هامسەرۆکو کۆنسەو ڕاوەبەری کەجەکەی جەمیل بایک ئەرەیاۋناش تەنیا ڕابەر ئاپۆ متاوۆ کۆنگرەو پەکەکەی بینۆ و قەرارش سەر بڎۆ، بایک واتش: "مشۊم ڕابەر ئاپۆ ڕاسەوخۆ ڕاوەبەری کۆنگرەی بکەرۆ."
جەمیل بایک پېوەس بە پڕۆسەو سیاسی و پێشئامایەکا دماو بانگەوازییە تاریخیەکەو ڕابەر ئاپۆی، هۊرسەنگنایش کەرڎ و دەسنیشانش کەرڎ پەی ئانەی پەکەکە چی پرۆسەنە کۆنگرە بینۆ، مشۊم هەلومەرج پەی ئایێربەسی وەش بکریۆ و خودو ڕابەر ئاپۆی ڕاسەوخۆ ڕاوەبەری کۆنگرەی بکەرۆ.
مشۆم هێزە مییاننەتەوەییەکێ فشار وزا سەرو دۆڵەتو تورکیای هەنگامە بنیۆ
بایک ئاماژەش پانەیەدا پێشئامایەکێ دماو داواکارییەکەی جە مێڏانو مییاننەتەوەیینە ئەرێنیێ بێنی، بەڵام مشۆم ئی هێزێ پێوەس بە داواکارییەکەی جە ئەرەیاوناکاشانە، جە پراکتیکەنە ئەرک و وەرپرسیاری وێشا جابەجێ بکەرا و ئینەش وات: "چارەسەرو پرسو کوردی و دیموکراتیکبییەو تورکیای و وەرکەوتوو مییامینی تەنیا بە ڕابەر ئاپۆی، تەڤگەرو ئازادی کوردی و گەلوو کوردەواریۆ پېوەس نییا. بەڵکوم گرڏ کەسێ مشۆم وەرپرسیاری هورگێرۆنە. وەرو ئانەی ئارۆ مییانو جەنگو جەهانی یەرەمی وەرکەوتوو مییامینین و چاکە ونی مجیۆنە. ڕابەر ئاپۆ گەرەکشا ڕاگیری چا ون متەیە بکەرۆ. گەرەکشا دیموکراتیکبییەی پەرەپنەبڎۊ، ئینە ئینا چوارچێوەو بەرژەوندی گرڏ کەسێنە. حەر پۆکەی پەنەوازا گرڏ کەسێ جە پراکتیکەنە هەنگامەی پەنەوازە بنیۆنە. پەی پێکئاردەو داواکارییەکەو ڕابەر ئاپۆی مشۆم گرڏ کەسێ ئەرک و وەرپرسیاری وێش جابەجێ بکەرۆنە. مشۆم داوا جە دۆڵەتو تورکی کریۆنە هەنگامە بنیۆ.
جەمیل بایک داواش جە گرڏ کەسێ کەرد پەشتگیری داواکارییەکەو ڕابەر ئاپۆی بکەرا، خاوەنداریش چنە بکەرا و ئەرک و وەرپرسیاری وێشا جابەجێ بکەرا .
هورسەنگنایەکێ جەمیل بایکی پی جۆرەنێ:
"هەڵبەتە ئەگەرو سەرکۆتەو ئا پرۆسەیەی کە جە لایەنو ڕابەر ئاپوی دەسش پنە کریان وابەسەو ئانەین دۆڵەتو تورکی ئەرک و وەرپرسیاری وێش جابەجێ بکەرۆ. وەڵێکەوتەو ئی پرۆسەینە، مەڵامەتو بنەڕەتی سەرکۆتەو پرۆسەکەی خودو ڕابەر ئاپۆین. گرەنتی پرۆسەکەین. بەڵام ئەنجامداکەیش پەیوەسا بە هەوڵدای وەراوەری. حەر چنە ڕابەر ئاپۆ وەرپرسیارێتی و ئەرکو وێش جە ئەستۆ گێرتەبۆ، هەوڵمڏۆنە جابەجێش بکەرۆ، هەڵبەتە پەی جابەجێ کەردەیش مشۆم دۆڵەتو تورکی ئەرک و وەرپرسیارێتی وێش جە ئەستۆ گێرۆنە. دەرنجام پی جۆرە پرۆسەکە وەڵێ گنۆنە و یاوۆنە بە ئەنجام. بەڵام ئی تەڤگەرە کە پێسەو تەڤگەرو ئیرادەی دەسش پنەکەردەن، درێژە بە ئەوەکۆشای وێش مڏۆنە. هیچکاتێ نەبییەن تەڤگەرێ کە سەرو ئیمکانو ئامادەکریا هەرمانە بکەرۆ. هیچ کاتێ نەبییەن تەڤگەرێ خاوەن ئامانجو ئاسان و سادە. گرڏ کاتێ ئانەش بە بنەما گێرتەن کە پەنەوازیش بە هەرچی بۆنە، بە ئەوەکۆشای خوڵقنۆنەش. بە تەمامەتی ئەوەکۆشایش سەرو ئی بنەمێ بەردەن ڕاوە. هیچ کاتێ بەبێ ئەوەکۆشای، داواو 'ئی هەنگاما بنیۆ' جە دۆڵەتا نەکەردەن و مەکەرۆیش. ئینە بە پاو حەقیقەتو ڕابەر ئاپۆی و ئا ئەوەکۆشای ئازادییە نییا کە بەرۆش ڕاوە. حەرچیش خوڵقنا بۆ بە ئەوەکۆشای وێش خوڵقنانش، پەرەش پنەدان و یاونانش بە ئارۆی. چێگە بە دماوە سەرو بنەماو ئی داواکارییە درێژە بە ئەوەکۆشای مڏۆنە. مشۆم گرڏما خاس چینەیە یاومێنە. یانی بە بێ ئەوەکۆشای حیچ چێوێ بەدەس نمێنە. هیچ کەسێ بە بێ ئەوەکۆشای نمەتاوۆنە چێوێ پێشکەش بە کەسێ تەری بکەرۆ. جا کێ بۆ ئی دۆڵەت دۆڵەتو تورکی بۆنە، کە دۆڵەتێن پەی دلێبەردەو گرڏ چێوێ کوردی، گرڏ هێز و بییەو وێش بەکارئاردەن. بەڵام ئەوەکۆشای بە سەرمەشقایەتی ڕابەر ئاپۆی ڕاگیر بییەن چانەی دۆڵەتو تورکی یاوۆنە پی ئامانجەیە. حەر پۆکەی سیاسەتو نکۆڵی-دلێنەبەردەی شکستش ئاردەن. گرڏ ئینشا جە سەرەیەو ئەوەکۆشاینە وەش بییەن. گەلوو کوردی فرە خاس ئی حەقیقەتەیە مزانۆنە.
هرووژمو پیلانگێڵنی نەیاوا بە ئامانجو وێش، چێگە بەدمایچۆ نمەیاوۆنە پا ئامانجەیشە
رابەر ئاپۆ واتش، 'بەبێ ئەوەکۆشای گەڵێوە جە کوردەسانەنە گەشە مەکەرۆ'. ئینە حەقیقەتو کوردەسانین. بە ئەنجامداو ئەوەکۆشای گۆرەی، قوربانیدای گۆرە و ئێش ئی وەڵکەتەیە ئارۆ وەش بییەن. هەڵبەتە جە جەهانەنە بێ وێنەن. کوردەسان وڵاتێوە جیاوازا. گرڏ چێوێش پاشێل کریان. جە ناوەڕۆکو، تاریخ، بەها، زوان و گرڏ چێوێ بڕیان، دلێنە بەردەیش سەرەرە سەپیان. چی ڕوانگۆ دلێ گلێرگێوە چی جۆرە، جە وڵاتێوە چی جۆرەنە ئەوەکۆشای ئازادی و دیموکراسی سەخترین ئەوەکۆشاین جە جەهانەنە. بە ڕاوەبەردەی ئەوەکۆشای گۆرە، ڕەنگە جە ئاستو هیچ خواستێنە نەیاوۆنە بە ئەنجام. ئینەیچ پەیوەس بە حەقیقەتو کوردەسانی و حەقیقەتو دووژمنی، دۆخو مرۆڤەکا گلێرگەو کوردیۆ. چی ڕوانگۆ ئا ئەوەکۆشایە ملۆ ڕاوە، گۆرەترین ئەوەکۆشاین.
ڕابەر ئاپۆ بە بەردەوامی دلێ ئی تەڤگەرەینە جە شۆڕشەنە پەرەش بە شۆڕشی دا. گرڏ کاتێ پەرەش بە تازەبییەیۆ و، فاڕیای دان. پۆکەی هیچ جە هرووژمو و پیلانگێڵنییەکا ئەنجامش هورنەگێرت. پاسە نەبیێ حەر زوو ئی تەڤگەرە دمایش پنە ئێ، ئی گلێرگە قڕکریێ.
حەر جە سەرەتاوە گەر کاتێ هیچ چێوێ جە هرووژمو و پیلانگێڵنییەکا ئەنجامیش هورنەگێرتەن، ئانە هیچ کاتێ ئەنجام هورمەگێرۆنە، جارۆنە ئا ئاستەی تەڤگەری پنە یاوان ئاستێوە جەهانییا. جە ئیسەنە پیلانگێڵی و سیاسەتو نکۆڵی-دلێنەبەردەی شکستش ئاردەن. ئانەی مەنەنۆ ئانەن مشۆم مرۆڤ سەرو ئینەی ئازادی و دیموکراتیکبییەو وێس پێک بارۆنە. پەی ئینەی مشۆم گرڏو گەلی درێژە بە دڵسۆزییەکا دۆنە چنی ڕابەر ئاپۆی، گرڏ بانە هامکارێ، ئا ئەرک و وەرپرسیارێتییەی کە ڕابەر ئاپۆ گێرتەنش ئەستۆ، پێوەرە سەرمەشقایەتی جە خەباتەکا ئەرەمەزنارەی بکەرا. هیچ ڕێوە تەرە نییەنە. گەر هەڵای جەخت سەرو سیاسەتو نکۆڵی-دلێنە بەردەی بکەرۆوە، ئانە تورکیا بەرەو وڕای ملۆنە. عوسمانیەکێ چێشا سەرەرە ئاما، دۆخو دماییەکا عوسمانیی، هەتا ڕەنگە وەرو دۆخێوە چانەیش خراپتەر گنۆنە.
نە ڕابەر ئاپۆ، نە ئێمە، نە گەلوو کوردیچ هیچ کاتێ گەرەکما نییا گەلوو تورکیای دووچارو دمایێ چا جۆرەیە بۆوە. ئێمە ماچمێنە گێڵایۆ پەی فەلسەفەو بنیاڎنیاو کۆماری ئینا بەرژەوەندی هەردووە گەلوو تورکی و گەلوو کوردی و گرڏو گەلا تەرینە. گرڏو کۊششەکاما سەرو ئی بناغەینۍ.
تا هەلومەرجو هەرمان کەردەی ئازادی پەی ڕابەر ئاپۆی نەڕەخسیۆنە، پرۆسەکە وەڵێ مەگنۆنە
جە قسەکامانە ئاماژەما پنەدا، ئەر هەلومەرجێ نەڕەخسنریۆ تا ئانەی ڕابەر ئاپۆ تاوۆنە بە ئازادی هەرمانەکاش بکەرۆ، هەڵبەتە هیچ کاتێ لوای وەڵێکەوتەی جە پرۆسەکەنە وەش مەبۆنە. ئا پرۆسەی کە ڕابەر ئاپۆ گەرەکشا پەرەش پنەدۆنە. ئینە ڕۆشنا و مشۆم گرڏ کەسێ ئانەیە زانۆنە. پەیوەس پینەیۆ گرڏ چێش ماچانە؟ ماچانە، "ئی پرۆسەیە ئینا ئیسفادەو گرڏیامانە. نییا زەرەرو کەسینە، ئیسفادەش پەی گرڏیمانە. هەلێوە تاریخیش ڕەخسنان. نمەبۆنە جەدەسش دەیمێنە. مشۆم دۆڵەتو تورکی هەنگامە پنیۆنە." ئا هەنگامێ چێشەنە؟ مشۆم هەلومەرجێ خوڵقنۆنە تا ئانەی ڕابەر ئاپۆ تاوۆنە بە ئازادی هەرمانەکاش بکەرۆ. پەی ئەینەی پەنەوازا هەموارکەردەو پەنەوازو یاسایی ئەنجام دۆنە. مشۆم سیستەمو ئیمراڵی هورشنریۆوە. ئینە ئینا بەرژەوەندی گرڏ کەسێنە. هەڵبەتە گەلوو کوردیچ ئینا چەمەڕاو ئینەینە، گەرەکشا. ئانێ جە جەهانەنە ئەوەکۆشای سۆسیالیزمی بەراڕاوە، ئەوەکۆشای ئازادی و دیموکراسی بەراڕاوە، ئەوەکۆشای ئیکۆلۆژی بەراڕاوە، ئەوەکۆشای ئازادی ژەنێ بەراڕاوە و گرڏ کەسێ فرە بەڕۆشنی ماچانە مشۆم ڕابەر ئاپۆ تاوۆنە دلێ هەلومەرجی ئازادینە هەرمانە کەرۆنە و دۆڵەتو تورکیچ مشۆم هەنگامە بنیۆنە.
سەرو ئی بنەمێ فشارێ گۆرە ئینا ئارانە. ئەر دۆڵەتو تورکی ئامان ئی پرۆسۆ، ڕابەر ئاپۆی و کوردا قبوڵ مکەرا، هەڵبەتە گرڏ جە سەیەو ئەوەکۆشایما و هەڵمەتەو ئازادی مییاننەتەوەیینە. گرڏو ئینشا یەکانگیر بیێنێ. پۆکەی دۆڵەتو تورکی ناچارکریا و لوا لاو ڕابەر ئاپۆی.
ڕابەر ئاپۆ جە ویرکریۆ. سولەیمان سۆیلۆ چێشش وات؟ ئینە بە تەنیا قسێ ئاڏی نەبێ. قسێ سیاسەتێ بێ کە تورکیای و حکومەتی بەرێ ڕاوە. واتش، "ماوەو یەک ساڵینە نە نامێ ڕابەر ئاپۆی، نامێ ئەوەکۆشاکەیش دلێمانە مەمەنۆ." بە پەی لوێوەتەر، "بەتەمامەتی دلێشەنە بەرمێ." جە ئیساتێچەنە حەر چا یاگێوە هەتا ئاستو 'بابێنە پەڕلەمان، قسێ بکەرۆ' وچیۆنە. بەڕاسی ئینە پێشئامای و گەشە کەردەیێ گرنگا. ڕابەر ئاپۆ بەهاش پینەی دا. پۆکەی پرسێوە تاریخیش گێرت ئەستۆ.
ئانەی پەنەوازا بکریۆ ئانەنە کە ئی ۋەرپرسیاریە تاریخیە بە هەڎەر نەلۆ. ئانەی واتەنشا، 'با ڕابەر ئاپۆ بۍ، جە پەڕلەمانەنە قسۍ بکەرۆ'، چا کاتەنە ئەر زیاتەر پەرە بە ئەوەکۊشای بڎریۆ، ڕۊشن بۆوە کە دەرەنجامی زیاتەر شۊنەو ۋێشەرە مارۆ.
مشۊم ڕا چا هەوڵا بگیریۆ کە پڕۊسەکەی شێونا
هەڵبەتە بڕۍ ئەرەیاۋنۍ ئەرێنیۍ هەنۍ. قیمەتێوە پینەی مڎا، بەڵام چنی ئی ئەرەیاۋنا ئەرێنیا، زۋانێوەتەر بەکارمۍ. ئەرەیاۋنۍ نەرێنیۍ فرێچ هەینۍ. ئی زۋانو ئەرەیاۋنا نەرێنیۍ پڕۆسەکەی شێونا. پەی ئانەی ئی پرۆسە بە شێوێوە ئەرێنی بەرەو وەڵۍ بلۆ و ئەنجام گێرۆ، مشۆم پەی فاڕای ئی زۋانە نەرێنیا هەوڵبڎا. مشۊم دژش مردا. بەتایبەتیچ گلېرگەو تورکیای، نوویسەرا، ڕۆشنۋیرا و ئەکادیمییەکۍ مشۊم سەرو ئی بنەمایۍ هەڵوێس هۊرگێرا. پی جۆرە کۊششە یەک لایەنەو ڕابەر ئاپۆی و گەلوو کوردی، ڕا چی زۋان و ئەرەیاۋنا نەرێنیا نمەگیریۆ. چونکی ئینۍ ڕا ۋەردەمو ژەعراویبیەینە مکەراوە.
هەڵای باس جە تیرۆریزمی، ڕێکوزیای تیرۆریستی و ئی جۊرە قسۍ مکریا "چێوۍ نەمەنەن کە پەکەکە بکەرۆش. ئیتر ناچارا چەک بنیۆرەو تەسلیم بۆ. هەوڵ مڎریۆ ژەعراویی بیەی وەش بکریۆ. چونکی پرۆسێوە کە وەڵێکۊتەن، نانو فرەو کەسا بڕۆ. پەی ئانەی نانبڕیۍ نەبا، مشۊم ئی پرۊسە وەڵۍ نەگنۆ. هەرپۊکەی ماچا "جە دژو پەکەکەی ئەوەکۊشایما کەرد، پەکەکەما ماڕا. مشۊم پەکەکە تەسلیم بۆ."
پی جۊرە گەرەکشانە لاوازی ۋێشا بشاراوە. مەرامو ئاڎیشا ئینەنە. گەرەکشا نیا جە حەقەتینەکا بیاوانە. گەرەکشا نیا ئانەی نیشانە بڎا کە تورکیا ئینا دلۍ چ جۊرە تەنگەژێوەنە، چنی ڕووبەڕوو مەترسیی بیەنۆ. هەوڵ مڎا نەتەوەپەرسی، شۆڤێنیزم و ئەقڵیەتو فاشیستی زیاڎ بکەرا. پی جۊرەیچە گەرەکشانە پرۆسەکەی شێونا و چی ئاژەو جەنگینە گەرەکشانە هێزو ۋێشا زیاڎ بکەرا. بەتایبەتیچ جە ڕوو ماددی و سیاسییوە گەرەکشانە قەوەتۍ با.
هەرپۊکەی مشۊم ئانۍ کە هەنگامەکاما ئەرێنی موینا، ماناش پنە مڎا خاوەنداریش چنە بکەرا. تەنیا بە ئەرێنی وینای وەسۍ نیا. جە پراکتیکەنە مشۊم پەنەوازیەکۍ ئینەی جابەجێ بکریا. ئەر جە قسێنە ئەرێنی مویناش و جە پراکتیکەنە هەنگامېوە نمەنیا، مشۊم ئینسان بیاوۆنە کە گەمێوە مکریۆ. هەم ئێمە و هەم گەلوو کوردیچ پی جۆرە میاوانە. هەم هەر کەسێ کە چارەسەریش گەرەکا، پی جۊرە مېیاوۆنە.
جگە جە ڕابەر ئاپۆی کەس نمەتاوۆ کۆنگرە بینۆ و ڕاوەبەرش بکەرۆ
بڕۍ پی جۊرە مېیاوانە و ئینەی مارانۍ ۋەرو باسی. تەنانەت هەوڵ مڎا هۆشیارێما بکەراوە. متاوو پی دۆساما واچو: تەڤگەر خاوەن ئەزموونا. فرەو چێواش ئەزموون کەردەن. پۊکەی حیچ کەسۍ نمەتاوۆ گەمە بکەرۆ. مشۊم سەبارەت پینەی باوەڕیما بۆ. ڕابەر ئاپۆ بانگەوازش جە پەکەکەی کەرڎ. کۆمیتەو مېیانو پەکەکەیچ جوابو ئی بانگەوازەیشە داوە. ئینەش پەی ڕاو گرڎینی ئەرەیاۋنا. گرڎ کەسێ مزانۆ پەکەکە چنی نزیک بیۆ جە بانگەوازەکەو ڕابەر ئاپۆی. ڕاوەبەری پەکەکەی هەم نیشانەو تەڤگەری، هەم نیشانەو ڕای گرڎینی، گرڎ کەسێش دا. واتشا "گەرەکمانە بانگەوازەکەو ڕابەر ئاپۆی جابەجێ بکەرمۍ، بەڵام مشۊم هەلومەرجو ئەوەکۊشای پەی ڕابەر ئاپۆی، وەش بکریۆ. مشۊم کۆنگرە ڕاوەبەر بکەرۆ." واتشا، "ئا کاتەی جە کۆنگرەنە کۊبۆوە، ئاژەو ئەوەکۊشای چەکڎاری و ئاژەو پەکەکەی تاوتوێ بکەرۆ و قەرار مڎۆ."
ئەرەیاۋناشا، جە شۊنێوەنە کە چەک بێدەنگ نەبیەن، فڕۆکە بۊمبواران مکەرۆ، فڕۆکەو کەشفی گێڵۆ، بە تانک و توپە هرووژم مکریۆ، کۆنگرە نمەتاویۆ بینیۆ، ئەر دۊڵەتو تورکیای گەرەکش بۆ ئی بانگەوازە جابەجێ بکریۆ، ئا کاتە هەپەگە ئەرەیاۋنێوەش پەی ڕای گرڎینی دا. واتش، "چی هەلومەرجەنە گلېرۊبیەو کۆنگرەی نمەکریۆ. پەی ئانەی گلێربۆوە، مشۊم ئایێربەس بۆ. گرڎ کەسێچ ئی بانگەوازەشا بە ئەرێنی وینا. تەنیا کێ ئینەش بە ئەرێنی نەڎیی؟ ئانۍ کە گەرەکشانە پرسو کوردی سەرو زەمینەو جەنگیۆ مەنۊوە، بە ئەرێنی نمەویناش. چی؟ چونکی ژیۋگێوەشا خوڵقنان. پی جۊرەنە "جە ئەوەکۊشای قازانجما کەرد، پەکەکەما ماڕا. چنی هێزێوە شکسواردەی ئایێربەس نمەکەرمۍ، مشۊم ۋێشا تەسلیم بکەرا" گەرەکشانە پی جۊرە بەردەوامۍ با، بەڵام گرڎ کەسۍ موینۆ کە هەوڵدایۍ چڼە پوچا.
هەرپۊکەی مشۊم ئایێربەسی بۍ مەرج خوڵقیۆ. ئا کاتە کۆنگرە بینیۆ، بانگەوازەکەو ڕابەر ئاپۆی جابەجێ مکەرۆ. چونکی مشۊم ڕاسەوخۆ ڕابەر ئاپۆ ۋێش کۆنگرەی ڕاوەبەر بکەرۆ. جگە جە ڕابەر ئاپۆی حیچ کەسۍ نمەتاوۆ کۆنگرە بینۆ، جە کۆنگرەنە قەرار بڎۆ. مشۊم گرڎ کەسۍ ئینەی بزانۆ.
چونکی ئانەی ئی تەڤگەرشە بنیاڎ نیان و وەڵێوستەن، ڕابەر ئاپۆن. پۊکەی تەنیا ڕابەر ئاپۆ متاوۆ کۆنگرە بینۆ، پاسە بکەرۆ کە کۆنگرە قەرار بڎۆ. جگە چاڎیی حیچ کەس، ڕاوەبەری پەکەکەی یان کادراو پەکەکەی نمەتاوا ئینەی بکەرا. مشۊم گرڎ کەسێ ئینەی بە ڕۊشنی بزانۆ.
هێزە مېیاننەتەوەییەکۍ مشۊم داوا بکەرا تورکیا هەنگامە بنیۆ
ئا دەنگۍ جە مېڎانی مېیاننەتەوەینە وەڵۍ بیێوە، ئەرێنیێنۍ. بە نزیکی گرڎ کەسۍ بانگەوازەکەو ڕابەر ئاپۆیشا بە ئەرێنی وینا. ئێمەیچ ئی ئەرەیاۋنایا بە ئەرێنی موینمۍ، بەڵام ئەر پرسەکە تەنیا بە ئەرەیاۋنێوە مەنۊوە، حیچ ئەنجامێوە دەسمەوزۆ. ئانۍ کە ئی ئەرەیاۋنایا مڎا، مشۊم جە پراکتیکیچنە ئەرک و ۋەرپرسیاریەکاشا جابەجێ بکەرا.
چارەسەری پرسو کوردی، دیموکراتیکبیەو تورکیای و دیموکراتیکبیەو ۋەرکۊتوو مېیامینی تەنیا ڕابەر ئاپۆ، تەڤگەرو ئازادی کوردی و کوردیۆ پەیوەندیدار نمەکەرۆ. گرڎ کەسێ پەیوەندیدار مکەرۆ. چونکی ئارۆ مېیانو جەنگی جەهانی یەرەمی ۋەرکۊتوو مېیامینیا. ۋنی فرۍ مجیۆ. ڕابەر ئاپۆ گەرەکشا ڕا چینەی بگێرۆ. گەرەکشا ڕا جە جەنگی گێرۆ. گەرەکشا دیموکراتیکبیەی وەڵۍ وزۆ. ئی ئاژە ئینا بەرژەوندی گرڎ کەسێنە. هەرپۊکەی مشۊم گرڎ کەسێ هەمگامێوە پراکتیکیە بنیۆ. پەی ئانەی بانگەوازەکەو ڕابەر ئاپۆی جابەجێ بکریۆ، مشۊم داوا جە دۊڵەتو تورکیای بکەرا هەنگامە بنیۆ.
هەرپاسە جەئاردەی ئارای پرسو کوردینە، دەورو ئی هێزا، بەتایبەت دەورو ئۊروپای گۊرەن. مزانیۆ کە بە پیلانگێڵنی مېیاننەتەوەیی ئی پرسە سەختەر کریا. ڕابەر ئاپۆ ئیساتۍ ۋەرپرسیاریێوە تاریخیش وەڵێوستەن. دەرفەتێوەش پێشکەش بە گرڎ کەسی کەرڎەن. واتا متاوا ڕەخنە دای بکەرا. متاوا نزیکبیەیۊکاشا ڕاس بکەراوە. متاوا پاڵپەشتیەکاشا پێشکەش بە کوردا بکەرا. ئیتر متاوا پەی سیاسەتو دلېنەبەردەی-نکۆڵیکەردەی جە ۋەرا ۋەرو کوردانە، کیشیاوە. فشار جە دۊڵەتو تورکی بکەرا کە هەنگامە بنیۆ. ئەر ئینەی بکەرا، ئا کاتە جە سیاسەتو ۋێشانە سەرڕاسبیەیۍ وەش مکەرا. پۊکەی لەکەی سیاوو سەرو چەماشا پاک مکەراوە. چەمەڕاییەکێما پی جۊرەنۍ. ڕابەر ئاپۆ ئیساتۍ دەرفەت و تێگەو ئینەیش پێشکەش بە گرڎ کەسێ کەردەن. ئانەی مەنەن هۊرسەنگنای ئینەینە. هیواڎارێنمۍ کە پی جۊرە هورش سەنگنا.
ئیتر سەردەمو سیاسەتو دیموکراتیکی و گەلی دەس پنە مکەرۆ
ڕابەر ئاپۆ گەرەکشا پی هەنگامۍ پەرە بە پارادایمو ئیکۆلۆژیی، ئازادیی ژەنا و گلېرگەی دیموکراتیکی بەهێزتەر بکەرۆ. سەرو ئی بنەمایۍ گەرەکشا ئەوەکۊشای گەلوو کوردی پەی ئازادی و دیموکراسی مسۆگەر و سەرکۊتە بۆ. گەرەکشا تورکیای و ۋەرکۊتوو مېیامینی بەرەو دیموکراسی بلۆ. گرڎو ئی ئەرک و ۋەرپرسیاریە سەرو هێڵۊو ئازادی ژەنا ئەرەمەرزیێنۍ. مەرامو یاوای پا ئامانجا بە قووڵکەردەیۆ هێڵۊو ئازادی ژەنێن. پرۆسەی ئیساتۍ پرۆسەو ئەوەکۊشای و کۊششیا.
ئی جمیەرە بە درێژایی تاریخی بەردەوام وێش تازەکەردەنۆ و سەرو ئا بنەمایۍ گەشەش کەردەن. ئینەیچ ڕابەر ئاپۆ کەردەنش سەرەتێوە تازەن. گەرەکشا سەرو ئی بنەمایۍ جمېیەرەکەی بەرەو ئاستێوە بەرزتەری و بەهێزتەری بەرۆ. پېسە ئاماژەم پنەدا، جمېیەرەکە فەلسەفە، ئایدۆلۆژی و پارادایمو ۋێش نمەفاڕۆ. فاڕیای و تازەبیەیۆ ئینا شێوازو ڕێکوستەی و ئەوەکۊشای سروشتو جمېیەرەکەیمانە. بە مەعنێوەتەر ئا ئەوەکۊشایەی کە پەرەش پنەدریان گەشەش کەردەن، گرڎو کوردەسانیش ۋېیەرنان و جە ئاستی مېیاننەتەوەیینە سەنگێوەش هەن. مرۆڤایەتی حەز، داوا و ئامانجش هەن. جمېیەرەکە گەرەکشا پەی ئانەی ئەوەکۊشایش بە سەرکۊتەی بیاونۆ.
پېسە چنی ڕابەر ئاپۆ وەڵتەر جە پارێزنامەکاشەنە ئەرەیاۋنانش، سەردەمو گەلا دەسپنە مکەرۆ. ئیساتۍ سەردەمو گەلان. قۆناغو ئەوەکۊشای گەلان پەی ئازادی و دیموکراسی. چونکی ئیساتۍ مۆدێرنیتەی سەرمایەداری یاوان قولەپۊپە. خجڵو ئاژاوەگێڵنیا و نمەتاوۆ چارەسەری پەی کێشەکا پێشکەش بکەرۆ. پۊکەی ئیتر گەلا پەی ۋێشا ئینۍ هەوڵو چارەسەری کێشەکانە.
چی ڕوانگۆ ڕابەر ئاپۆ هۊرسەنگنای پەی پێشئامایە جەهانییەکا مکەرۆ و پا جۊرە هەنگامە گێرۊنە ۋەر. ماچۆ سەردەمو گەلا دەسش پنەکەرڎەن. پۊکەی گرنگی بە ڕێکوستەی گەلا و پێکئاوردەی ئیرادەو گەلا مڎۆ و ئینەی بە بنەما گێرۆ. هەرمانەکێش سەرو ڕێکوستەی گلېرگەی و چی ڕوۆ سەرو پارېزنای گلېرگەی پەی ۋێش گێڵنۆوە و سەرو بنەماو ڕێکوستەی و ئەوەکۊشای دیموکراتیکی ملۆ وەڵۍ.
ژەنی و جوانۍ مشۊم جە بنیاڎنیای گلېرگەی دیموکراتیکینە سەرمەشقایەتی بکەرا
چێگەنە ژەنا و جوانا دەورو سەرمەشقی گێڵنا و وەرپرسیاری گۆرە گنۆ سەرو شاناشا. پەنەوازا جە بنیاڎ نیای ئی گلېرگە دیموکراتیەینە دەورو سەرمەشقی برمانا. ئا پرۆسەی کە ڕابەر ئاپۆ پەرەش پنەدان، نیشاندەرو ئینەینە. ئا پرۆسەی کە ئی جمېیەرە گەرەکشا پەرەش پنە بڎۆ، تەنیا پەی کوردی نییا، بەڵکم پەی گرڎو گەلاو ۋەرکۊتوو مېیامینی و مرۆڤایەتیا. ئامرازەکەش ئیتر حیزب نییا، بەڵکم ڕێکوستەی ڕاسەوخۆو گەلی و گلېرگەین پەی دیاری کەردەی چارەنوویس و ۋێشا. گەرەکشا سیستەمێوە وەش بکەرۆ کە سەرو پەیا ۋێشۆ بۆ و پەنەوازیەکا ۋێش مەیسەر بکەرۆ و ۋێش ڕاوەبەر بکەرۆ.
گرڎو هەوڵەکا سەرو ئانەی ئەرەمەرزیێنۍ. پی جۊرە مشۆم گەلوو کوردی و دیموکراتەکا، وڵاتپارێزنا و سۆسیالیستەکا چا بارۆ هەنگامە بنیا. پەنەوازا خاوەنداری جە ئایندەو ۋێشا و ئازادیشا بکەرا. پۊکەی مشۆم ۋێشا بەڕێکوستەی بکەرا.
ڕابەر ئاپۆ بە مانیفێستێوە تازە هەوڵ مڎۆ داواکا گەلوو کوردی و گەلاو ۋەرکۊتوو مېیامینی و مرۆڤایەتی بەدیبارۆ. ئەرک و ۋەرپرسیاری گرڎو کۊششکارا، لایەنگرا ئی جمېیەرەیە کە عالتەر جە ڕابەر ئاپۆی بیاوانە و ئا ۋەرپرسیاریەی کە ڕابەر ئاپۆ گێرتەنش ئەستۆ چنی ۋێشا هامبەشش بکەرا و پەی ئانەیچ پەی شێوازو جابەجێکەردەی پرۆسەکەی ئەوەکۊشایشا بەرز بکەراوە. ئینە ئەرکو جوانا، ژەنان بە تایبەتی.
مشۊم پاجۊرە گلېرگەی بەرەو وەڵۍ بەرا. ئا کاتە ئی ئەوەکۊشایە کە گەلوو کوردی بە هەوڵ، قوربانیدای و ڕەنجێوە فرۆ پەرەش پنەدان، مېیاوۆ بە مەرامو ۋێش. دیموکراتیک بیەی جە تورکیەنە گەشە مکەرۆ. هەرپاسە دیموکراتیزەکەردەی ۋەرکۊتوو مېیامینی گەشە مکەرۆ. پەرە ئەسای دیموکراتیزەکەردەی جە ۋەرکۊتوو مېیامینینە کاریگەری گۊرەش سەرو گرڎو جەهانی بۆ. چونکی ۋەرکۊتوو مېیامینی بناغەو جەهانیا، ئا یاگێنە کە گرڎو سەرەتاکا چاوە دەسشا پنەکەرڎەن. جەهان بە ۋەرکۊتوو مېیامینیۆ وەش بیەن. هەر ڕووەدایۍ جە ۋەرکۊتوو مېیامینینە کاریگەری سەرو جەهانی و گرڎو مرۆڤایەتی مکەرۆ. ئارۆ گەلوو کوردی ئینا دڵ و مېیانو ۋەرکۊتوو مېیامینینە. پۊکەی دەوری یەکلاکەرەوەش سەرو گرڎو جەهانی بۆ. ئیسە یاوێنۍ ئاژێوە کە چارەنوویسو گرڎ لایۍ دیاری مکەرۆ. ڕابەر ئاپو دیسان ئی دەرفەتشە ڕەخسنانۆ.
پەنەوازا هەڵمەتۊو ئازادی جەهانی جە گرڎ ڕوێوە گۊرەتەرە بکریۆ
ڕابەر ئاپۆ ئینا کۆششەنە پەی ئانەی ئایندەو مرۆڤایەتی بیاوۆ بە بە سیستەمێوە ئازاد و دیموکراتیک. ۋێش جە ۋێشەنە ئینە ئەوەکۊشایۍ گۊرەو تاریخی و مانیفێستێوەن. پەنەوازا گرڎ کەسۍ بە ئەرکو ۋەرپرسیاری ۋێش هۊربێزۆ. بانگەوازییەکە سەرو ئی بنەمایێنە. هەڵمەتۊو ئازادی جەهانی کە پەی ئازادیی ڕابەر ئاپۆی دەسش پنەکەردەن مشۊم هەوڵەکاو ۋێش بەکار بارۆ. پەنەوازا ئی هەڵمەتۍ جە گرڎ شۊنێنە ۋەرفراوانە بکریۆ. پۊکەی مشۊم ڕابەر ئاپۆ جە سیستەمو ئیمرالینە بەربۍ. ئا سیستەمە مشۊم هۊرشێویۆوە. ئازادی بەڎەنی ڕابەر ئاپۆی مسۆگەر بکریۆ و جە هەلومەرجی ئازادەنە تاوۆنە هەرمانەکاش ڕاوەبەر بکەرۆ. ئینە ئامانجی سەرەکییا. پەنەوازا گرڎ کەسێ سەرنجش سەرو ئا ئامانجەیە بۆ و ئەرک و ۋەرپرسیاری ۋێش ڕاوەبەر بکەرۆ.
سەرو ئی بنەمایۍ دیسان جەژنەو نەورۆزی و جەژنەو ڕەمەزانی کە چنەشا نزیکۍ بیمێوە، جە گرڎو گەلا و مرۆڤایەتی پیرۆز مکەرو و هیواو سەرکۊتەی گۊرەی موازو."
