دەوڵەتو ترکی جە ساڵەو ٢٠١٥ یۊ بەرنامېوە تازەو جینۊسایدی و قڕکەرڎەیش دژ بە گەلوو کورڎی وجمیەری ئازاڎیی گەلوو کورڎی دەسپنەکەرڎەن کە بە بەرنامەو 'چۊکپنەدایرە' ئشناسیان و چا چوارچېوەنە هاموەخت جە یەرە پارچەو سەرنیشت، پانیش، ۋەرنیشتوو کورڎسانی هجومەکېش چڕکەرڎېنۍ و مەردمی مەڎەنی قوربانی یۋەم و ئا هجومانۍ.

یۊ چا یاگا کە هجومەئەرەگیریەکۍ دەوڵەتو ترکیش سەرەمڕە چنە ملا ڕاوە، پانیشتوو کورڎسانیا، جە ماوەو ٨ ساڵا ۋیەرڎەینە دەیان کەڕەتۍ جە مەنتیقە جیاجیاکا ئی بەشەو کورڎسانینە هامۋڵاتیۍ مەڎەنیۍ و مەنتیقە ئەرەنیشتەییەکۍ کریېنۍ ئامانج و هجومەکا ترکی ئەرەگیری.

بەپاو ئامارېوە کە لقوو کورڎسان و عېراقی سەربە ڕېکوزیاو سی پی تی پۍ ئاژانسو هەواڵی فراتیش کیانان، بەمەڵامەتوو هجومە ئەرەگیریەکاو دەوڵەتو ترکی جە پانیشتوو کورڎسانی، جە ماوەو ٨ ساڵا ۋیەرڎەینە٣٦٦ هامۋڵاتیۍ بیېنۍ قوربانی.

جە مانگەو ئابو ساڵەو ٢٠١٥ یۊ تا ئیسە، ١٤٧ هامۋڵاتیۍ مەڎەنیۍ گەشمەرڎۍ بیېنۍ، ٢١٩ هامۋڵاتیۍ تەریچ زامڎارۍ بیېنۍ.

هاموەخت حەربە مەڵامەتوو هجومەکاوە ژمارېوە فرە جە دەگایەکا کورڎسانی زەرەرشا پنە یاۋان و بۊمبۋاران کریېنۍ، بەپاو هەمان سەرچەمەی حەر بە مەڵامەتوو هجومەکاوە جە مانگەو ئابو ٢٠١٥ یۊ تا ئیسە ١٥٨ دەگۍ چۊڵېکریېنۍ.

بەمەڵامەتوو چڕی بۊمبۋارانەکەی و ڕاسەوخۊ بەئامانجگېرتەی هامۋڵاتیا مەڎەنیۊ جە لایەن و دەوڵەتو ترکیوە، تا ئی وەختە ٦٠٠ دەگۍ مەنتیقە سنوریەکا هەڕەشۍ چۊڵکەرڎةیشا سەرا.

ئانەی یاگۍ تەعاجبیا ئانەنە کە سەرەڕاو ئی گرڎ کۊکوشیا حکومەتوو هەرېمی، دەوڵەتوو عېراقی، ڕېکوزیاو لایەنە میان نەتەوەییەکۍ ۋەران ۋەر پی تاوانا بۍ دەنگېنۍ و نتقشا جە ۋېشا بڕیەن.

هـ . ش