پارتوو دیموکراسی و یەکسانی گەلا (دەم پارتی) جە قەنارەدای چوار زینڎانیا سیاسی کوردی جە تەرەفوو دەوڵەتوو ئێرانیوە شەرمەزار کەرۆ و جەخت کەرۊوە چانەی، " کە سیاسەتوو دوژمنایەتی و کۊکوشی دژوو گەلوو کوردی بە دڵنیاییوە مەڕیۆ".
سەرسەعبوو ئارۊی چوار زینڎانیۍ سیاسیۍ کوردی بە نامەکا پژمان فاتحی، وەفا ئازەرباری، حسێن مەزڵومی و محەمەڎ فەرامەرزی جە زینڎانوو قزڵحساری کەرەجینە جە قەنارە دریۍ.
چا بارۆ پارتوو دیموکراسی و یەکسانی گەلا (دەم پارتی) توڕەیی و بێزاری ۋێش چا کردەوا دەوڵەتوو ئێرانی بەربڕیەن و بە تنی شەرمەزارش کەردەن، هاموەخت پەرسە و سەرەوەشیش ئاراسەو گەلوو کوردی کەردەن.
دەم پارتی ئەرەیاۋنانیچش، " ئی سیاسەتەو دوژمنایەتی و مەرگی و کۆکوشی دژوو گەلوو کوردی بەدڵنیاییوە دلېنەبریۆ"، ئاماژەش پانەیچ کەردەن، "ئا مرۆڤۍ کە کۊکوشکریێنۍ پۍ هەتا هەتاین جە وەڵینگەو کۊشیای ئازاڎیی گەلوو کوردینە نامێشا بە زینڎەیی مەنۊوە".
وەڵتەریچ دەم پارتی جە ڕاو هەژماروو ۋێشۆ جە تۆڕەو کۆمەڵایەتی ئیکسینە وەڵاش کەردەبۍ، "ئا ستەم و تنووتیژیەو دەوڵەتوو ئێرانی کە جە زینڎانەکانە ۋەران ۋەر بە زینڎانیا سیاسی و چالاکا مافوو مرۆڤی ئەنجامشا مڎۆ، قڕکەردەیۍ سیاسییا. دەوڵەتوو فاشیستی گەرەکشا بە کوشتەی کوردی دەنگوو ئازاڎیی کپ کەرۆ. ئی سیاسەتە چەپەڵە هەرەس مارۆ. ئانۍ کە ڕاو ئازاڎیشا گرتەنەوەر سەرۍ گنا".
