ناڕەزایی و هەڵوێسەکۍ جە دژوو تیرۆرکەرڎەی دووە ڕۆنامەنوویسۍ و ئەرەیاۋنای ئازاڎیی، گەشمەرڎە (گوڵستان تارۍ) و (هێرۆ بەهادین)ێوە بەردەواما، کە جە ٢٣ۍ مانگەی ۋییەرڎێنە، بە فڕۆکەی بێ فڕۆکەوان جە لایەنو دۆڵەتو ئەرەگیرو تورکیایۆ بە مەرام گیریۍ و تیرۆرۍ کریۍ.

 چی بارۆ کازم (تاکۆر زەردەشت)، تاتەو گەشمەرڎە هەڵمەت دێرەلوکی، پەی ئاژانسوو هەواڵوو فورات ی(ANF) قسێش کەرڎۍ و واتش: " دۆڵەتو ئەرەگیرو تورکی مەغز و فەقەرەو مازی کورڎی، کە میدیا و دەنگی ئازاڎا مکەرۆ مەرام، پەی ئانەی بێدەنگێما بکەرۆ، ئا کەسۍ بەڕاسی پەنەوازێنۍ پەی ئی گلێرگەیە کە قەڵەمبەدەسا ئەرەیاۋنای ئازاڎینۍ تیرۆرۍ مکەرۆ، بەڵام ئینۍ مەرڎەی ڕاسیۍ نیەنۍ، مەرڎەی ڕاسی ئا کاتەنە کە بێدەنگۍ بیمۍ ۋەرا ۋەر پا کردەوا، گەلوو کوردی مەغزش پەڕا جە ئێری ۋەرا ۋەر بە ئەرەگیرکاری، بەڵام دەسەڵاتی کورڎی بە جۆرێوەن کە نمازۆ گەل هەڵوێسی تامام نیشانە بڎۆ."

 ئاڎ سەبارەت بە دەزگاو پاراستنی و بەنام دژەتیرۆرو پەدەکەی و کردەوەکاش، پەیلوایش چامنە بۍ کە ئینە نەک هەر دەزگاو پارېزنای گەلی نییا، بەڵکم دژوو گەلەکەو ۋێچشا و واتش: "مشۆم گەل ۋەرا ۋەر بە (پەدەکە)ی هەڵوێس برمانا، نمەبۆ ڕا بڎریۆ پی جۆرە بانۍ بە چەمساغۍ دژمنی و هێڵۆو خیانەتی، پەیامم پەی گرڎ کەسۍ ئانەنە کە جە ۋەرا ۋەرو ئەرەگیرینە بێدەنگۍ نەبا و هەڵوێس برمانا."

 هەر سەبارەت پی مژاریە، ڕۆنامەنوویسەی ئازاڎە سنور ڕەحمانە واتش: "تیرۆرکەرڎەی ئی گەشمەرڎا دلۍ پانیشتوو کورڎەسانینە لکەدریاو ئاژەی سیاسییا و ماناو شکسو سی و یەرە ساڵەو حوکمڕانی کورڎییا، ئێمە دوۍ گەشمەرڎێما دێنۍ، بەڵام بە هەزاران ڕۆنامەنوویسۍ ئازاڎۍ جە شۆنەکێشانە بە گڕوتینێوە زیاتەرۆ بەردەوامۍ با و درێژە بە ڕا و ڕێبازیشا مڎریۆ."