بە پاو ئەرەیاونایێ کە ڕاوەبەرایەتیی گردینوو ڕۆشنویری و هونەریی هەڵەبجەی و ڕێکوزیاو دۆساو هەڵەبجەی وەڵا کەردەنۆ، پەنجشەممەکەی تەر، ڕێککەوتوو٩/١٤/ ٢٠٢٣دیداروو "ناتق"ی شاعیری بەرا ڕاوە، جە هۆڵوو مۆنۆمێنتوو گەشمەردانە، بە ئامادەبییەی بنەیانەو شاعیری.

بە پاو ئەرەیاونایێ کە دەسما کەوتەن قەرار پاسەن جە ئەرەنیشتەیێ یەک ڕۆیینە چندین کۆڵیایۆیێ بارەو ژیواینامە و شیعرەکاو شاعیریوە کریا و بارەو دۆخیی ئەدەبیی شاعیریوە چند کۆڵیارێ بەشدارێ با، دیدارەکە سەرسەعبوو ئا ڕۆیە بە لوای پەی سەروو مەزاروو شاعیری و نیایرەی تاجەولینەی سەروو مەزارەکەیشۆ دەس پەنە کەرۆ و دماتەر پانێلە ڕۆشنویرییەکێ ملا ڕاوە.

یاگێ واتەینە " ناتق"ی شاعیر نامێش"مەلا کەریموو کوڕوو مەعروف ئاغاو وەسمان ئاغا"ین، ساڵەو 1867ی زاینی ئامان دنیاوە، عەینوو شاعیراو ئا سەردەمییە پەی وانای لوان مزگییەکا و فرەو یاگاو کوردسانی گێڵان، ڕەفاقەتش چەنی شێخ مەحموودی نەمری بییەن و پێوە مزگیی گەورەو شاروو سلێمانینە دەرسوو قورئانی  مەبارەکیشا وانان.

شاعیر کەسایەتیێوە فرە ڕوووەش و قسەزان بییەن، بە هەرمانبەری لوان تەوێڵێ و ئاوارەیی و دەربردەریی فرەش چەشتەن و ئاوارەو شارەکاو حمسی و حەلەبی و حەمای بییەن، ساڵەو١٩٦٧ کۆچی دماینش کەردەن و قەبرسانوو "گوڵان"ینە ئەسپەردە کریان.

س.ز