ئەنڎامەو دەسەی ڕاوەبەری کەژاری چیمەن شینە بۊنەو یۋەمین ساڵوەگېڵ و سەرهۊردای "ژەنی، ژیای، ئازاڎیی"وە قسېش پۍ ئاژانسوو هەواڵی فورات(ANF)ی کەرڎۍ.

چیمەن شینە ۋاتش،"نەخشەڕاو ئاخېزوو ژەنۍ کە جە ۋەرکەوتوو کورڎسانی و ئېرانینە پېکئاما، ئیسە تەماموو جەهانیرە ۋەڵابیەنۊ. خەتەو"ژەنی، ژیای، ئازاڎیی"شەپۊلېوە ئاخېزین کە مقارەنە بە ۋەڵتەری فرە زیاتەر بیەن. ژەنی ۋەرکەوتوو کورڎسانی و ئېرانی، تامەزرۊو ئازاڎیینۍ. ژەنۍ ئېرانی و ۋەرکەوتوو کورڎسانی ژیۋایۍ تازەی پەڕ جە هیواو ۋېشا بە گرڎ چېوۍ، بەقژۍ، ۋنی،ئاواز، سەما، خەتەو چالاکی دیموکراتیکی، بە سەرهۊرداو ۋېشا، ساڵېوەشا ۋیەرنا. جە ١٦ و ئەیلوول و ٢٠٢٢ بەدماوە ئانۍ پەی ئازاڎیی و دیموکراسی گەشمەرڎۍ بیۍ، گەشمەرڎا"ژەنی، ژیای، ئازاڎیی" بە ڕېز و وەشەویسیۊ سڵامشا ۋنەکەروو، وەعدوو سەروستەی ئېرانېوە دیموکراتیکی کورڎسانېوە ئازاڎیی واوەی کەرمېوە".

چیمەنە باسش چانەی کەرڎ کە هەڵمەتەو"ژەنی، ژیای، ئازاڎیی" فاڕیان پۍ ئاخېزوو ژەنۍ و ۋاتش،"ئارۊیچ وەردەواما. ئاخېزېوە کە ژەنی و گەنجۍ سەرمەشقیش پۍ کەرېنۍ چی خاکەنە عەلەمەو ئازاڎییشا بە ناڕەزایی، سەرهۊردای و قوربانی دای گرڎ ڕووۍ بە شۊکیایی ڕاگېرتېنە. خاکوو ۋەرکەوتوو کورڎسانی و ئېرانی بە نەریتی تاریخی و کولتوروو مدرامانی کۊمەڵایەتی دژ بە سیستمی ناوەنڎی و سیستمی دۊڵەتی، ۋەردەوام سەرمەشقیش پۍ سەرهۊردای کەرڎەن.

مدرامانوو ژەنا و گەلا ئېرانی بەگۊرەیی ۋېش پېسە ئاخېزېوە بەسەرمەشقی ژەنا، بە کارەکتەری ژەنا کۊتەن ڕۊژەڤ و تەماموو جەهانی. جە ماوەو ساڵېوەنە پۍ بە ڕېکوستەی ئا ئاخېزیە بە سەرمەشقی ژەنا فرە بەهۍ خوڵقیېنۍ.

جە درېژەو قسەکاشەنە چیمەنە باسش چانەی کەرڎ کە بەتایبەتی چی ساڵا دماییەینە جە ئېران قۊرتە و پەرسە کۊمەڵایەتیەکا یاۋېنۍ بە بەرزتەرین ئاست و ئەرەیاۋناش،" جە ۋەرکەوتوو کورڎسانی و ئېرانی جە دژوو قەیرانی ئابوری، فشاری سیاسی، کۊکوشی ژەنا، جە قەنارەدای، ئەشکەنجە جە زینڎانەکانە، قۊرتە کۊمەڵایەتیەکۍ، قڕکەرڎەی ژیۋگەی، کوشتەی کۊڵبەرا، بە مەرگ جواب دایۊ  ئازاڎیی کۊمەڵایەتی، یاسا و حیجابی زۊرەملۍ و جە دژوو فرەو کرڎەوای تەری پېسە ڕەگەزپەرسی، ئاین پەرسی و فاشیستی بە هەزاران سەرهۊردۍ ئامېنۍ ئاراوە".

"وەختوو ئانەی ئامان کە بە قوەتوو قۊڵ هورماڵای گنمۍ ۋېما"

چیمەن شینە ئەرەیاۋناش،"کە سەرهۊردای ١٦ و ئەیلول و ٢٠٢٢ کە دما بەدماو کوشتەی کناچۍ کورڎی بەنامۍ ژینا ئەمینیۍ سەروو دەس و  بەنامۍ پۊلیسی ئەخلاقی(گېڵای ئیرشاد)ی دەسش پنەکەرڎ، پېسە پارچېوە جە ئەتۊمی شەپۊل شەپۊل کەشېوە ئاخېزیش خوڵقنا، ئانەیچش دەسنیشان کەرڎ، کە جە قۊناغەو سەرهۊرداکەینە جە نەریتوو مدرامانی ئېرانی و ۋەرکەوتوو کورڎسانینە هەنگامېوە تازېش ئارڎە ئاراوە".

چیمەن شینە ۋاتش،" جە هەمان وەختەنە دلۍ جمیەرە ئازاڎیوازەکا ژەنانە جە سەران سەروو جەهانینە هەستېوە یۊگېرتەی و ڕۊحېوە تازەو هامکاریش خوڵقنا، ئینەیچ مەڵامەتوو وەش بیەی هەستېوە هامبەشی گۊرەبۍ جە ئشناسنامەو ژەنانە. گرڎوو هەرمانەکا سەروو بنەماو فەلسەفەو"ژەنی، ژیای، ئازاڎیی" ڕېکوزیۍ. سەڎەو ٢١ی بی بە سەڎەو ژەنا ئامانج و خەتەو سەرهۊردایش دیاری کەرڎوو نەخشناش. ئینسان متاوۊ واچۊ، جە چوارچېوەو نەخشەڕاو ئازاڎیی"ژەنی، ژیای، ئازاڎیی"نە گەل و ژەنا ئېرانی قۊناغېوە تازۍ دیموکراتیک بیەیشا دەسپنەکەرڎ. ئیسە وەختو ئانەی ئامان کە قۊڵۍ هۊرماڵمۍ و گنمۍ وۍ. وەختوو ئانەی ئامان کە نەتەوەی دیمووکراتیکی بنیاڎ بنریۊ".

چیمەنە باسش چانەیچ کەرڎ، زیاتەر جە گردوو قۊناغەکا وەڵتەروو تاریخ و ئېرانی، جیاوازتەر جە جارانی سەرهۊردای ئیسەی بە ڕەنگەو ژەناوە چەخماخەو ئاخېزی تازەیش گیسنانەو ۋاتش، "متاوو واچوو چەخماخەو ئی ئاخېزیە یان شەپۊلەو ئی ئاخېزیە متاۋۊ ملۋېنان جە ئەڎابیەی تازەی بارۊنە ئاراوە، ئانا کۊکوشیېوە بیەن بە مەڵامەتوو بە ئاگا ئامایۊ گەلېوە، فکروو فەلسەفېوە بیەن بە ئامڕازوو سەردەمېوە تاریخی شۊڕشگېڵنانەی. قۊناغەو ساڵېوە دماو ١٦ و ئەیلول و ٢٠٢٢ متاویۊ  پی جۊرە هۊرسەنگنایش پۍ کریۊ".

"ژەنی بە وۍ بەڕېکوستەکەرڎەی ۋېشا پارېزنا"

چیمەن شینە، سوپاو ژەنا گەریلای ئازاڎییش بەهېزوو ئی فکرەیە نامۍ بەرڎ، کە ئارۊ چۊک بەپیای هەژموونگەرای مڎۊرە و ۋاتش،" ژەنا گەریلۍ یەژاستاری کە گرڎوو جەهانی ڕېز چی سوپا بېهامتۍ ژەنا گېرۊ، ڕاسی ئا ئەندېشەیە نیشانە مڎۊ".ژەنۍ ۋەرکەوتو کورڎسانی و ئېرانیچ بە عالی چی کاریگەریەو گەریلای یاۋېنېنە. ئینسان متاۋۊ کولتوروو مدرامانی و  هېزوو فکری گەریلای پېسە خاڵېوە هامبەشی هۊرسەنگنۊ. گرڎوو ئانیشا کە گەرەکشانە ئازاڎۍ با، پەیڕەو و ئی ئەندېشەیە کەرا، ئی گلېرۊبیەیچە جە ئامانجی ئازاڎینە دەسەبەر بۊ.

حەرپاسە ئا ئەندېشەی جە سەرنیشتوو کورڎسانی و تورکیا دەسش پنەکەرڎ، خۊتان ڕېکوستەی ژەنان، جە ئاخېزوو ژەنا ۋەرنیشتینە- سەرنیشتوو ۋەرکەوتوو سوریایچ خۊتان ڕاسیېوە پی جۊرەنە کە ژەنی بناغەی سەرەکییەنە. گرڎ ۋیناشا کە پاڕادایمی دیموکراتیک و ئیکۊلۊژی و ئازاڎیی پارېزی ژەنا ڕابەرئاپۊی بەشېۋېوە بەقوەت کۊت بواروو جا بەجېکەرڎەیۊ. ئی پاڕادایمە ئیسە پۍ خەڵک و ۋەرکەوتوو میامینی و جەهانی ڕېنسانسېوە گۊرەن. ئینسان متاۋۊ پی جۊرە پوختش کەرۊوە، ئارۊ بە هېزوو ئی ئایدۊلۊجیایە، جە گرد یاگۍ جەهانینە ئینسانەکۍ شۊنەو ئەفسوونی ئی ئەندېشەیە کۊتېنۍ. گرنگتەرین چېۋیچ ئانەن کە چېگەنە ئازاڎیی مۋینا، گوڕ بە کۊشیای مڎا. "ژەنی، ژیای، ئازاڎیی" پۍ ژەنا و گەلا جەهانی ئانەش بەرجەسەکەرڎەن، کە سەڎەو ٢١ی بە چ شېۋېوە بۊ. مدرامانوو ژەناو گەلا چی سەردەمەنە سەرکۊت".

"ئەندېشەو ڕابەر ئاپۊی بە گرڎ یاگېرە ۋەڵابۊوە"

سەبارەڎ بە ئازاڎیی ڕابەر ئاپۊی، چیمەن شینە ۋاتش،"ڕابەر ئاپۊ کە ماوەو ٢٥ ساڵان جە دوورگەو ئیمڕاڵینە زینڎانی کریان، ڕابەروو ئازاڎین پۍ گرڎوو گەلا و ژەنا، پۊکەی دژوارتەرکەرڎەو گۊشەگیریەکەی، یۊن جە پیلانە فرە چەپەڵەکا پیای هەژموونگەرای دژ بە ئازاڎیی. جە دژوو ئی هجومە چەپەڵەیە پۍ سەروو ئیراڎەو ژەنا و گەلا، مۋیندۍ جە چ ئاستېوەنە ژەنی و گەلا ئېرانی ئا گۊشەگیریە پوچ کەراوە".

ڕابەر ئاپۊ، بەهېزوو بنیاڎنیاو ئی ئەندېشەیە گۊشەگیریش ماڕا. ئا ئەندېشەی کە ئیسە گۊشەگیریش سەرەرە مسەپیۊ، ڕېنسانسېوە تازەو ۋەرکەوتوو میامینی و جەهانین. حەرپۊکەی گۊشەگیری سەروو ئی ئەندېشەیە تنتەر کریۊوە. ژەنی و گەل گۊشەگیریشا ماڕا. خووڵقنەروو ئی ئەندېشەیە گۊشەگیر مەکریۊ، پۍ چی؟ چونکی ئی هزروو  ئەندېشە شەپۊل شەپۊل بە گرڎوو کیشوەرەکارە ۋەڵا بیەنۊ. تۊموو ئاخېزوو"ژەنی، ژیای، ئازاڎیی" منریۊ. ئېمە متاومۍ بە ئاسانی واچمۍ کە مرۊڤایەتی ئیتر گۊشەگیری قبوڵ مەکەرۊ".