جە چالاکیێوە گۆرەنە و بە سەرپەرشتی ڕێکوزیاو داکۆکی و بە ئامەڎەبیەو ژمارێ جە ڕۆنامەوانا و چالاکا کورڎی جە شارو مانچێستەر و بەریتانیاینە تاجە وولینەو ڕێزی پەی گیانو گەشمەرڎا هێرۆ بەهادینی و گوڵستان تارۍ نریارە.

جە چن بەشێ چالاکیەکەینە بەنامێ ڕێکوزیاو داکۆکیۆ بەیاننامە ونیاوە و ئاماژەشا پانەیە دا کە درۆنو تورکی فاشیستی بە چەمساغی پارتو دیموکراتی دوێ جە ڕۆنامەوانە ئازا و قارەمانەکا میدیاو ئازاڎییش بەنامەکا گوڵستان تارۍ و هێرۆ بەهادینی گەشمەرڎۍ کەرڎۍ.

ئەگەر ئاڎێ ئا دوەشا گەشمەرڎۍ کەرڎێ ئانە ئێمە دەیان و سەڎان ڕۆنامەوانێ پېسە هێرۆی و گوڵستانېما هەنێ و پەروەردە مکەرمێ.

جە بەشێ تەرو چالاکیەکەینە خیانەتو سی و یەکو ئابیشا شەرمەزار کەرڎ کە پارتی پەلکێش و ڕژێمو ئەرەگیرو بەعسیش کەرڎ پەی دلێ پانیشتو کورڎەسانی.

باسشا چانەیە کەرڎ کە بەعس تەژنە بێ بە ۋنەو کورڎی و تاوانەو ئەنفالی و کیمیاواران و قەنارە و تیرۆرش سەرو گەلەکەیمارە ئارڎ، بەڵام پارتی بێ شەرمانە پەی مەنەیۆ هێزو وێش ئا خیانەتەشە جە گەلەکەیش کەرڎ و بەعسش تا دلێ جەرگۆ هۆلێری ئارڎ.