چالایانە: گۆشەگیری ئیمراڵینە جە وەڵاتەکەنە بییەن بە سیستم
جانان چالایانە، هامقسەکەرەو پارتوو چەپی سەوز ئەرەیاوناش، "ئا گۆشەگیرییە کە ئیمرالینە دەسش پەنە کەرد گرڎوو زینڎانەکانە وەڵا بییۆ، چی وەڵاتەنە فاڕیان پەی سیستمی".
جانان چالایانە، هامقسەکەرەو پارتوو چەپی سەوزی، کۆنگرێوە ڕۆنامەوانیینە، بارەگای گرڎینوو هەدەپەینە، بابەتە گرنگەکاو ڕۆیش ورسەنگنێ.
گۆشەگیریی ئیمڕاڵی
چالایانە واتش، گۆشەگیری ئیمراڵینە گرڎوو قەیرانەکاش قووڵتەرێ کەرڎێنێوە و واتش: "پێسە وەڵێوە واتما، بناغەو ئی قەیرانە فرەلایەنەینە، سیاسەتوو جەنگی و تندوتیژی و گۆشەگیری هەن. ئا گۆشەگیرییە کە ئیمراڵییوە دەسش پەنە کەرد و چایچۆ گرڎوو زینڎانەکارە وەڵا بییۆ، چی وەڵاتەنە فاڕیا پەی ڕژێمێوە. زینڎانیێ سیاسیێ سەرباروو ئانەیە سزاکێشا دماییشا ئامان، بەنایاسایی زینڎانەکانە ئازیێنێوە و ئازادێ مەکریا. گرڎ ڕوێ پاشێلکاریێوە تازەو مافەکا زینڎانەکانە زیاد کریۆ و هجووم پەی سەروو زینڎانەکا بەتیژی بەرڎەواما. بێگومان سیاسەتوو گۆشەگیری تەنیا زینڎانەکانە پەیڕەو مەکریۆ، بەڵکوم هاموەخت جبەریچۆ، میکانیزموو فشاری بەرڎەواما.
واتیچش: "ئەڎایا و شەممەی و ئەڎایاو ئاشتی، کە ئارۆ کۆشیاێوە شکۆمەندانە کەرا، لاو دەسەڵاتیوە کریا ئامانج. ئەڎایاو شەممەی کە گرڎ شەممێوە مەیڎانوو گالاتاساراینە وەنەو چارەنویسوو بێسەروشۆنکریایاشا پەرسا، کەلەپچە کریا و ئەشکەنجە دریا. جۆلەمێرگیچنە هەڵای ئەڎایاو ئاشتی دەسبەسەرێنێ. ماچمێ: کۆشیای ڕەوا و شکۆمەندانەو ئەڎایاو شەممەی، کە واز جە پرسیارکەرڎەی جە چارەنویسوو بێسەروشۆنکریایاشا نمارا و ئەڎایاو ئاشتی، کە سەرباروو گرڎ نۆعە فشار و سیاسەتێوە ستەمکەرڎەی جە واتەی ئاشتی مەمرڎا، کۆشیای ئێمەیچا. تا ئا وەختە چارەنویسوو بێسەروشۆنکریایا ئاشکرا بۆ و بکەرێ و تاوانبارێ داڎگایی کریا، هەنگامێوە جە کۆشیایما بەرەو دما مەگێڵمێوە. پێوەرە ئاشتیێوە شکۆمەندانە پەی ئی وەڵاتەیە دەسەبەر کەرمێ".
کۆبییەیۆکا چەنی ژەنا
چالایانە ئاماژەش پەی ئانەیچە کەرد، "پێسە ئەنجوومەنوو ژەناو هەدەپەی، جە گرڎوو شار و شارۆچکەکانە کۆبییەیۆ ژەناما کەرڎەن. پەی فراوانکەرڎەی ڕێکوستەی و بییەی و پاڵپەشتیی ژەنا، قسەوباسی گرنگما کەرڎەن بارەو ئانەیۆ کام شێواز و ڕێبا گێرمێرە وەر. بەکریاوەیی، کەموکوڵییەکاو ماوەی وەڵینیما بە میکانیزموو ڕەخنەی و ڕەخنەدای ورسەنگنێ و باسما جە چارەسەرکەرڎەیشا کەرد. سەروو بنەماو ڕەخنە و وەڵینیازەکاو گرڎوو ئی کۆبییەیوا، کۆڕبەندی ناوەندیما بە ناموونیشانوو 'ڕاو یەرەمی و ژەنا' و 'میکانیزموو ئێمە پەی ڕێکوستەی ژەنا' کەرد. پا ورسەنگنای و وەڵێنیازا گرڎوو ئا کۆبییەیوانە وزیێ ڕووە، بە مۆڕاڵ و پاڵنەرێوە گەورەوە کۆنفرانسوو ناوەندوو ژەنان ساز کەرمێ.
هامقسەکەورەو پارتوو چەپی سەوزی ئاخریچۆ واتش: چا چوارچوەنە بەینوو ٢٠ پەی٣٠ی ئابینە جە سەرجەموو شارەکانە کۆبییەیۆی قەوەت پەی ئامادەکاریی کۆنفرانسەکەی کەرمێ. دمایی جە کۆنفرانسوو گەورەو ژنانە، کە قەرارا ڕوەکاو ٨-٩و ئەیلوولینە بلۆ ڕاوە، پێوە خەتەو کۆشیایما سەرڎەمی تازەنە دیارییە کەرمێ.
س.ز
