دەسەو باڵاو دادوەریی ورچنیەیەکاو عێراقی، ٦و ئابوو ٢٠٢٤ینە بە قەرارێوە قەدەغەکەردەی پارتەکاو پادێ، تەڤگەروو ئازادی و پاارتوو بەرەو کۆشیای دیموکراسییش ئەرەیاونا، وەراوەروو قەرارەکەینە ناڕەزایەتییەکێ بەردەوامێنێ.

 چوارچوەو ناڕەزایەتییەکانە ئیدارەو وێڕاوەبەریی شەنگالی، پەی پەشتگیریی وەنەو پادێ پەی ماوەو ٣ڕوا خێمێشا وردا و چالاکییەکێ ڕۆی دووەمنە بەردەوامێنێ، چالاکییەکەنە چندین کەسێ و ئەرەمەرزیێ وێڕاوەبەریی شەنگالی بەشدارێنێ.

'وستەیرەی پادێ دەرەنجاموو سەردایەکەو ئەردۆغانی بێ پەی عێراقی'

چا بارەوە ئەنداموو کوردیناسیۆنوو تاژێ  نەعیم بەدەل پەی ئاژانسیما واتش: ساڵەو ٢٠١٥یوە پادێ بەشدارییش جە یەرێ خولا  هورچنییەی ئەنجوومەنوو پارێزگاکانە و پەرلەمانەنە بییەن ،پادێ نوێنەرایەتیی ئیرادەی سیاسیما مکەرۆ،پەوکای گرد کەسێ مزانۆ سەبەەبوو وستەیرەی پادێ سیاسییا، ئینەیچ دەرەنجاموو سەرەدایەکەو ئەردۆغانی بێ پەی عێراقی.

نەعیم بەدەل ئاماژەیچشپانەیە دا ئی سیاسەتە دەرەنجامو فشارەکاو دەوڵەتوو تورکین،کە دماتەرنە زەرەر بە عێراقی میاونۆ و واتش:" پێسەو گەلو ئێزدی هیچ وەختێ دژێ دەوڵەتوو عێراقی نەبیێنمێ، وەلێ دژوو ئی سیاسەتە غەڵەتاو عێراقینمێ دەر‌ەق بە گەلوو ئێزدی."

'پادێ پارتێوی دیموکراتیکا'

حەر جە چالاکییەکەیچەنە یاگەداروو هامسەرۆکوو دەسەو وێڕاوەبەریی شەنگالی دەخیل ئیبراهیم پەی ئاژانسەکەیما قسێش کەردێ و واتش:" پادێ پێسەو نامەکێ وێش پارتێوی دیموکراتیکەن و پا تایبەتمەندییچۆ شەنگالەنە ئشناسیان. گردوو پێکئامایەکاو شەنگالێش گێرتێنێ وێ،پەوکای ڕۆشنا بە قەراریوە سیاسیی عێراقی ناچار کریان قەراروو وستەیرەی پادێ بدۆ."

'قەرارەکە ئەرەبڕیا نییەن جە فەرمانەو ٢٠١٤و سەروو شەنگالی'

حەر دلێ قسەکاشەنە دەخیل ئیبراهیم داواو پەشتگیرییش پەی پادێ کەردە و واتش:" با عێراق چیت قەرارەیە پەشیمان بۆوە و چونکوم قەرارێوەن دژوو گەلێوە و پارتێوە و سیاسین و ئەرەبڕیا نییەن جە فەرمانەو ساڵەو ٢٠١٤و سەروو شەنگالی."