بنەیانەو ڕۆنامەنویسە گوڵستان تارێ، کە ٢٣ێ ئابینە شاروو سلێمانیی هەرێموو فیدراڵوو پانیشتوو کوردسانینە بە فڕۆکەی بێفڕۆکەوانوو دەوڵەتی ئەرەگیروو تورکی بە هامکاریی پەدەکەی چەنی هامڕاێوەش بە نامێ هێرۆ بەهادینێوە گەشمەردێ بیێ، سەرێ کۆمەڵەو ژەنە ڕۆنامەنویساو میزۆپۆتامیای (MKG)یشا دا. ڕۆنامەنویساو MKG و کۆمەڵەو رۆنامەنویساو دیجلەی و دیسک باسینی، خێرامای بنەیانەو گەشمەردێشا کەرد. چالاکاو بنەیانەو جمیەروو ژەنە ئازادا و ئەنداماو پارتوو یەکسانی و دیموکراسیی گەلا (دەم پارتی) ئامادێ سەردایەکەی بێنێ، بە هورواستەی نویسیای " نمەتاودێ ڕۆنامەوانی ئازادی بێدەنگ بکەردێ". خێرامای بنەیاو گەشمەردە گوڵستان تارێ کریا.

سەردایەکەنە مسەفا مەسعوود تەکیک براو گۆڵستان تارێ وتارێوەش پێشکەش کەرد و ئاماژەش پانەیە دا، کە گوڵستان تارای ڕۆنامەنویسە گەلوو کوردی و دۆسەکاش خاوەنداریێوە فرەش وەنە کریا و واتش:" وەعد بە گەلەکەیما مدەیمێ تا کۆشیای ئازادی ڕۆنامەنویسا بەردەوام بۆ، بە گردوو هێزیماوە پاڵپەشتێشا بیمێ".

دماتەر واڵێ تارێ، دێجلە تەکیکە، قسێش کەرذیو ئەرەیاوناش کە قەڵەموو گوڵستانێ نمەگنۆرە زەمین و کۆشیای شکۆمەندانەش بەردەوام مبۆنە.

ڕۆزا مەتینایچ، وەرپەرسەو ئاژانسوو میزوپۆتامیای قسێش کەردێ و سەرنجەش وستە سەروو فشارەکاو دژوو ڕۆنامەوانیی ئازادی و ئەرەیاوناش:" م،ک،گ پەی پارێزنای میراتوو ڕۆنامەنویسا ئەرەمەرزیان،چێگە نە قەڵەم و نە کامێرەو ڕۆنامەنویسا مەگنۆرە زەمین و درێژە بە کۆشیایشا ندەیمێ. چونکوم ئینە کۆشیای گەلوو کوردیا، نەک تەنیا پەی ڕۆنامەنویسا. سالانیوا زوان ڕێکوستەی و کۆشیای گەلوو کوردی، کەوتەن وەروو هجوونی هەمەلایەنەی،پەوکای پێوەرە درێژە بە کۆشیایما مدەیمێ."