جە هۆڵو ئەمنە سورەکەو سلێمانی بە سەرمەشقی نوێنەرایەتی کۆنگرەو نەتەوەیی کورڎسانی جە پانیشت بە دروشمەو 'جە ١٠٠ ساڵەو لۆزانیەنە، کورڎ پېۋەرە ژیۋای جە ۋەرکەوتوو میامینینە کەرۊنە چارەسەری" بە بەشڎاری ژمارېۋە جە رۆشنۋیر، سیاسەڎمەدار و کەسایەتیە ئشناسیەکا دیڎارو ١٠٠ ساڵەو لۆزانی دەسش پنە کەرڎ.

دیڎاری ١٠٠ ساڵەو لۆزانی دەسش پنەکەرڎ.

جە پەیامەکەو کەنەکەینە پۍ دیڎارەکەی ئامابۍ: "ئامانجو کەنەکەی جە سەرەتاو ئەرەمەرزنایشۊ ئانەن کە یۊبیەیۍ دلۍ پارتەکانە سازکەرۊ، بۊ بە چەترێوە پۍ گەلوو کورڎی. مەسڵەحەتەکۍ گەلی، خاک و نەتەوەی خەتەو سورو گردو پارتەکا بۊ. وەختۍ ئانەما کەرڎ متاۋمۍ سەرکۊتەی بە دەسبارمۍ. جیاتی ئانەی دەسو دوژمنی گېرمۍ کە خاکەکەیما ئەرەگیر کەرۊ، دەس وزمۍ دلۍ دەسو یۊترینی و وەران ۋەرو دوژمنی مرڎمېوە".

دماتەر پانێڵیستەکۍ سەرو مژارەکا هۊرسەنگنایشا وست ڕووە:

کاردۆ محەمەڎ: پەیماننامەکە چارەنۋیسو گەلا دیاری کەرۊ. وەختۍ تەماشەو پەیماننامەو لۆزانی کەرمۍ، مەسڵەحەتەکۍ بیۍ بە مەڵامەتو ئانەی ئاینڎەو گەلی دلېنە بشۊ. مشۊم دەرفەتەکا جە دەس نەڎەیمۍ. ٣٢ۍ ساڵېن حکومەتما هەن، ئێمە چېشما کەرڎەن کە ستراتیجېوە عال پۍ گەلوو کورڎی بەدەسبارمۍ. ئانەما نەکەرڎ. ئیسفاڎەما جە دەرفەتە میان نەتەوەییەکا هۊرنەگېرت. جە کۊشیای گەلوو کورڎینە ژەنی لوۋۍ سەرو شانۆو تاریخی کە بیۍ بە هیواو گەلا، پېسە پێۋیسی ئیسفاڎەما چنە نەکەرڎ. ئا گرڎ قوربانیېما بەخشۍ پېسە پێۋیسی ئەنجامما بەدەسنارڎ. جە پانیشت پەنەوازما بە سیستمێوە حېقمی دروسی هەن. مشۊم سەرو ستراتیجۍ نەتەوەیی مدرامای کەرمۍ.

بڵێسەو جەبار فەرمانی: چېگەنە پرسیارە گرنگەکۍ ئانېنە کە ئایا پەیماننامەو لۆزانی دمایش مۍ یان نا؟ جە راسینە جە پەیماننامەو لۆزانینە جە حیچ ماڎېوەنە نامان کە پەیماننەمەکە هۊرشېۋیۊوە. ئەگەر هۊرشېۋیاوە مشۊم چېش کریۊ؟ تورکیاو ئیسەی و تورکیاو وەڵۍ ١٠٠ ساڵا چېوەڵتەری جیاوازېنۍ. بە پاو دەسەڵاتو ئیسەو تورکیای دمایی بە سەردەمو ئاتاتورکی ئامان. تورکیا ماچۊ لۆزان پۍ ئېمە زەرەرش بیەن، سنوورەکېماش کەمکەرڎېنۍ. پۍ ئانەی تورکیا مشۊم چېش کەرۊ. بڕۍ ماڎۍ و پەیمانۍ تەرۍ مەجالش پنە مڎۊ بڕۍ خاڵۍ فاڕۊ. هەرێمو ۋېش فراوانتەر کەرۊ و دەسەڵاتو ۋېش زیاڎ کەرۊ. دوۋۍ ماڎۍ لۆزانی هەنۍ کە مەجال بە تورکیای مڎۊ مەسڵەحەتو ۋېشەنە بەکارشا بارۊ، پانەیچ خاکو ۋەرنیشتیش ئەرەگیر کەرڎ. ئێمە مزانمۍ چا فاڕیای کەرا و ئانەی جە هاتای کەرڎش چا واوەیش کەرۊوە. ئانەی جە ڕاو رێفراندۆمی و پەرلەمانیوە کەرۊ. حەر پا جۊریە متاۋۊ موسڵی و فرەو مەنتیقا پانیشتی ئەرەگیر کەرۊ.

نوێنەرو پەیەدەی جە پانیشتوو کورڎسانی د. جاویدان کەمال: وەختۍ باسو گەلوو کورڎی کەرمۍ، مشۊم باسو ٤ دەوڵەتا کەرمۍ. جە پانیشت فیدڕالیزم و جە ۋەرنیشت ۋېڕاوەبەری متاۋا پېسە دەرفەتێوە عالی سەرو ئاستی میان نەتەوەیی ئەنجام بەدەسبارا. ئەزمونو ۋەرنیشتی متاۋۊ دمایی بە قەیرانەکا ۋەرکەوتوو میامینی بارۊ. کورڎ ئیسە جە حەر چوار پارچە پەی پارېزناو مافەکاش خەبات کەرۊ و دماتەر پەی کورڎسانی گەورەی پەشتیوانی یۊترینی کەرا.

دماو پێشکەشکەرڎەی قسۍ پانێڵیستەکا ئاماڎەبیەکېچ پرسیار و سەرنجەکېشا وستۍ ڕووە.

هـ. ش