دماو ئاشکراکەردەی بڕیارەکاو دۆزو کۆبانێ، هامسەرۆکا پارتوو یەکسانی و دیموکراسیی گەلا (دەم پارتی) تولای حاتەم ئۆغۆللاریە و تونجەر باقرخان لوێ پەی زیندانی جۆرو F ی ئەدرنەی و سەردای هامسەرۆکی وەڵینوو پارتوو دیموکراتیکی گەلا (هەدەپە)ی سەڵاحەدین دەمیرتاشیا کەرد کە ٤٢ ساڵۍ سزاش سەرەرە سەپیێنە. دماو سەرداکەی بە بەشداری چنین کەسا وەروو دەموو زیندانەکەینە ئەرەیاونایێشا وەناوە و چا درووشمەو "زیندانیا سیاسی شکۆو ئێمەنێ" و "بژیوۆ مدرامانو زیندانیا" بەرزکریاوە.

تولای حاتەم ئۆغۆللاریە ئەرەیاوناش دۆزو کۆبانێ دۆزێوە پیلانگێڵنی و هەقەی سیاسییەنە، ئا کورد و سۆسیالیست و شۆڕشگێڵنە چەپا جە تورکیانە پاگیری جە چارەسەرو دیموکراتیکی پەرسو کوردی مکەرا و ئەرەکۆشای یۆگێرتەی دیموکراتیکی پارێزنا، سزای قورسەشا سەرەرە سەپیۆ.

حاتەم ئۆغۆلاریە ئەرەیاوناش ڕەوشو دەمیرتاشی خاسا و واتش: "سەڵاحەدین دەمیرتاش پێسەو جارانی، ئارۆیچ هەمان هەڵوێستو ورەش هەن. ئی قەرارە نەتاواش مسسقاڵێوە پاشەکشە بە هامڕاکا فیگەنۍ و سەڵاحەدینی بکەرۆ".

"کۆشیای هامبەشما بەردەوام بۆ"

حاتەم ئۆغۆللاریە ئەرەیاوناش دەمیرتاش سڵامو وەشەویسیش  پەی گرتیتا بێ، واتش: "ئاڎۍ فرە خاسێ بێنێ. مۆراڵێوە بەرزشا بێ. تا ماڕای ئاسنەکا دلێ و بەری و دیوارە سەردەکا، ئا دیوارێ پەی مەبەسی سیاسی دروسکریێنێ، ئەرەکۆشمی".

"شکسوو داعشی چن کەسێوەش هەراسانێ کەردێنێ"

دماتەر تونجەر باقرخان ئەرەیاوناش جە مدرامانوو کۆبانێنە، بە ئەرەکۆشای هامبەشو کورد و عەرەب و گەلا تورکیای دژوو داعشی، سەرکەوتێوە هامبەش بەدەست ئاما، واتش: "ئەشیێ ئی سەرکەوتەیە جە تورکیانە مبارەک  کریێ، بەڵام داخەم مەشۆ بی بە ئامرازوو دادگاییکەردەی. پاسە دیارا شكسوو داعشی چن کەسێوەش هەراسان کەردەن. ئازاڎیی ژەنا جە ۋەرکەوتوو دلێڕاسەینە چن کەسێوەش ناڕەحەت کەردەن. ئانۍ پەشتگیریشا جە گەلوو کۆبانێ کەرد، دادگایی کریێ و سزادریێ. وەڵێ گرد چێوێنە ماچمێ، دڎان پی قەرارەریرە مەنیەیمێ. کورد و زەحمەتکێشا و گەلا تورکیای، دڎان پی قەرارەیرە مەنیا".

باقرخان و حاتەم ئۆغۆللاریە پەی دیموکراتیکبیەو تورکیای پەیاموو کۊشیای هامبەشیشا تەئکید کەردۆ.

هامسەرۆکاو دەم پارتی جوابوو پرسیارەکا ڕۆنامەواناشا داوە.