دووۍ زینڎانیۍ ئیلامەنە دریۍ قەنارە
زینڎانوو ئیلامینە سزاو جە قەنارەدای دووۍ زینڎانیا جابەجێ کریا، پینەیچ ژمارەو ئا کەسا جە سەرەتاو ئێساڵیوە جە ۋەرکەوتوو کوردسانی و ئێرانینە کە دریێنۍ قەنارە یاوا ٩٣ کەسۍ.
سەرسەعبوو ڕۊو دووەشەممەی زینڎانیێوە بە نامۍ موعین سەلاحی وەرزی، کە ماوەو ٣٢ ساڵا بۍ بە تۆمەتەو کوشتەی براکەیش زینڎانەنە بۍ، جە زینڎانوو ناوەندی ئیلامینە دریا قەنارە.
هاموەخت و جە هەمان زینڎانانەنە سزاو جە قەنارەدای زینڎانیێوەتەری بە نامۍ مەنسور مەنسوری تەمەن ٤٤ ساڵی جابەجێ کریا، کە خەڵکوو سەراوڵەو ئیلامیا و ساڵێوە و شش مانگۍ وەڵتەر بە تۆمەتوو کوشتەی ئەنقەسی گیریابۍ.
بەپاو هەواڵێوە تۆڕەو مافەکا مرۆڤوو کوردسانی کە جە زۋانوو سەرچەمێوە ئاگاڎاریۆ وەڵاش کەردەنۆ، ئا زینڎانییە، وەڵتەر چالاکی سیاسیش بیەن و چن ساڵێ چێوەڵتەر نیازش بیەن پەیوەس بۆ بە یۆ جە حزبە بەرهەڵسکارەکا ۋەرکەوتوو کوردسانیۆ، بەڵام جە وەختوو پڕایۊیشەنە سنوورەنە، بە تۆمەتوو بەزنای سنووری پۍ ماوەو شش مانگا جە عێراقەنە زینڎانی کریان.
ئانەیچش وستەن ڕووە، کە هێزە ئەمنییەکۍ ئاگاڎارۍ چالاکییە سیاسیەکاش بیێنۍ و دماو ئانەی بە تۆمەتوو کوشتەی گیریان، جە ڕاو وەشکەردەی فشاریۆ پۍ سەروو بنەیانەو کوشیاکەی، تا چنەش وەشۍ نەبا، پرۆسەو دادگاییکەردەکەیش و جابەجێکەردەی سزاکێشا جە ماوێوە کەمەنە بەرد ڕاوە.
بە پاو ئامارێوە رێکوزیاو مافەکا مرۆڤوو ئێرانی جە سەرەتاو ئێساڵیوە ٩٣ کەسۍ چا وڵاتەنە دریێنۍ قەنارە، ساڵەی ۋیەردێچ ٨٣٤ حاڵەتۍ جابەجێکەردەی سزاو جە قەنارەدای تۆمار کریێبێنۍ.
