ئامەد پیران، چالاكی مەدەنی پەیامێوەنە پەی ڕای گردینی بارەو دۆخوو گۆهدار زێباریوە، یۆ جە زینڎانیکریایاو بادینانی، ئەرەیاونانش، "بارودۆخوو تەندروسیی گۆهدار زێباریی جە ئاسایشی گردینوو هەولێرینە فرە خاس نییا و ماوەو یەرێ ڕوان مانیش گێرتێنە".

ئا چالاکە ئانەیچش وستەن ڕووە، "تا ئیساتێ حیچ چارەسەرێوە پزیشکی پەی گۆهدار زێباریی نەكریان و لایەنی پەیوەندیداریچ نەلێنێ دەمشۆ".

ئینە جە وەختیوەنە، پەنەمشۆ ئارۆ دۆسیێوە تایبەت سەروو گۆهدار زێباری جووڵنیۆ و ڕوێچ پەی داڎگاییكەرڎەیش سەروو ئا دۆسیەیە دەسنیشان کریۆ، کە پێسە ئامەد پیران ئاماژەش پەنە کەرڎەن: "گۆهدار ڕووبەڕوو پیلانێوە خەتەرەو دەزگاو ئاسايشی کریۆوە".

گۆهدار زێباری، تشرینوو یوەموو ساڵەو ٢٠٢٠ینە، جەنی چوار چالاكا و ڕۆنامەنویسای تەری بە تۆمەتەکاو "سیخوڕی، هەوڵدای پەی كودەتای و ئاژاوەگێڵنای" گیریێ، جە ١٦و شوباتوو ٢٠٢١یچنە لاو داڎگاو تاوانەكاو هەولێریوە سزاو شش ساڵا زینڎانییش ملەرە سەپییا.  

دماو كەمكەرڎەیۆ سزێکێش بە ڕێژەو ٦٠%، قەرار بێ، جە ١٦و ئاداروو ٢٠٢٣ ئازاڎ کریۆ، وەلێ ڕوێ وەڵتەر یانێ جە ١٥و ئاداروو ٢٠٢٣، جە ئەرەنیشتەیێوە داڎگاینە بەبێ هاگاداركەرڎەیۆ پارێزنەرا، گۆهدار زێباری سزاو حەوت مانگای تەری زینڎانیكەرڎەیش ملەرە سەپیا، ئانەیچ تەنیا بە تۆمەتەو فاڕای لۆگۆو سەیارەکەیش و دماو تانەدای جە قەرارەکەی، ماوەو سزاكێش حەوت مانگاوە پەی پەنج مانگا كەمە كریاوە.

 ماوەو سزای دووەمەو گۆهدار زێباری، ڕۆو چوارشەممەی، ١٦و ئابوو ٢٠٢٣ تەمامیا،وەلێ هەڵای ئازاڎ نەکریان و زینڎاننە ئازیانۆ و بەپاو قسێ پارێزنەر، كەسوكاریش و چالاكا دیسان دۆسیێوە تەرش سەرۆ كریێنۆ.

ئا دۆسییە تازێ پەی گۆهدار زێباری کریێنۆ، پێوەسەنە بە بییەی چەکێوە تاپڕ ساڵەو ١٩٦٠، کە هینوو بابایش بیەن و یانەو واڵەکێشنە گیریان.

یاگێ باسین مانگەی وەڵینە شێروان شێروانی، ڕۆنامەنویسی زینڎانیکریاو بادینانی، بە سیناریۆیێ وەشکریا سزاو چوار ساڵا تەری زینڎانییش ملەرە سەپیا، وەختیوەنە ئشیا مانگەو ئەیلوولوو ئێساڵی ئازاڎ کریێ.

س.ز