بنه‌یانەکۍ به مه‌به‌سوو لوای پەی ئیمراڵی، داواكاریێوەشا پێشكه‌ش كەرد
بنه‌یانەو ڕابه‌روو گه‌لوو كوردی، عه‌بدوڵا ئۊجالانی و بنەیانە‌و یەرۍ زینڎانییای تەری، به مه‌به‌سوو دیڎاری، جارێوە تەر داواكارییشا پێشكه‌ش كەرد.
بنەیانە‌و ڕابه‌روو گه‌لوو كوردی، عه‌بدوڵڵا ئۊجالان و بنەیانە‌و یەرۍ زینڎانییای تەروو ئیمراڵی، کە ٢٩ مانگێن حیچ زانیاریێوەشا بارەوە نییا، به مه‌به‌سوو دیڎاری جارێوە تەر سەردای کاربەدەسە ی پەیوەندیڎارەکاشا کەرد.
محه‌مه‌د ئۊجالان، براو ڕابه‌روو گەلوو کوردی، عەبدوڵڵا ئۊجالانی و پارێزنه‌ره‌كه‌ش، مه‌زڵووم دینچ به مه‌به‌سوو پێشكه‌شكەرڎەی داواكاریی دیڎاری، سه‌ردای داواكاری گردینوو كۊماروو بورسای و ڕاوه‌به‌رایه‌تیی زینڎانوو ئیمراڵییشا كەرد.
به هه‌مان نۊع عه‌لی كۊنار، براو عومه‌ر خه‌یری كۊناری، پۊلاد یڵدرم، براو حامیلی یڵدرمی و مه‌لیحه چه‌تینە، واڵۍ وه‌یسی ئاكتاشی، كه ئادێچ ئیمراڵینە کریێنۍ زینڎان، داواكارییشا پێشكه‌ش به هه‌ردووە ئەرەمەرزیایەکا کەرد و داواو دیڎاریشا كەرڎە.
٢٩ مانگێن نەتاویان حیچ زانیاریێوە ورگێریۊ
نویسگه‌و یاسایی سه‌دەی و بنەیانە‌و زینڎانییاو ئیمراڵی، ڕۊو ٢٥وو ئاداروو ٢٠٢١ێوە نەتاوانسا حیچ زانیاریێوە باره‌و ڕابه‌روو گه‌لوو كوردی، عه‌بدوڵڵا ئۊجالانیوە ورگێرا.
پارێزنه‌رۍ به مه‌به‌سوو دیڎاری چەنی ڕابه‌روو گه‌لوو كوردی، حه‌فتۍ دووۍ جارۍ داواكاری پێشكه‌ش کەرا، وەلۍ جوابوو داواكارییه‌كه‌یشا مەدریۊوە.
ماوەو ١٢ ساڵانە، تەنیا ٥ جارۍ پارێزنەرۍ تاوانشا موەکیلەکەیشا بوینا
نویسگەو یاسای سەدەی، ڕۊو ٧وو ئابی ئەرەیاوناێوەش وەڵا کەرڎۊ، "بەڕێز ئۊجالان ئینا دلۍ سیستمێوە ئەشکەنجەینە، کە تارێخەنە وێنەش نییا، ئێمە داوا جە ڕای گردینی دیموکراتیکی کەرمۍ، کە هاگادارۍ ئا بابەتەیە با".
جە ئەرەیاوناکەینە ھەرپاسە ئاماژە پانەیچە کریابۍ، "ماوەو ١٢ ساڵی ویەرڎەینە، تەنیا ٥ جارۍ پارێزنەرۍ تاوانشا دیڎار چەنی بەڕێز ئۊجالانی کەرا، دمایین دیڎاریچ جە ٧وو ئابوو ٢٠١٩ کریان و ٤ ساڵۍ سەروو دمادیڎاریرە ویەرڎەن".
س.ز
