پەرلەمانتاروو دەم پارتی عەلی بۆزان ئەرەیاۋناش، کە دەسەڵاتوو ئاکەپە-مەهەپەی جە ڕاو تۆماری وەهمی دەنگدەراوە گەرەکشا ئیراڎەو کوردا زەوت کەرۆ.

پەرلەمانتاروو مێرسینوو پارتوو دیموکراسی و یەکسانی گەلا (دەم پارتی) عەلی بۆزان سەبارەڎ بە ساختەکاری و فرت و فێڵەکا دەسەڵاتوو ئاکەپەی جە تۆماروو دەنگدەرانە، قسێش پۍ ئاژانسوو هەواڵوو فورات (ANF)ی کەردۍ.

بۆزان ویرش ئاردۆ کە دەسەڵاتوو ئاکەپەی ماوەو ٨ ساڵان بە نیایرەی قەیومی دەسش سەروو ئیراڎەو کوردارە گرتەن و واتش، "٨ ساڵێن قەیوم سەروو شارەوانیەکارە نریانەرە، کە کوردەکۍ بە دەنگ و ئیراڎەو ۋێشا ئا شارەوانیێشا بەدەسئاردێبێنۍ. جە سەروبەنڎوو هۊرچنیەو ٣٠/٣/٢٠٢٤ینە دەسشا بە تاقیکەردەیۆ شێوازی تازەی کەردەن. دەسەڵات چا یاگانە کە جە هۊرچنیەو ٢٠١٩ ینە هەدەپە بە جیاوازیێوە کەم سەرکۊتەبۍ، بە دیاریکریایی چا یاگانە دەنگدەرا تۆمار کەرۆ".

جە یاگێوەنە ٥٠٠ کەسۍ تۆمار کریێنۍ

بۆزان ئانەش وست ڕووە، کە جە کوردسانەنە بە تایبەتی پۆلیس و جەندرمە پېسە دەنگدەری تۆمار کریا و واتش، "جە بڕۍ یاگێنە ٥٠٠ و بڕۍ یاگێچەنە هەزار کەسۍ تۆمار کریێنۍ؛ نمونەی ئاشکراو ئانەی مەنتیقەو باژارگەو جۆلەمێرگین. کۆو دەنگدەراش یەرۍ هەزارۍ و ٥٠٠ کەسێن، بەڵام هەزار و ٧٠٠ سەروازۍ و پۆلیسۍ پېسە دەنگدەری جە ناموونیشانێوەنە تۆمار کریێنۍ.

جە ئاکدەنیزیچەنە هەمان فرتوو فێڵ بەکارمارا

بۆزان ویرش ئاردۆ جە ئاکدەنیزوو مێرسینیچەنە کە ماوێوە فرە جە تەرەفوو هەدەپەیۆ بریان ڕاوە، ۋەرووئانەی مزانا کە دەم پارتی سەرگنۆ دەسشا بە تۆمارکەردەی دەنگدەری وەهمی کەردەن. بۆزان واتش، "جیاواز جە کوردسانی، چێگە فرە بێباکانەتەر جمێوە. سەرۆک شارەوانی ئیسەو شارەوانی ئاکدەنیزی مستەفا گوڵتاکی ئاکەپەیی چنی پەنج ئەنداما خێزانەکەیش کە جە مەنتیقەو یەنیشەهیروو مێرسینینە ئەرەنیشتێنۍ، بەڵام پېسە ئانەی چنی ٢٨ کەسا تەری جە یانێوەنە مژیوا نامۍ ۋێشا تۆمار کەردەن. نەک هەر ئاڎ بەڵکم یاگەگیروو سەرۆک شارەوانی، ڕاوەبەروو نوسینگەو تایبەتوو شارەوانی ئاکدەنیزی و هەشت ڕاوەبەرۍ، بنەیانەکێشا جە مەنتیقە جیاجیاکاو مێرسینیوە فاڕێنێوە پۍ ئاکدەنیزی. ئانەی ئاکەپە کەرۊش زەوتکەردەی ئیراڎەو کوردان جە ڕاو قەیومیوە. ئارۊنە جە گرڎوو شارەکا کوردسانینە تۆماری وەهمی دەنگدەرا ساز کەرا. جە مەنتیقەکا ئامەد، جۆلەمێرگ، شڕنەخ، بەدلیس، ئاگری، قەرس، موشی و ئیدرینە و متاویۆ وچیۆ کە جە گرڎوو مەنتیقەکانە تۆماری وەهمی دەنگدەراشا وەشکەردەن ".

ڕا مەڎەیمۍ ئیرادەما زەوت کەرا

بۆزان ئاماژەش پانەیچ کەرد، کە ئاڎۍ شۊنیرە لوایشا کەردەن و ئا تۆمارە وەهمیێشا دەسنیشان کەردێنۍ و تەرەفی پەیوەندیدارشا ئاگاڎار کەردەنۆ و جەختیچش کەردۆ دەسەڵات چێش کەرۆ با کەرۆ، بەڵام پارتەکەشا سەرجەنۆ شارەوانیەکا بەدەسمارۊوە. بۆزان واتش، " یۆ بەیۆ ئا تۆمارە وەهمیێشا جە مەنتیقەکانە دەسنیشان کەردێنۍ و تەعنشا ۋنە دێنۍ. دەسەو هۊرچنیەو مەنتیقەکا تەعنەکێشا ڕەڎ کەردێنێوە. ئیسەیچ ناوەنڎوو گرڎیی پارتیما سەردای دەسەو باڵاو هۊرچنیەی کەرۆ. مەزانمۍ دەسەو باڵاو هۊرچنیەکا چ قەرارێوە مڎۆ. داخەم مەشۆ دەسەو باڵاو هۊرچنیەکایچ فاڕیان پۍ ئەرەمەرزیېوە دەوڵەتی و بە ئەمرەو ئەردۆغانی جمۊوە و قەیومش پۍ نریانەرە. ئاکەپە وەڵتەر بە قەیوم دەسش سەروو ئیراڎەو کوردارە گێرت و ئیسەیچ گەرەکشا جە ڕاو دەنگدەری وەهمیۆ ئیراڎەو کوردا زەوت کەرۆ، بەڵام ڕا پانەی مەڎەیمۍ. ئانەی کە مشۊم کەرمێش ئانەنە کە جە ۋەران ۋەروو هەر دەنگدەرێوە هاوردەی و وەهمینە ئێمە دووۍ دەنگۍ دەم پارتی زیاڎ کەرمۍ. جە ۋەران ۋەروو فرت و فێڵ و گزیەکا ئاڎیشانە ئێمە سەرجەنۆ شارەوانیەکا بەدەسبارمېوە. ئا شارەوانیۍ جارێوەتەر جە تەرەفوو دەم پارتیوە ڕاوەبەر کریاوە".