ئاکەپە و لایەنگیرەکێش جە ڕاو چەتەکاشاوە کوردساننە بە زوڵم و زۊر دەوڵەتشا وەش کەرڎەن، هجوومۍ کەرا سەروو ڕۊنامەوانا و خەڵکی و موڵک و سامانوو خەڵکی و مڎاش بە لایەنگێراشا. 

سەرۊکوو شارەوانیی تاتوانی ئەمین گەیلانی، کە سەر بە ئاکەپەین چەنی ڕاوەبەراو ئاکەپەی مڵکە هەمیشەییەکاو شارەوانیشا بەنایاسایی ورەتێنۍ بە لایەنگێرەکاشا. ئینجا جە ڕاو  پاسەوانە چەکڎارەکاشاوە پەلامارەو ڕۊنامەوان سینان ئایغڵویشا دا، کە گەندەڵیی ئاڎیشاش ئاشکرا کەرڎەبۍ. ڕۊنامەوان ئایغڵو کە بەسەختی برینڎار بییەن، دماتەر فاڕیاوە پەی خەسەخانەی، پاسواناو سەرۊکوو شارەوانی هەڕەشۍ کوشتەیشا وەنە کەرڎەبۍ.

بۊنەو گەندەڵیوە ئەمین گەیلانی، کە سەرچەتە و مافیان، ئەنجوومەنەکاو شارەوانی جە حزبەکەو وێچشنە ناچارۍ بیۍ دەس جە هەرمانۍ کێشاوە. جەزمی تاشدەمیر و نەدیم باڵکنی سەر بە ئاکەپەی ئەنداماو شارەوانیی تاوانی بێنۍ، دەسشا جە ئاکەپەی کێشتۊ.

سەرباروو ئانەیە موراڎ ئەرەن سەرۊکوو لەقوو گەنجاو ئاکەپەی تاتوانننە شارەوانینە دەوام مەکەرۊ، وەلۍ مافیایاو  گەیلانی گرد مانگێوە بەڕێکوپێکی مووچەشا مدا.

یۊ جە گەندەڵییەکاو گەیلانی ئانەنە، کە لایەنگێراو وێش شارەوانیینە ئەرەمەرزنێنۍ. جە کۊو هەر پەنج کارمەنڎە لکەبەسا کە شارەوانیینە ئەرەمەرزیێنۍ، یەرێشا کەسوکاروو سیاسەتمەڎاراو ئاکەپەینۍ.

هەرپاسە ٥٠ کارمەندێچ کە جە تەموزوو ٢٠٢١ جە ڕاو ئیشکوریوە شارەوانیینە دەسبەکارۍ بیێنۍ قەومۍ نزیکوو سەرۊکوو شارەوانی و ئەنداماو ئەنجوومەنوو شارەوانی بێنۍ.

س.ز