ئەنداموو ئەنجوومەنوو پارتوو چەپی سەوزی سیاسەتمەداروو کوردی شەریف دورماز بارەو گۊشەگیریی سەروو ڕابەروو گەلی کوردی عەبدوڵڵا ئۊجالانیوە، قسێش پەی ئاژانسوو هەواڵوو فوراتی (ANF)ی کەرڎۍ.

دورماز واتش، کە حکومەت جە ڕاو گۊشەگیریی نایاسایی، گەندەڵی، نادادی، شکسی، ئاورایی و هەژارییوە وڵاتەکەنە، کێشۍ و بێهەرمانیش زیادۍ کەرڎێنۍ و واتش، "مافوو ناڕەزایەتی بەروستەی، کە سەرەتاییتەرین مافا جە دەستووری هەمیشەیینە پاشێل کرییۊ. تا ئینسانەکۍ نەتاوا بە ئازادانە ڕاو وێشا بەر وزا، وەروو ئانەی داواو یەکسانی نەکەرا، تا تەرسی و دوژمنایەتی و دووەبەرەکی وزۊ دلۍ وەڵاتیوە، تا شناسنامەکا جە یۊترینی بڕۊرە، پەی  ئانەیە سەرە پەی دەسەڵاتی شۊڕ کریۊ، تا کەس وەنەو دەسەڵاتی  نەپەرسۊوە، تا گردوو ئا تاوانا پەرڎەپۊش کەرۊ و سیاسەتوو گۊشەگیر پەیڕەو کەرۊ".

دورماز بەئاماژەدای پانەیە گۊشەگیری تاوانێوەن دژوو ئینسانیەتی و ماوەو یەرۍ ساڵان ئیمراڵینە بەرڎەواما و یەرۍ ساڵێچا ڕا مەدریۊ بنەیانە و پارێزنەرۍ دیدار چەنی ڕابەروو گەلوو کوردی عەبدوڵڵا ئۊجالانی کەرا و واتش، "جە ڕاو بەڕێز ئۊجالانیوە هومێدوو ئاشتی  وەڵاتەکەنە گەشیانۊ، بەتایبەتی بەینوو ساڵەکاو ٢٠١٣ و ٢٠١٥ بەر کەوت، کە متاوییۊ چی وەڵاتەنە چێش کرییۊ و ئا کێشۍ کریۊ بە دیالۊگ چارەسەرۍ کریا. وەروو ئانەیە زەروورا گۊشەگیری سەروو بەڕێز ئۊجالانیوە ماڵیۊرە، تا چەنی پارێزنەرا و بنەیانەکەیش دیدار کەرۊ. بە پاو دەستووری هەمیشەیی ئانە مافوو گرد زیندانیکریاێوەن کە دیدار چەنی پارێزنەرا و بنەیانەی حیچ ڕاگێریێوەش نییا".

دورماز واتیچش، کە گۊشەگیری سەروو ڕابەروو گەلوو کوردی عەبدوڵڵا ئۊجالانی تەماموو وەڵاتەکەینە و ئیتر مەتاوا  بە هومێدۊ پەی ئایندەی  بدیا و واتش، "وەروو ئانەیە ئێمە پێسە جمیەری سیاسیی کوردی، پێسە گردوو هێزەکاو دیموکراسی مشۊم پێسە ڕەنجدەرا، ژەنا و گەنجا پەی ورگێرتەی گۊشەگیری کۊشیەیمۍ. گۊشەگیری سەروو بەڕێز ئۊجالانی گردوو زیندانەکانە  هەن. بە دەیان هەزار هامڕێما پێسە بارمتەی سیاسی گیریێنۍ، گۊشەگیریی ڕەها پێسە سیاسەتێوە دژوو دەسکەوتەکاو کورڎا، بەروو سنوورەکاو ئێمەوە بەکار مۍ. مشۊم ئێمە بە گردوو قوەو وێماوە خۊمانەوە داواکارییە دیموکراتیکەکاما پەی ورگێرتەی گۊشەگیری وزمۍ ڕووە. وەروو ئانەیە من داوا وەنەو هێزە دیموکراتیکەکا کەروو، تا ئا قۊناغە بەرەو ئاشتی و دیموکراسی بلۊ، مشۊم ئێمە کۊشیەیمێ".

س.ز