بەپاو ئینستیوتی جیۆلۆجی ئەمریکی، ئا بومەلەرزەی جە سەعاڎ ٢:٣٣ دەیەقا سەرسەعبی کۊت، چەقەکەش ٢٦ کیلۆمەترۍ جە پانیشتوو شارو دیژوی جە هەرێمو شانتونگی دوورا بە قووڵایی ١٠ کیلۆمەترا.

بەپاو ڕۊنامەو گڵۆباڵ تایمزی ئی بومەلەرزە بەقوەتتەرین بومەلەرزە بیەن جە دە ساڵی ۋیەرڎەنە کە هەرێمو شانتونگینە کۊتەبۊ، ئەرەنیشتۍ شارە دوورەکا پېسە پەکینی و تیانجینی و شەنگهای جە دووری ٨٠٠ کیلۆمەتراوە جە چەقو بومەلەرزەکەیۊ هەستشا پنەکەرڎەن.  

حەرپاسە کەناڵی ڕەسمی (سی. سی. تی. ڤی.) جە زۋانو دەسەڵاڎدارا شانتونگیوە ئەرەیاۋناش، لانی کەم ٢١ کەسۍ زامڎارۍ بیېنۍ، ١٢٦ یانۍ و بینۍ وڕېنۍ. دماو بومەلەرزەی یۋەمی، ٥٢ بومەلەرزۍ گولانۍ شۊنیشەرە کۊتېنۍ.

بومەلەرزە جە چین ۋەربڵاوا، بەڵام کۊتەی بومەلەرزەی جە بەشو پانیشتوو وڵاتەکەیەنە دەگمەنا، فرەو ئەرەنیشتا و شارە گۊرەکا چینی گنا بەشو پانیشتوو وڵاتەکەیۊ. نۋسینگەو سیسمۆلۆژی شانتونگی ئەرەیاۋناش، ئەگەرو کۊتەی بومەلەرزەی قورسی فرە کەما.

هـ . ش