چەنی نزیکبییەیۊ ١٦و ئەیلوولی، ساڵیادوو کوشتەی ژینا ئەمینی-یۍ لاو هێزەکاو سەر بە دەوڵەتیوە، کە بییە بە چەخماخەو ئەرەپڕای "ژەنی، ژیوای، ئازاڎی" بە سەرمەشایەتیی ژەنا وەرکەوتوو کورڎسانی و ئێراننە، دۊخێوە تندی سەروازی سەروو شارەکاو وەرکەوتیرە سەپییان.
هاموەڵاتاو وەرکەوتوو کورستانی جە چینە جیاجیاکاو بە هەستیاریێوە تایبەتۊ وێشا پەی ڕووەکاو ئایندەی ئامادە کەرا.
چەنی بانگەوازی هامبەشوو بڕۍ جە حزبەکاو وەرکەوتوو کورڎسانی، پێسە پارتوو ژیوای ئازاڎوو کورڎسانی (پژاک)ی، پەی مانگێرتەی گردینی جە ساڵیادوو ئەرەپڕاکەینە، هاموەڵاتۍ و بەتایبەتی کاسبکارۍ و دووکاندارۍ وێشا پەی مانگێرتەی سەرتاسەری چا ڕووەنە ئامادە کەرا.
کاسبکارۍ جە شارە جیاجیاکاو وەرکەوتوو کورڎسانینە ئەرەیاونانشا، "هێزەکاو سەر بە دەوڵەتی هەڕەشێشا وەنەو بڕۍ کاسبکار، پاسەوانوو مۊڵەکا، سەرۊکوو سەندیکاکا و چالاکاناو بواروو ئابووری و بازرگانی کەرڎەن، کە مەبۊ بە حیچ نۊعۍ مانگێرتەی گردین بەرا ڕاوە. وەلۍ کاسبکارۍ و دوکاندارۍ بۍ گۊشدای پا هەڕەشا، بە وەرفراوانی وێشا پەی مانگێرتەی سەرتاسەری و وەرفراوانی ئامادە کەرا.
هەرپاسە جە چند بانگەوازێوەنە داوا وەنەو خەڵکی کریان، کە ڕۊو شەممەی کە ئێران پشووی ڕسمین و خەڵک ملۊ گەشت و سەیران، ئی جارە یانەنە نەلا جبەر و بەکۊمەڵ سەروو قەبرەو گەشمەرڎاو شۊڕشوو "ژەنی، ژیوای، ئازاڎی" بدا.
لێوە تەرۊ بنەیانەو گیانبەختکەرڎاو ئەرەپڕاکەی، سەرباروو ئانەیە ماوەو چند حەفتێوەن، کە لاو هێزەکاو ئیتلاعاتوو ڕژێمیوە چڕیا و هەڕەشێشا وەنە کریۊ و بڕێچشا گیریێنۍ، ئامادەکارییشا کەرڎەن تا قەبرەو گەشمەرڎاو سەرەورڎاکەی کەراوە سەر و یادشا کەراوە، ئا وەعدە کە دێنێشا پەنە ئەوەخوایش کەراوە.
وەراوەرنە هێزەکاو دەوڵەتی پەی بۊ ڕووبەڕووبییەیۊ و سەرکوتکەرڎەی ئازاڎیوازا، هەرپاسە ڕاگێریکەرڎەی وەنەو دەسپەنەکەرڎەیۊ وێنیشانەدای و لوای سەروو جادەو هاموەڵاتا، گردوو قوەیشا وستەن هەرمانە.
بە پاو ئا زانیارییا جە سەرجەموو شار و شارۊچکەکاو وەرکەوتوو کورڎسانیوە یاوێنۍ، ڕوە ویەرڎەکانە دۊخێوە تندی ئەمنی سەروو ئا شارارە سەپییان و دەوڵەت بە کیانای هێزێوە فرەی پەی شارەکا، حوکمەتێوە سەروازییش خوڵقنان.
بە قسۍ هاموەڵاتا، سەرجەموو مەیدان و شەقامەکانە و بەرەو لوایژوورۊ گردوو مۊڵ و بازاڕەکانە، بڕۍ فرۍ هێزۍ پاسەوانیی تایبەتی و سەروازێش نیێنێرە و هاموشۊو هاموەڵاتا کۊنترۊڵ کەرا.
بە قسۍ شایەتحاڵا، ئەو هێزۍ سەرباروو ئانەیە گرد نۊعە چەکێوەشا پەنەن، وەلۍ ڕادەبەدەر جە خەڵکی تەرسا و حیچ هێز و ئیرادێوەشا پەی ڕووبەڕووبییەیۊ خەڵکی ناڕازی نییا.
دمابەدماو سەرکوتی تندوو وێنیشانەدەرا و جە ساڵی ویەرڎەنە و مدرامانی بێهامتاو گەلی، فرەو هێزە سەرکوتکارەکا کەمشا کەرڎەن و ڕێزێنۍ، سەرەڕاو هەڕەشا و بەرکەرڎەی جە هەرمانۍ، دووروستەیوە و تەنانەت سزاڎایشا، فرە چا هێزا ئامادۍ نەبێنۍ درێژە بە هەرمانەکاشا بدا و سەرکوتوو خەڵکی کەرا.
ڕووەکاو ئایندەیچەنە، بۊنەو تەرسۍ و دووەدڵی و نەبییەی ئیرادەی و بێهیوایی هێزە سەرکوتکارەکاوە، تەسەور کریۊ بڕۍ فرەتەرۍ جە هێزەکا کە ئشناسیێنۍ بە "جاش"ا، یان بەکرێگیایە وێمانەکا، ورڕێزا و ئەرەبڕیارە جە ڕیزەکاشا وەرکەوتوو کورڎسانینە.
س.ز
