بەمەڵامەتو ئێر کۊتەیۊ جە کەمپێوە شەنگالییەکانە ٢٥ خێمۍ سۊتۍ
جە کەمپەکا پانیشتوو کورڎسانی کە ئاوارەکۍ شەنگالیشا چنەنۍ، کارەساتە دڵتەزێنەکۍ دمایشا نمۍ. جە دماین نمونەنە ٢٥ خێمۍ سۊتۍ.
بە پاو زانیارییەکا سەرسەعبو ئارۊی جە کەمپو داودیەی مەنتیقە و ئامێدی جە پاڕێزگاو دهۆکی ئېر جە خێمەکا ۋەربی.
ئێرەکە زەرەری گیانیش شۊنیرە نەبۍ، بەڵام ٢٥ خێمۍ بە تەمامی سۊتۍ.
کەمپو داودیەی ساڵەو ٢٠١٤ وەشکریا و ئاوارەکۍ شەنگالی چنەشەنە ئەرەنیشتېنۍ.
کەمپەکە جە ٥٠٠ خێما پێکئامان و نزیکەو ٢٥٠٠ کەسا جە خەڵکو دەگا و گلېرگەکا شەنگالی چا ئەرەنیشتېنۍ.
هـ . ش
