کرېکارا میزۊپۊتامیای، سەرەڕاو ئیڎانەو شەرمەسار کەرڎەی هجومەکا سەروو دژەتیرۊری و کەنەکەی، داوا جە گرڎوو گەلوو کورڎی کەرا، ڕا نەڎا کورڎسانی گۊرە کریۊ بە قوربانی خانەواڎېوە، حەر دەسېوەیچ شەرمەسار کەرا، کە چنی دوژمنا کورڎی دەس تېکەڵ کەرا.
ڕېکوزیاو کرېکارا میزۊپۊتامیای، ئارۊ جە نۋیسینگەو ۋېشا جە شاروو سلېمانی، جە دژوو هجومەکا ١٨ و ئی مانگۍ دۊڵەتوو ترکی ئەرەگیری، پۍ سەروو فڕگەخانەو عەربەتۍ و نۋیسینگەو کەنەکەی جە شاروو هۊلېری، کۊنگرېوە ڕۊنامەوانیشا ساز کەرڎ.
فەخری ڕۊنی، ئەنڎاموو میزۊپۊتامیای ئەرەیاۋنېوەش ۋەناوەو چنەشەنە ئامابۍ، تاریخوو ١٠٠ ساڵ و دۆڵەتوو ترکی ئەرەگیری ئانەما پۍ بەروزۊ کە کارنامەو ئا دەوڵەتیە سەروو جینۊسایدی و قڕکەرڎەی کورڎا مەرزیانەرە، چی چن ساڵە دماییەینە بە هامکاری خیانەتکارا جە حەر یاگېنە کورڎېوە نیشتیمان پەروەر بیەبۊ ، تیرۊروو ترکی ئەرەگیریچ بیەیش بیەن، جە دماین پیلانگېڵیچەنە دەزگاو میتوو تورکیای بە هامکاری دەسوو خیانەتی دەنیز جەودەت بولبونشا گەشمەرڎەکەرڎ.
جە ئەرەیاۋناکەنە ئانەیچ ئامابۍ،" داوا جە گرڎوو ئا هېزا کەرمۍ کە ۋېشا بە نوېنەروو کورڎی مزانا بەتایبەتیچ پەدەکە و خانەواڎەو بارزانی کە تاریخوو سەڎ ساڵەو خەبات و گەلوو کورڎی نەکەرا قوربانەو مەسڵەحەتە کەسی و حیزبیەکاشا و دەسبەردارۍ دوژمنی با چونکی ئەگەر دەسوو خیانەتی نەبۊ حەجگیز دۊڵەتوو ترکی ئەرەگیری مەتاۋۊ پا جۊرە ۋەردەوام بۊ".
جە دما دمایی ئەرەیاۋناکەیچەنە ئامابۍ،"هجوم پۍ سەروو فڕگەخانەی کشتوکاڵی عەربەتۍ و تیرۊرکەرڎەی دەنیز جەودەت بولبونی هجوما پۍ سەروو تەماموو گەلوو کورڎی جە حەرچوارپارچەو کورڎسانی، حەرپۊکەی داوا جە گرڎوو هېزوو لایەنە سیاسیەکا و چین و توېژە جیاجیاکا و ڕۊشنۋیرا گەلوو کورڎی کەرمۍ ڕا نەڎا کورڎسانی گۊرە کریۊ بە قوربانی خانەواڎەی و حەر دەسېوە شەرمەسار کەرمۍ کە چنی دوژمنا تاریخوو گەلەکەیما دەس تېکەڵ کەرا".
