چنی نزیکبیەیۆ دووەم ساڵیاڎو شۆڕشو 'ژەنی، ژیۋای، ئازاڎیی' فشار و هەڵمەتەو گېرتەی هێزەکاو دۆڵەتو ئێرانی جە دژو خەڵکو ۋەرکۊتوو کورڎەسانی زیاتەر بیەن.

چا چوارچێوەنە ڕۆو ١١و ئەیلولی هێزەکاو دۆڵەتو ئێرانی بە بێ ئەمرەو دادوەری هۊرشا کوا سەرو یانەو بەرئاوەرو کورڎی رەزا عەلایی و دەسبەسەرشا کەرڎ.

لایەزال تا ئیساتۍ هیج هەواڵێوە جە بارەو چارەنویس و رەزا عەلاییوە ۋەردەس نییا و چارەنویسش نەزانیان.

رەزا عەلایی بەرئاوەر و فیلمسازو کوردین خەڵکو شارو بانەین جە ۋەرکۊتوو کورڎەسانی. تا ئیسە خاوەنو چڼین کوڵە فیلما و فیلمی درێژین. یۆ چا فیلمایچە بە نامۍ 'زەمینە پیسەکا' بەشداریش جە چن فێستیڤاڵێوە مېیاننەتەوەیینە کەرڎەن.

واتەواچو خانەو سینەماو ئێرانی، رەسوڵ سەدر ئەرەیاۋنابێش، کە جە دماو شۆڕشو 'ژەنی، ژیۋای، ئازاڎی'یۆ نزیکەو ٣٠٠ بەرئاوەرا و ئەکتەرا رووبەڕوو دادگای و بێبەشکەرڎەیشا جە مافەکاشا پېسە مافو هەرمانکەرڎەی بیێنێوە.