"گرڎوو ئی قۊناغانە گەشمەرڎە هەڵمەت پێسە نموونەی باڵاو مدرامانی و شۊڕشی و کولتووروو دژایەتیی فاشیزموو دەوڵەت نەتەوەی، دەورێوە گرنگش جە سەرمەشقایەتیی گەنجاو پانیشتوو کورڎسانینە گێڵنا تا نەگنا وەروو کاریگەریی ئایدۊلۊژیاو فاشیزموو دەوڵەت نەتەوەی".
دماو ئەرەپڕای و ئازاڎبییەی پانیشتوو کورڎسانی دەسوو بەعسییە فاشیستەکاوە، هەر حزبە و ئامانج و بەهاکاو شۊڕشوو پانیشتوو کورڎسانیش پەی لاو بەرژەوەندییەکاو وێش کێش کەرۍ، چی بەینەنە هومێد و ئامانجە باڵا و مەبارەکەکاو گەلوو کوردی وزیۍ چێروو پایاو گومۍ کریۍ، چی سەروبەندەنە، گەنجۍ، نویسەرۍ، ڕابەرێوە گەنجاو پانیشتوو کورڎسانی، سەرەش ورڎا و جمیەروو شۊڕشوو کورڎسانی و خەتەی ئاپۊییەش ئشناسا.
گەشمەرڎە هەڵمەت، نامێوە ئاشنا و وەشواچەو سەروو زوانوو گرڎ ئینسانێوە ئازاڎیوازین
وێش بارەو ئا قۊناغەو پانیشتوو کورڎسانیوە ماچۊ:
''تا ئۍ ڕەخنەکێم سەروو یەنەکەی و پەدەکەی زیادتەرۍ بێنۍ، باسوو کورڎایەتیی کەرێنۍ، وەلۍ پانیشتی جە بەشەکای تەروو کورڎسانی جیا کەرێنیوە، ئینۍ پەی من ناکۊکۍ بێنۍ، وەلۍ جە درووشمەکاو پەکەکەینە دیم پەرسەو کوردی پێسە یۊی تەماشە کەرا، گرڎوو بەشەکاو کورڎسانینە، ئینە پەی من ڕاستتەر بۍ، پەوکای دەسم بە گێڵای کەرد و نرخنایەکاو سەرۊک ئاپۊیم وانێوە بارەو سۊسیالیزمی و نەتەوایەتی و پەرسەو کوردیوە چێوۍ تازۍ بێنۍ.''
گەشمەرڎە هەڵمەت، نامۍ تەمامەش دیار غەریبا، ساڵەو ١٩٧٣ دەگاو سێوسێنانوو قەرەداغینە پەیدا بییەن، ساڵەو ١٩٩٦ بەشوو فیزیاو زانکۊو سەلاحەدین-هەولێریش وانان، گەشمەرڎە هەڵمەت جە ئەرەپڕای خەڵکوو کورڎسانینە دژوو بەعسییەکا پێسە گەنجێوە دەورێوە گرنگ و باڵکێش گێڵنۊ، جگە وێچش بڕێوەش بەنامۍ دلێریوە سەروبەندوو ئەرەپڕاکەینە کەرکووکنە گەشمەرڎە بۊ.
گەشمەرڎە هەڵمەت سەرەڕاو هەرمانۍ و خەباتی دلۍ گەنجاو پانیشتوو کورڎسانینە، تەماشا کەرۊ ئی ڕەنج و خەباتە ئامانجەکاو ئادی تێرۍ مەکارا، پەوکای ساڵەو ١٩٩٥ بەشداریی ڕیزەکاو پەکەکەینە کەرۊ و ساڵەو ١٩٩٧ چەنی پۊلێوە هامڕایاش شامنە چەمشا بە ڕابەر ئاپۊی گنۊ، پەروەرڎێوە چڕوپڕوو ئایدۊلۊژی و فیکری موینا.
هامڕا هەڵمەت دلۍ کۊشیای ئازاڎیوازانەو گەلەکەیشنە چندین هەرمانۍ و وەرپەرسبییەیۍ گرنگێش بیێنۍ، ساڵەو ٢٠٠٨ تا ساڵەو ٢٠١٤ ئەرەمەرزنەر و ئەنداموو ئەنجوومەنوو دەسەو کارگێڵنیی پەچەدەکەی بییەن، كۊنگره‌و چواره‌موو پەچەدەکەینە پێسە سه‌رۊکی و کۊنگرەو پەنجیچنە پێسە هامسەرۊکوو پارتی چارەسەروو دیموکراتی کورڎسان-پەچەدەکەی ورچنیان.
حەرپاسە بەینوو ساڵاو ٢٠١٤ تا ڕۊو گەشمەرڎەبییەیش، چوارچوەو سیستموو كۊما جڤاكێن كورڎسان (كه‌جه‌كە)ـینە، چندین هەرمانۍ و وەرپەرسبییەیۍ ڕێكوستەیش گەرڎەننە بێنۍ، ئه‌نداموو کۊمیتەی ناوەندی په‌كه‌كه‌ی و ئه‌نداموو كۊنسه‌و سه‌رۊكایه‌تیی گرڎینوو كه‌جه‌كەی بۍ.
گرڎوو ئی قۊناغانە گەشمەرڎە هەڵمەت پێسە نموونەی باڵاو مدرامانی و شۊڕشی و کولتووروو دژایەتیی فاشیزموو دەوڵەت نەتەوەی، دەورێوە گرنگش جە سەرمەشقایەتیی گەنجاو پانیشتوو کورڎسانینە گێڵنان تا نەگنا چێروو کاریگەریی ئایدۊلۊژیاو فاشیزموو دەوڵەت نەتەوەی و سەروو بنەماو متمانۍ و باوەڕبەوێبییەی هەقەتینی گەلەکەیشا بشناسا و وەرگێریی جە ئامانج و چاند و هەقەتینەیی گەلوو کورڎسانی کەرا.
یۊ جە تایبەتمەندییەکاو گەشمەرڎە دیاری قەڵەمە بەبڕشت و تیژوینەکەش بۍ، کە ئی کتێبێچشە هەنێ:
وانایۊیۍ تازە پەی تارێخوو کوردسانی، کوڵە تارێخۍ عێراقی و پانیشتوو کورڎسانی، وێڕاوەبەریی دیموکراتی، قەیرانوو سیستمی و پەرسەو سەرمەشقایەتیی پانیشتوو کورڎسانینە، چەنی مانیفستۊو گەنجاو پانیشتوو کورڎسانی، جگە جە سەدان نویستەیا و ئەوەکۊڵیایا و کۊڕ و سیمینارا و پەروەرڎەی هەسوو گەنجاو پانیشتوو کورڎسانی و بەشەکای تەروو کورڎسانی.
ساڵەو ٢٠٢١، کتێبێوە سەروو ژیوای و کۊشیای هامڕا هەڵمەتت=ی چاپ کریا، بە نامۍ "دیار غەریب، مانیفێستۊوی کەسێتیی ئازاڎ و شۊڕشگێڵنوو کورڎسانی"، کتێبەکە جە پەنج بەرگێن، ژیواینامە و کۊوتار و چەمپەنەکەوتەیەکاو هامڕا هەڵمەتی گێرۊ وێش و نویسەر و ڕۊنامەنویس 'حەسەن جودیی'ی ئاماڎە کەرڎەن.
ڕۊو ٢٦وو حوزەیرانوو ٢٠١٩ دەسوو ناپاکا و دەوڵەتی فاشیستوو تورکی یاوا گەیشتە هامڕا هەڵمەتی و دوۍ جە هامڕایەکاش، کە دماتەر کەجەکە ئاشکراش کەرد، گەشمەرڎەبییەی هامڕا هەڵمەتی بە بەرنامە و بەشداریی سیخوڕەکا بییەن و مشۊم سزاو وێشا ورگێرا.
س.ز
