سینان چیفتیورەک، پەرلەمانتاروو پارتوو چەپی سەوزی بازنەو وانینە،١وو ئەیلوولی ڕۊو جیهانیی ئاشتینە، جە چەمپەنەکەوتەێوەنە چەنی ئاژانسوو فورات (ANF)ی گۊشەگیریی سەروو ڕابەروو گەلوو کوردیش ورسەنگنا، عەبدوڵڵا ئۊجەلان و ئەنجامدای ئەشکەنجەیش زیندانەکانە باس کەرد.

چیفتیورەک ئەوەڵۊ خێرامای ڕۊو جیهانیی ئاشتییش کەرد و واتش: "با ١وو ئەیلوولی بۊ بە ساڵەو ئاشتی پەی خەڵکوو کوردستانی، کە ١٥٠ ساڵێن تامەزرۊو ئاشتی و سەقامگیرینۍ و نەتاوانشا وێشا چا جەنگی نەجات بدا.".

ئا پەرلەمانتارەو پارتوو چەپی سەوزی بارەو مەرڎەی شاکیر تورانی، زیندانیی نەوەشی ٧٠ ساڵەیۊ واتش: "بە نایاسایی و ناوەرپەرسانە مەرڎەن، وەختێوەیچ جەنازەکەش ئامیاوە پەی دەگێکێش جە دەروازەو لوایچوەروو شاروو ئامەدینە چندین سەعاتۍ ڕاشا وەنەو ئارڎەیۊش گێرتە، ئەشکەنجەیچ سەروومەرڎەکاوە میاونا یاگۍ، ئی تەرزە هەرمانۍ ئینۍ بەرنامەو هەرمانێمانە و قۊناغوو ئایندەینە سەرشاوە مردمۍ.".

' ئیمراڵی-ینە یاسێکۍ دلێنە بریا'

چیفتیورەکە سەرنجەش پەی سەروو گۊشەگیریی ڕەهاو سەروو ڕابەروو گەلوو کوردی، عەبدوڵڵا ئۊجالانی کێشتە و واتش: ئانە ٤ ساڵێن ڕا بە بەڕێز عەبدوڵڵا ئۊجالانی مەدریۊ، کە چەنی بنەیانەی و پارێزنەرەکاش دیدار کەرۊ. زیندانوو ئیمراڵی پەی وێش گۊشەگیریین و ساڵانێوەن گۊشەگیری دلۍ گۊشەگیریینە سەپنییۊ.

ڕوونیچش کەرڎۊ، "بە پاو یاسۍ هامشێوەو گردوو ئا کەسا سزا دریێنۍ یان زیندان کریێنۍ، مشۊم بەڕێز ئۊجالانیچ بتاوۊ چەمش بە بنەیانەی  و پارێزنەراش گنۊ. حوکمەت یاساکا پاشێل کەرۊ. هەراسانکەرڎەی و تەنگپەنەورچنییەی بە گلێرگەی جە ڕاو گۊشەگیرکەرڎەی بەڕێز عەبدوڵڵا ئۊجالانیوە، حیچ ئیسفادێوەش پەی کەسی نییا. داوا وەنەو حکومەتی کەرمۍ دمایی پی سیاسەتەیە بارۊ. گۊشەگیری لایەنی یاسایی، سیاسی و ئینسانییش هەن، گۊشەگیری دلێنەبەرڎەی یاسێن.

ئا پەرلەمانتارەو پارتوو چەپی سەوزی واتیچش، "بەڕێز عەبدوڵڵا ئۊجالان ٢٤ ساڵێن ئینا زینداننە و ڕاوەنەگێرتەی جە جەمپەنەکەوتەی چەنی بنەیانەکەیش مامەڵێوە نائینسانانەن، مشۊم قۊرتەکاو وەرڎەموو مافوو ئینسانینە لا بریا، جە ڕووەی سیاسییەوە عەبدوڵڵا ئۊجالان زیندانیێوە ئاسایی نییا، کاراکتەرێوە سیاسیین، کە ملوێنان کەسۍ سەرسامێنۍ بە ئەندێشەکاش، ملا شۊنیشارە و ورشا سەنگنا".

'مشۊم عەبدوڵڵا ئۊجالان بتاوۊ ئەندێشەکاش ڕاستەوخۊ بە ڕای گردینی و پارتەکەیش بیاونۊ '

چیفتیورەک ئانەیچش وست ڕووە، سەروو زیندانوو ئەدیرنەیش دان و چەنی سەلاحەدین دەمیرتاشی، هامسەرۊکی وەڵینتەروو هەدەپەی و سەلچوک مزراکلی، هامسەرۊکوو شارەوانیی ئامەدی دیدارش کەرڎەن و واتش: "چا دیدارەنە هەردویشا جەختشا چانەیە کەرڎەنۊ مشۊم دمایی بۍ بە گۊشەگیرکەرڎەی عەبدوڵڵا ئۊجالانی.  واتیچشا 'بە ورگێرتەی گۊشەگیری، متاویۊ دمایی پا چەقبەستەییە بۍ سیاسەتنە، وەروو ئانەیە جەنگ دماییش بۍ و بەرەو ئاشتی کریۊوە، مشۊم دمایی بە گۊشەگیری ئیمرالینە باریۊ. مشۊم بتاوۊ ڕوانە ئەندێشە، ئرمانای و تەسوەرەکاش چەنی خەڵکی و پارتەکەیش هامبەشی پەنە کەرۊ. گۊشەگیری بە حیچ نۊعێوە قبووڵ  مەکریۊ و مشۊم دماییش بۍ.، جە ورچنییە دلێیەکاو ساڵەو ٢٠١٩ینە بارەو بەڕێز عەبدوڵڵا ئۊجالانیوە دەنگۍ و واتەواتۍ سازۍ کریۍ و نامێوەیچ ئاما.  بە واتەی ئانەیە 'عەبدوڵڵا ئۊجالان ئینەیە و ئانەیە مواچۊ'. قسۍ وەڵۍ بییوە، ئیساتێچ بە پاو ژنییەیەکاما، پلانە پەی قسە چانیشا هەنە، وەلۍ جاتیی  ئانەیە ئی هەرمانۍ کەرمۍ، داوا وەنەو حوکمەتی کەرمۍ کە دەمودەس دمایی بە گۊشەگیری بارۊ، ڕا بە عەبدوڵڵا ئۊجالانی بدۊ ئەندێشەکاش بیاونۊ بە ڕای گردینی. ئینەیچە هەناسێوە کەرۊوە سینەو تورکیایرە و ئینا مسڵەحەتوو ئی وەڵاتینە. بۊنەو ١وو ئەیلوولیوە کە ڕۊو جیهانیی ئاشتیین، داوا وەنەو حوکمەتی کەرمۍ کە ئا گۊشەگیرییە دمایی پەنە بارۊ ".

س.ز