ئەندامەو دەسەو ڕاوەبەریی کەژەکەی بەسۍ ئەرزینجانە باسش سەروو هجوومە گەورەکا دژوو گەنجا کەرد و واتش، "گەنجاو کوردی ئەندێشەو ڕابەروو گەلوو کوردی عەبدوڵڵا ئۊجالانی مشناسا و وەراوەروو دوژمنینە هەنگامە پەی دمای مەنییا".
ئەندامەو دەسەو ڕاوەبەریی کەژەکەی بەسۍ ئەرزینجانە میانەو بەشداریشنە بەرنامەو 'خۊبوون'ینە لە ژەن- تی ڤینە جوابوو پەرسەکاو ئارژین بایسەلیێش دێوە.
بەسۍ ئەرزینجانە ویرش ئارڎۊ، کە گردوو جمیەرەکاو ئازادی، ئیکۊلۊژی، دیموکراسی و ژەنا فرێشا گەنجێنۍ و واتش، " چالاکییەکاو دژوو سیستموو سەرمایەدارینە گەنجۍ ئینۍ ڕیزوووەڵێوە. وەروو ئانەیە گەنجۍ جە ئایندەو وێشا دڵنیۍ نیەنۍ. دلۍ گلێرگەی کوردییچنە دۊخەکە هەمان چێوا. وەختۍ نەورۊز مۍ، ئانۍ زیاتەر ملا وەرۊ گەنجێنۍ. دلۍ گەریلاینە ئانۍ جە ئەستەمتەرین یاگەکانە هەنۍ و گیانبازی کەرا، گەنجەکێنۍ. جە پەرسەو کوردینە گەنجێنۍ کە یوەم کەس سەرە ورمدا. بە ئازایەتی و هەم بە ئەندێشەو وێشا با بە سەرمەشقۍ گلێرگەی".
ئا ئەندامۍ دەسەو ڕاوەبەریی کەژەکەی واتیچش، کە مۊدێرنیتەی سەرمایەداری گەرەکش نییا گەنجۍ ئازادۍ با و پێسە درێژەش دا پەنە: "گەنجۍ بەرەو لەشورەشی و ماددەی هۊشبەری ئاراستە کریا. ئامانجوو مۊدێرنیتەی سەرمایەداری ئانەن، کە گەنجا جە ئیرادەی ماڵۊرە، پاسە کەرۊ کە نەتاوا ویرۍ جە ئازادی، دیموکراسی، سیاسەتی و وەڵاتی کەراوە. گەرەکشانە گەنجۍ تەنیا ڕوەکاشا ویەرنا، گرد چێوی دلێنە بەرا، حیچ بەهیوە پەی گلێرگەی نازاوە. ئا گەنجێچە بە پاو نەتەوەو دەوڵەتی و بە پاو بەرژەوەندیی کەسی مژیوا. ئا گەنجۍ پێسە گەورۍ با و تندوتیژی دژوو ژەنا کەرا و سووکایەتییچ وەراوەروو گەورەکاشا، ژیوای کۊمۊناڵ و پێوەیی قبووڵ مەکەرا. سیستم گەرەکش نیا کە گەنجۍ وێشا بشناسا، وێشا ڕێک وزا، قەرار سەروو وێشا بدا، گەرەکش نیا کە پەی وەڵاتەکەیشا هەرمانە کەرا".
بەسۍ ئەرزینجانە سەروو بێهومێدیی گەنجا هەمان وەختنە چارەسەریچش وست ڕووە و واتش، "ڕاسا، دلۍ گەنجانە بێهومێدیێوە فرە هەن. وەلۍ گەورەتەرین جواب پەی ئا بێچارەیی و دەسەوسانییە لاو ڕابەر ئاپۊیۊ هەن. بەتایبەتی ژەنی، ئەندێشە و کۊشیای ڕابەر ئاپۊی جە فرەو ڕەهەندەکاوە گەورەتەرین جوابا. گەنجۍ دلۍ ژیواینە وێشا پێسە بێبەهای هەست پەنە کەرا. ئینسان ئا وەختە هەست بە بییەی وێش کەرۊ بە جۊشوخرۊشۊ و بەشداری ژیواینە کەرۊ.
بەسۍ ئەرزینجانە واتیچش، کە کوردستانیچنە دژوارتەرین هجووم کرییۊ سەروو گەنجا و پێسە بەرڎەوامە بییە: "جمیەروو ژەناو کوردی یاوان ئاستێوە. تەماموو کوردستانینە، وەرکەوتوو دلیڕاسەینە و دنیانە سەرمەشقایەتیی مدرامانوو ژەنا کەرا. گلێرگەنە ئا وەختە ژەنی ورمێزا سەروو پایا و وێشا وزا وەڵۍ قورسا ئا مدرامانە مەڕیۊ سیستم ئیساتۍ چێش کەرۊ؟ ئەگەر گەنجۍ، ژەنی گەنجۍ مەڕیا، ئایندەنە مەتاوا ورزاوە سەروو پایا. پاسە ویرۍ کەراوە. حەر جە گەنجینە ئیرادەشا مەڕییۊ، گەنجیینە هامسەرگیرییشا پەنە کەرۊ. ئێراننە هامسەرگیریی زارۊڵە ١٣-١٤ ساڵا یاسایین. ئانۍ کە هەڵای وێشا، ژیوای و بییەی وێشا نەشناسان، چەنی پیێوە هامسەرگیرییش پەنە کەرا. ئانەیچ ماڕۊش. دماو ئانەیە بۊبە ساعیبەو زارۊڵا تەنیا ویرۍ جە وێش و بنەیانەکەیش کەرۊوە، مەتاوۊ ویرۍ جە هیچی تەری کەرۊوە.
ئانە سیاسەتێوا کە بەمەبەست پەیڕەو کریۊ. ئینسانەکۍ حەر جە زارۊڵەییوە فێروو لەشورەشی و ماددەی هۊشبەری کریا، کە ئانەیچ سیاسەتوو دەوڵەتین. پەوکای دوژمن دژوو کوردستانی جەنگێوە تایبەت بەرۊ ڕاوە، وەلۍ چی ساڵانە دژوارتەرش کەرڎەن".
بەسۍ ئەرزینجانە یادیچش ئارڎۊ، کە پەی دەسدرێژیی سەروو کناچا، تیمی تایبەتۍ ڕوانۍ کریا و واتش، "نموونە پەی گردوو ئانیشا هەن. ئێمە بە ژەنە گەنجا ماچمۍ کە وێشا ڕێک وزا، هاگادارۍ سیاسەتەکاو دەوڵەتی با. ئەگەر بە ڕێکوزیای جووڵیاوە متاوا وێشا پارێزنا. وەلۍ ئەگەر بەتەنیا مەناوە خەڵەتییا. وێشا سەروو ئەندێشەو دیموکراسی و ئازادی ڕێکۍ وزا و پێسە بەشداری دلۍ کایەو ژیواینە کەرا و با بە سەرمەشقۍ گلێرگەی. کوردستاننە سیستم چندە گەرەکش بۊ هجووم کەرۊ سەروو گەنجا چندەیچ هەوڵۍ بدۊ کە ئیرادەیشا ماڕۊ، گەنجۍ بەزوویی دەسبەرڎارۍ مەبا، ورمێزاوە سەروو پایا، پۍ گێرارە، یارێنۍ. وەروو ئانەیە بڕێوە بە سیاسی بیێنۍ، ئەندێشەو ئازادی، ئەرەمەنەی ڕابەر ئاپۊیشا ئشناسان، جمیەروو ژەنا و گەشمەرڎاشا ئشناسان، هەنگامۍ فرە گەورۍ منیا، دوژمن حەرچیێوە بۊ مەتاوۊ پاشکەشۍ بە گەنجا کەرۊ".
س.ز
