دەسەو گرڎیی پەڕلەمانی هەرمانەکێش مردنۍ
بە مەڵامەتو ئاژەو تەندرووسی سری سورەیا ئۆندەریوە، کە ئینا چېرو چەمڎاری پزیشكینە، دەسەو گرڎیی پەڕلەمانی پەی دووۍ ڕووا هەرمانەکېش مردنۍ.
ئەندامو شاندو ئیمراڵیی دەم پارتی، سری سورەیا ئۆندەر جە ١٥ و نیسانی بە مەڵامەتو سەکتەو دڵیوە ڕەوانەو خەسەخانەی کریا، هەڵای ئاژەو مەترسیش نە وېیەرنان. دکتۊرەکێش سەعات ١٢:٠٠ کۆنگرەی ڕۆنامەنوویسیشا بینا و ئەرەیاۋناشا تەرسی سەرو ژیۋای ئۆندەری مەنەن.
تێکشیەی ئاژەو تەندرووسی سری سورەیا ئۆندەری نیگەرانیش دلۍ گلېرگەو تورکیاینە وەشکەرڎەن. دەسەو گرڎی پەڕلەمانی بە مەڵامەتو نا هەمواری ئاژەو تەندرووسی سری سورەیا ئۆندەریوە پەی دوۍ ڕووا هەرمانەکێش مردنۍ. ئەرەیاۋېیا کۆمیسۆنیچ هەرمانەکا ۋێش مردنۆ.
هەرپاسە جەختکریانۆ جە هېزیۆن ئەردۆغان ٢ جارۍ پەیوەندیش بە پەروین بوڵدانێوە کەردەن و دەربارەو ئاژەو ئۆندەری پەرسانش، واتەنش "هەرچی پەنەوازا کەردێش".
باخچەلی تەلەفۆنش کەرڎ
سەرۆکو گرڎیی مەهەپەی دەوڵەت باخچەلی دەربارەو ئاژەو سری سورەیا ئۆندەری پەیوەندیش بە پەرلەمانتارەو دەم پارتی پەروین بوڵدانۍ و دکتۊرەکاوە کەرد. باخچەلی جە پەیوەندییەکەشەنە چنی پەروین بوڵدانۍ، هیواو خاسبیەیشۆ پەی ئۆندەری واست. وە جە پەیوەندییەکەشەنە چنی خەسەخانەکەی و دکتۊرەکا زانیاریش دەربارەو ئاژەو تەندرووسی ئۆندەری هۊرگېرت.
