دروشموو 'ژەنی، ژیوای، ئازاڎی' جاڎەکاو برۊکسلیش ژڵێونۍ
بۊنەو یوەمین ساڵیادوو شۊڕشوو 'ژەنی، ژیوای، ئازاڎی'یوە، شاروو برۊکسلوو پایتەختوو بەلجیکاینە، هەزاران کەسۍ ڕووەشا کەرڎە جاڎەکا و سڵامشا وەنەو ئا شۊڕشەیە کەرد.
شاروو برۊکسلینە بە سەرمەشقایەتیی حزب و ڕێکوزیایە کوردییەکا پێسە پەژاک، کەژار و تەژەکە- کوردی بەلجیکانە، ھەرپاسە ڕێکوزیاو ژەناو ئەفغانستانی، فێمینیستە دیموکراتەکۍ، ڕێکوزیا چەپگر و دژە سەرمایەدارییەکۍ ڕاپیماێوە کریا.
بەشداربیۍ ڕاپیمایەکەی مەیدانوو پلاس پولاترتینە کوۍ بیێوە و مەیدانەکەنە بە نامۍ حزب و ڕێکوزیایەکاوە وتارەکۍ بارەو گرنگیی شۊڕشیوە پێشکەشۍ کریۍ.
ئەرەیاوناکەینە بارەو کەژاری و پەژاک-ینە ئامان، "جه یوەمین ساڵیادوو شۊڕشوو ژینێنە سڵام و ڕێز ئاراستەو سەرجەموو مدرامانکەرا و بنەیانەو گەشمەرڎاو شۊڕشوو ژینۍ کەرمۍ و پاڵپەشتیی وێما پەی خەڵکی ئەوەخوای کەرمێوە. شۊڕشوو ژینۍ وەرکەوتوو کوردستانینە و ئێراننە کولتوورێوە مدرامانیش خوڵقنان، کە حەرگیز مەمرڎۊ. دروشموو 'ژەنی، ژیوای، ئازاڎی' وەرکەوتوو کوردستانیش ویەرنان و ئارۊ بییەن بە دروشمێوە جیهانی. ڕژێموو ئێرانی گەرەکشا بە کوشتەی، گێرتەی و تۊقنای گەلی، درێژە بە هەژموونوو وێش بدۊ مەنتێقەکەنە. حەرپاسە ئا دروشمە هاواروو خەڵکین ئێران و وەرکەوتوو کوردستانینە، کە ئیتر داواو شناسنامەی کولتووری و بییەی وێشا کەرا.".
بەشێوە تەروو ئەرەیاوناکەینە ئامان، "ڕژێموو پیاسالاری و شیعەی، کە بەتندی چێروو نامۍ ئاینینە گەرەکشا داواکارییەکاش ملوو خەڵکیرە سەپنۊ، دلۍ قەیرانی و قۊرتە جیددیاو دلێنە مژیوۊ. پەوکای جە گرد وەختێوە زیاتەر ئازاڎیوازۍ پێویسشا بە یۊگێرتەی، هامکاری و یەکڕیزی هەن. چونکوم ژەنی و گەنجۍ بناغەو گلێرگەینۍ. زیاتەر جە گرد وەختۍ ژەنی و گەنجۍ پێویسشا بە قەوەتکەردی یۊبییەی و یەکڕیزی هەن.
جەختیچ کریانۊ، "بێگومان حیچ دەسکەوتێوە بەبۍ قوربانیدای بەدەس نمۍ. یۊ جە دەسکەوتە حەرە گەورەکاو ئی شۊڕشەیە، وەشکەرڎەی ڕۊحوو یۊبییەی و یەکڕیزیی گەلان، کە زیاتەر دەوڵەتوو ئێرانیش وستەن دلۍ تەرسۍ و تۊقایۊ. پەوکای هەمیشە ئەگەروو ئانەیە هەن، سەرجەنۊ سەرەورڎای و کۊشیای گەلی وەرکەوتوو کوردستانی و ئێراننە سەرە ور بدۊوە. پێویسا گردلاێوە و سەرجەموو پێکئاما سیاسی و کۊمەڵایەتییەکا وێشا پەی ئانەیە ئامادە کەرا و پێسە مامەڵە چەنی ئا شۊڕشەیە کەرا".
ھاموەخت بە نامۍ ڕێکوزیایەکاو ژەناو ئەفغانستانیچۊ وتارۍ پێشکەش کریا، کە واتشا، "چا وەڵاتانە کە پیاسالاری و دەسەڵاتی پیۍ زاڵێنۍ و ئایین بە زۊر ملوو گلێرگەیرە سەپنییۊ، کوشتەی، گێرتەی و دەسدرێژیکەرڎەی سەروو ژەنا زیاتەرا. پەوکای ئێش و ئازاروو ژنێوە ئەفغانستاننە یان ئێران و کوردستاننە حەر یۊن".
ھاموەخت سەرجەموو پێکئاما و ئا ڕێکوزیایا جە ڕاپیماکەو یوەمین ساڵیادوو کوشتەی ژینا ئەمینی-ێنە بەشدارۍ بێنی، پەیام و وتاروو وێشا پێشکەش کەرد و داواو ئازاڎیی زیندانییە سیاسییاشا کەرڎە.
دواو وتارەکا سەدان کەسۍ کە مەیدانەکەنە کوۍ بیێبێنێوە، ڕاشا پیما و بە دروشموو 'ژەنی، ژیوای، ئازاڎی'یشا شەقامەکاو برۊکسلیشا ژڵێونۍ.
دماو راپیمایەکەی، زیاتەر جە ٥٠٠ کەسا، مەیدانوو گار دو میدی-ینە کوۍ بیێوە و گرووپوو مۊسێقایچ بە ئامێرەکاشا دروشموو "ژەنی، ژیوای، ئازاڎی"یوە گۊرایێشا واتۍ.
س.ز
