جە دەگایەکا سەر بەمەنتیقەو خیزانی بەدلیسی دماو قەڎەغەو ئاماو لوای جە مانگەکا تەمموزی و ئابینە، بڕیەیۊ درەختەکا ۋەردەواما. بە پاو زانیاریەکا، بەتایبەتی شەوانەنە دارەکا بڕاوە و ڕووانە ١٠ پۍ ١٥ گەڵابا زیاتەر دارۍ بڕاوەو بەراشا.

بەدلیس یۊن چا یاگا کە سەروازە ترکەکۍ بە ئاگایۊ دارېش چنە بڕاوە. بەدلیس و مەنتیقەکېش تا ساڵەکا نەوەی، کەش و دەشت و دۊڵەکېش پەڕ جە درەختۍ بېنۍ. بەڵام سەڎەنە ٩٠ و دارسانەکاش سۊتۍ یا بریېنۍ. دۊڵەتوو ترکی حەجگیز بەدلیسنە کاولکاری سروشتیش  نەمرڎنان، سەردەم و دەسەڵاتوو ئاکەپە- مەهەپەینە چالاکیەکۍ زیاڎشا کەرڎەن. سوپاو ترکی بەتایبەتی جە شاروو بەدلیسی و مەنتیقەکاشەنە جە ما بەینوو ساڵەکا ٢٠٢٠ی پۍ ٢٠٢٣ چېروو نامۍ ئۊپراسیۊنی سەروازینە، دەیان هەزار دۊنمۍ دارسانش سۊچنان و لا یەزالیچ ۋەردەواما.

جە بەدلیسەنە هەرېموو سەهی، حەرپاسە مېڎانەکۍ خیزانی و موتکی و تەتوانی فرە دۊڵەمەنڎېنۍ بە دارسانی. چا مەنتیقانە سوپاو ترکی ساڵانە چېروو نامۍ "ئاسایش"ینە ئاێر جە دارسانەکا ۋەر مڎۊ و دلېشانە بەرۊ. بەتایبەتی مېڎانوو دارسان و دۊرووبەروو قەرەقول و قەڵا کۊنەکا ئامانج و سەروازەکان. ۋەڵۍ گرڎ ئۊپراسیۊنۍ سەروازینە ئاێر جە دارسانەکا وەر دریۊ.

چی ئاخرانە، چنی ئەرەیاۋناو هەرېمی قەڎەغەکریای، جە مەنتیقەو خیزانی جە لاو سەروازوو جەردەوان و هامکارەکاشاوە دارۍ بڕیاوە. جە ٢ ۍ حوزەیرانینە جە فرېوە جە دەگایەکانە بەتایبەتی دەگاکۍ"حەرات، ئاکونوس، گۆڤان، لانیلان، خولەپور، کەکولان، سورەح، پێرتاوان، کوران و ئورەح ''جە خیزان و چنڎین دەگۍ تەرۍ، ئاماو لوای قەڎەغە کریابۍ. دماو ئەرەیاۋناو قەڎەغەکەی ، ئا مەنتیقەی کە نامېش دارسان و فیندیکلیکیی بۍ، جە ١٤ و تەموزینە پېسە هەرېموو ئاسایشی تایبەتی ئەرەیاۋیا. جە میانو ئۊپراسیۊنەکەینە دارسانەکۍ فندقی جە دەگاو خولەپوری بە شۊفڵ لا بریۍ، هەزاران درەختۍ پۍ ئۊپراسیۊنی سەروازی و وەشکەرڎەو ڕۍ دلېنە بریۍ.