی ئەرەیاۋناش، کە پەدەکە پەشتیوانی هەواڵگری پێشکەش بە دەوڵەتوو ترکی و پێگە و یاگەکا دەسنیشان کەرۊ و بە دەوڵەتوو ترکیشا ماچۊ".

بایک ۋاتش، "پارتى عەلەمەو پانیشتوو کورڎسانی پۍ پارېزنا‌و شارتەیۊ سەروازەکا دەوڵەتوو ئەرەگیری تورکیای بەکار مارۊ، ئانەیچش وست ڕووە ئەگەر پارتى سەروو ئی هەڵوێسا ۋېش و هامکارییەکاش پۍ دەوڵەتوو تورکی ۋەردەوام بۊ، حەرچنە جە بەروو ویست و ئێمەیچۊ بۊ، مسۆگەر جەنگ ڕووە مڎۊ".

هامسەرۆک و دەسەی ڕاوەبەری کەجەکەی جەمیل بایک ئانەش وست ڕووە کە پەنەوازەن  گەلوو کورڎی جەوهەر و سروشت و پەیوەنڎییەکا بەینوو خانەواڎەو بارزانی و دەوڵەتوو ترکی بە عالی بشناسا و ۋاتش: " "گەلەکەما پەنەوازەن سروشتوو پەیوەنڎی بەینوو بارزانییەکا‌و دەوڵەتوو تورکی بزانۊ، پەیوەنڎی بارزانییەکا چنی دەوڵەتوو تورکی بەتەمامی سەروو بنەماو بەکرێگېرتەین، گرڎ هامکاریېوە پێشکەش بە سوپاو ئەرەگیری ترکی مکەرۊ".

ئانەیچش وست ڕووە: "پارتى زانیاری ئیستخباراتی بە دەوڵەتوو تورکی مڎۊ، یاگۍ و ڕاشا پۍ مەیسەر کەرۊ، لۆجستیک‌و ئەرزاقشا مڎۊ پەنە سەروو یاگۍ مەنەیۊ گەریلاکا جاسوسی کەرۊ".

بایک دیڎاروو ئی دماییەو بەینوو وەزیروو بەروو دەوڵەتوو تورکی هاکان فیدانی و خانەواڎەو بارزانیش ۋیر ئارڎۊ و ئەرەیاۋناش، دماو ئا دیڎاریە پەشتیوانی بارزانیەکا پۍ دەوڵەتوو تورکی زیاڎشا کەرڎەن. بایک ۋاتش: " پاسە دیارا کە جە چەمپنەکۊتەکانە چنی هاکان فیدانی ئی هامکاری‌و بەکرێگېرتەییە قوڵتەر کریانۊ، سه‌یر‌ ئانەن بەغڎا ملش بە داواکارییەکا دەوڵەتوو تورکیای نەڎان، بەڵام بەداخۊ هۊلێر ملکەچو ئەردۆغانی بیەن".

هامسەرۆک و دەسەی ڕاوەبەری کەجەکەی تەئکیدش کەرڎۊ، " پارتى عەلەمەو پانیشتوو کورڎسانی پۍ پارېزنا‌و شارتەیۊ سەروازەکا دەوڵەتوو ئەرەگیری تورکیای بەکار مارۊ،، ئی ئاژەو ئیسەو برادۆستی‌و سیدەکانی ۋەردەوامی هجوم و پەلامارەکۍ دەوڵەتوو تورکی دژ بەهەرێمەکا پارېزنای مەدیای، پاسە دیارا ئینەیچ یۊن جەۋەرهەمەکا چەمپنەکۊتەی  هاکان فیدانی چنی دەسەڵاڎدارا پارتى، حۊڵدای و ویستوو ئێمە پۍ جەنگی چنی پارتى نییا، بەڵام ئاشکران کە ئا پەیوەنڎیۍ پارتى چنی دەوڵەتوو تورکیای، ئەو گێرەشێوێنیۍ کە کریا جوڵەپنەکەرڎەو هێزی ئاماڎەکارین پۍ جەنگی، ئی سەنگەرگېرتەو ئاڎیشا بەهانېنە پۍ جەنگی، بەڵام ئێمە حۊڵ مڎەیمۍ بەعەقڵۍ سەلیم‌و بەۋەرپرسیارانە هەڵسوکەوت کەرمۍ، چېگەنە ئەگەر پارتى سەروو ئی هەڵوێسا ۋېشە ۋەردەوام بۊ، حەرچنە جە بەروو ویست و ئێمەیچۊ بۊ، مسۆگەر جەنگ ڕووە مڎۊ".

سه‌باره‌ڎ بە هجومکەرڎەی سەروو فڕگەخانەو عەربەتۍ جە سلێمانی جه‌میل بایك ماچۊ، "ئانە پۍ چەم تەرسنای گەلوو سلێمانی‌و بەگرڎی گەلوو سۆرانین، گەرەکشانە حەرپېسە چنی هەرێموو بادینانیشا کەرڎەن بە یاگۍ تەراتێن و سوپاو ئەرەگیری تورکی و میتی، هەرێموو سۆرانی ‌و سلێمانیچ پۍ هەمان مەبەسی بەکاربارا و یۊبیەی نیشتمانى كورڎسانیچ ناچار کەرا کە ئاڎیچ پېسە پارتى هامکاری دەوڵەتوو تورکی کەرۊ.

بایک تەئکیدش کەرڎۊ: "هەڵای سلێمانی‌و گەلوو هەرێموو سۆرانی دەسش جە هەڵوێسی نیشتمانپەروەری ۋېش ۋەرنەڎان، حەرپۊکەی هجومېوە تازەشا ئەنجامدا، ئێمە ئی هجومەیە بەتنی شەرمەزارکەرمۍ ‌و ئەرەیاۋنمېش کە قەناعەتی تەماما هەن کە سلێمانی‌و گەلەکەما جە هەرێموو سۆرانینە جە هەڵوێسی نیشتمانپەروەرانە و ۋېش ۋەردەوام بۊ، چینەینە حیچ گومانێوەما نییەنە".