بۆنەتی ساڵڕۆو ئاسمانۍبیەی مامۆسا سەباح هەورامیەوە
سەباح هەورامی یۆ چا چنەئامایا و ڕۆشنویرا بێ کە بە لوایش تەشابیێوش کەردٚەرە تڵانۆ هۆنەری و بە دەنگە ئاسمانیەکەیش ئاڤۆ ڕۆحوو گردٚیما نیاش ئاژین.
بڕێو کەسایەتیێ هەنێ هەرچن تا وەننەنە با، کۆمەڵگانە کلکەنیشانێنێ و یاگێشا لا کۆگاکاوە دایمە بەرزەنە و ئینای لاسەریەوە بەڵام دماو دمایین هەناسەیچشا کە چی دنیانە هۆرش کێشا و بە جەسە دلێمانە مەمەنا یاگێ هاڵیەشا گنۆوە سارا و بە هیچ تەشک و دیامانێو پەڕە مەبۆوە!!.
بە واتێوتەر ئێننە ڕەوتیوی کرژ و ژیرانەشا بیەن کە شۆنکەوتەکێ شۆنیشا مەلیڤیۆشا پەی پا بنیا یاگەپاشا.چی بەینەنە گەورەتەرین وەرێژ ئەو کۆمەڵگاکەیشا گنۆ کە ئا کەلەبەرە بە لوای ئا ویرمەندا کریۆرە بارووموو فەرهەنگوو وەڵاتەکەی بە هیچێو مەگیریۆ.
هەمیشە زیندٚە مامۆسا سەباح هەورامیچ یۆ چا چنەئامایا و ڕۆشنویرا بێ کە بە ویروو نویسەروو ئی نویستەیە بە لوایش کەلەبەرێوش کەردٚەرە و ئاستش جیا!.ئا گەورەپیا لوا و تەشابیێوش کەردٚەرە تڵانۆ هۆنەری و بە دەنگە ئاسمانیەکەیش ئاڤۆ ڕۆحوو گردٚیما نیاش ئاژین ،هۆنەرمەندیوی دەنگ وەش،ڕۆح سووک و گەشاوەز کە ماوەو ژیوای هۆنەریشەنە بە چریکە سۆزدارەکەیش و ئەرەنیای و ئەنەئاردٚەی بەزمە هۆنەریەکا تاواش بۆ بە یۆ جە سەرتەڵاو هۆنەروو هەورامانی.
مامۆسا سەباح خارگێڵانەنە چەمێش تاڵی و سۆڵەو دنیایشا دی و تا ئا لەحازە بەرێ بەهەشتیش پەی لاترەکێ کریای هەر دڵش ئاوارەو ئی هەردٚی و ئەو هەردٚی بێ وەلیم قەرەبوو خەفەتیش بە هەوازەو سیاوچەمانەی و ئەوەلاونای کەشە سەربەرزەکاو هەورامانی سەربەرزی کەرێوە.ڕەنگا مامۆسا یۆ چا هۆنەرمەنداو هەورامانیە بیەبۆ کە شۆنۆ هۆنەری ڕەسەنیەوە بیەن و بە ئەوەوانای و وردٚەوە بیەی بیەن بە هۆنەرمەندیوی پایەبەرز و یاگۆ باوەروو خەڵکوو هەورامانی.
مامۆسا پردٚێوە بەینوو گەورەهۆنەرمەندەکاو هەورامانی پێسە مامۆسا عۆسمان،مامۆسا حەمەحسەین و مامۆسا جەمیلی و هۆنەرمەندە تازەپنەیاواکاو هەورامانی بێ. جە پاڵوو ئانەینە بەزمە ڕەسەنەکا پارێزنێ بەزمێ تازێچ کە تێکەڵوو ڕۆحیانەتوو هەورامی و هەورامی زوانەکاش کەردٚێبێنێ وەشێ کەرێ.
گردٚ گلێرە و ئەرەنیشتێوەنە هاگاش هۆرزەوئەرەنیشتی ئەخلاقیش بێ و پەرگەماو ژیوەنیش پاسە نیابێشەرە،دایمە چنی خەڵکی بێ،ورکەش ئەدٚالە گەورێش و داڵغەش سەرکەوتەی وەڵاتیش بێ
چی سەرەوەختەنە کە گۆرانیێ هەورامیە ئینا سەراوچێری و چێرەوزوەریەنە!! و هەرکەسی میاوی وەروو ئەوەنەپەرسای و ئۆجاخ کۆری!! کەرۆ کۆڕنەورە،دەس کەرۆ گۆرانیێ هەورامیێ واتەی و کلیپ وەش کەردٚەی ئەوەجە بە کەسانیوی شارەزا و ئەنەئاردٚ پێسە مامۆسا سەباحی فرەتەر جە گردٚ زەمانیوی پنەواز بێ بەڵام بەداخەوە ئا هۆنەرمەندە ئازیزە جە ڕواڵەتێوەنە کە هەڵای خەریکوو ترۆق و ئەوەتەنای هۆنەروو نیشینگەو ئاهوورای بێ کتووپڕ دڵە گەورەکەش مدرا و ماتڵوو مەینەتاو زەمانەی نەبی.
سەباح هەورامی شارەزاو گۆرانیێ هەورامیێ بێ،بەزمەکا خاس زانێ،سەروو خوانەکۆ هەوازە ئاسمانیەکەو سیاوچەمانەیوە نیشتەبێرە پەوکەتی بەرهەمەکێش بۆبرامەو ڕەسەنایەتیشا چنە ئەی، فرەو وردٚەبەزمەکاش تێکەڵ چنی مووسیقای کەردٚێبێنێ، وەروو ئانەیە پرزێ تازێ هەورامانی و حەزپنەکەرێ هۆنەروو هەورامانی دڵشا ڕەوتوو هەرمانەکاشەوە بێ.
سەباح هەورامی یۆ چا هۆنەرمەنداو هەورامانیە بێ بە وانای و فێربیەی زانستی ئێژانیوی تایبە نیێرە پەوکای فرەتەر سەرەنجوو بەرهەمەکاش و هۆنیێ گۆرانیەکاش دێ.
بەداخەوە ئێتر مامۆسا مەگێڵۆ داڵانیەنە تا بە چەم وینۆ لۆکەش کنیا بێ و بە باقەباقە چنوور نریابێ بەڵام داڵانیچ گردٚ ساڵێو ئی وەختە بە نسکەنسک و پڕمینێوە دڵ ئێشنە ملۆ پێوای ساڵڕۆ ئاسمانی بیەیشەوە و سۆسەنە شاهێدٚەنە و بۆژانەیچ قازیا کە سەیادٚی دڵ پیس و زێڵ چڵکین ناکایوەنە گنۆ تیرئەندٚازی!!
پاوە پرێس/ ئۆمید حەبیبی
