پەرلەمانتارەو ئامەڎوو دەم پارتی عەدالەت کایا جە دیڎارێنە چنی ئاژانسوو هەواڵوو فوراتی باسش چانەی کەرد کە جە دۆزوو تەڵەکەبازانەو کۆبانێنە یاسا بیەیش نیا، پێودانگی یاسایی بیەیش نییا و ئانەش وست ڕووە، کە ۋینیا کوردەکۍ بە چ ئەقڵیەتێوە کۆلۆنیالیستی دادگایی کریۍ.

کایا باسش چانەی کەرد، دماو هۊرچنیەو ٣١و ئاداری چەمەڕاییۍ پا جۆرە وەش بی کە گوایە متاویۆ ئاساییبیەیۆ بۍ دی، گلېرگە متاوۆ هەناسێوەش ۋەرەرە بێوە و واتش، "ئێمە تەسەور کەرێنمۍ کە ئا سیاسەتۍ فشاری، ئۆپراسیۆنی بەردەوامۍ با، تەسەور کەرێنمۍ کە چا دۆسیەنە متاوا سزاو زینڎانی سەپنانە، هاموەخت پەی جارێوەیچ بۆ چەمەڕاییۍ یاسایی بۍ، بەڵام دیسان ۋێشا تێکنەڎا و فاڕاشا پەی دۆسیێوە حەقکەردەیۆ جە گەلو کوردی".

کۊشیای ۋەرا ۋەر بە تنووتیژی کۆلۆنیالیستی

کایا یاڎش ئاورڎۆ کە دلۍ هیچ ئاژێوەنە سەرە مەنامنارە، چۆک مەڎارە و واتش، "هەڤاڵەکێما تا دمایی پاڕێزنایشا جە بەها و کۊشیای کەرد. ۋەروو ئانەیچ سزای قورسەشا سەرەرە سەپیا. کۊشیای نە پەی ئێمە و نە پەی ئاڎیشا دمایش نمۍ. جە زینڎانەنە و جە بەرۆ کۊشیایما دژوو بێدادی، دژوو تنووتیژی کۆلۆنیالیستی بەردەوام بۆ".

عەدالەت کایا ئانەش وست ڕووە کە ئاکەپە هێزەکەیش جە دەس مڎۆ گەرەکشا جەهەپەیچ پەلکێشوو هەمان خەتەو مەهەپەی بکەرۆ و واتش، "سیاسەتوو نکۆڵی و ئەسڕیەیۆ ١٠٠ ساڵێن بەردەواما، کورد دیسان بە نەبیەی منریۆرە. تا کورد و دەم پارتی بە بەردەنگ و موخاتەب نەنریارە و قسۍ سەروو کێشەکا نەکریۆ مەتاویۆ باس جە قۆناغێوە ئاساییبیەیۆ بکریۆ. ئا هەڤاڵێما کە ئازاڎۍ کریۍ، دماو سزۍ ئازاڎۍ کریۍ. ۋەروو ئانەی ئینسان مەتاوۆ باس جە ئازاڎیێوە یان تەمامبیەو سزۍ بکەرۆ. ڕاو یاوای بە ئازاڎیی و دیموکراسی دژوارەنە. ئێمە پاگیرێنمۍ کە بە شێوۍ بەقوەتتەر چا ڕێنە هەنگام بنیەیمۍ. کۊشیایما بە بەقوەتی بەردەوام بۆ".