وەرڎەموو هێزە هەژموونوازەکانە، کە گەرەکشانە بە سیاسەتوو نکۊڵی و سڕیەیۊ گەلوو کوردی دلێنە بەرا، وەربەسێوە گەورە هەن، کە جەنگاوەرە فیداییەکێنۍ کە بە فەلسەفەو ڕابەروو گەلوو کوردی عەبدوڵڵا ئۊجالانی وێشا سەرجەنۊ خولقناوە.

تۊموو ئازادی، کە بە گەرمی وەرەتاوی ڕێخێش پەی دلۍ خاکی شۊڕۍ بیێنیوە، ئیتر ئینا دلۍ دەسێوە سڵامەتینە. ئی تۊمە جە شووراو ئامەدی، جە کەشە کەونارەکاو بۊتانی و بە بەستە و ئاوازوو حەیرانواچاو سەرحەدی زیندە بییەنۊ، کۊبانێچنە کاریگەرییش هەن. گەریلاو یەژا ستاری یڵدز شاهین بۊتانە کۊبانێ-نە پەیدا بۊ و گەورۍ بۊ.  

ژیوایچەنە خەتەی فیداییە ورچنۊ

یڵدز دلۍ جەنگی و شۊڕشینە گەورۍ بۊ،  گەلەکەش جە گرد ڕووێوە دایمە هەمیشە ئینا چێروو تەرسۍ و هەڕەشانە. ئینەیچە هەستیاری و هەستوو هەقسانایۊ و حەزوو جەنگی لاو ئادیوە وەش کەرۊ. چونکوم بە چەمۍ وێش شایەتەو ئانەیە بیێنە، کە جەنگەواناو ئازادی کە پەی گەلەکەیشا گژیێنۍ، بەدڕندانە ڕاو چەتەکاو داعشیوە گەشمەرڎی کریێنۍ.

دژوو ئا هجووماو دەوڵەتوو تورکی ئەرەگیری و چەتەکاش ساڵەو ٢٠١٨ ملوو عەفرینی و ساڵەو ٢٠١٩ ملوو سەرێکانیرە دەسشا پەنە کرد، چەک ورگێرۊ و ملۊ سەنگەرەکاو وەڵۍ و پەی پارێزنای ئا بەهایا،  کە بە ونەو  گەشمەرڎا ئامێنۍ، گیانبازانە گژییۊ.

دووۍ برۍ یڵدزۍ و فرەو قەومەکاش بەشدارۍ دلۍ ڕیزەکاو گەریلای بێنۍ. ئینەیچە بی بایسوو ئانەیە ڕووە وەنەو کەشە ئازادەکا کەرۊ. بە جۊشوخرۊشێوە فرەوە  ڕووە کەرۊ کەشە ئازادەکا. بەتایبەتیچ جە ١٥و شوباتینە، ساڵیادوو پیلانگێڵنیی میاننەتەوەیینە، کە وازیۍ جە کەسایەتیی ڕابەروو گەلوو کوردی عەبدوڵڵا ئۊجالانینە گەلوو کوردی وزا زیندان تاریکۊ، بەشدارەو دلۍ ڕیزەکاو گەریلای بۊ.  

جە پەروەرڎە و ئەرەئارڎەی جەنگەوانی تازەینە، جە ڕووەو ئایدیۊلۊژی و سەروازییوە فرە ملۊ وەڵێوە، دماو ماوێوە کەمی وێش جەنگەوانۍ تازۍ پەروەرڎی کەرۊ. ئیتر بۊ بە یووە جە فەرماندە سەرمەشقەکاو ژەنا. چا یاگانە کە خەبات کەرۊ، بۊ بە جەنگاوەریوە وەشەسیۍ و نموونەییە.

ساڵەو ٢٠٢١ بە مەبەسوو قووڵکەرڎەیۊ شۊنیرەلوای و پەیجورییەکاش، داوا کەرۊ کە بەشدارەو دلۍ هێزی تایبەتی بۊ، قەرارش دان کە بۊ بە دەنگوو خەڵکەکەیش و هەقەو هامڕایاش کەرۊوە و ژیوایشەنە خەتێوە فیداییانۍ ورچنۊ جە حیچ تەرسێوە ورنۍ و سڵ نەکەرۊوە، گرد هەرمانێوە بە سەرکەوتەێوە گەورەوە بیاونۊ یاگۍ.  

دڵێوە یارا، کە وەرپەرچوو دوژمنی مدۊوە

دەوڵەتوو تورکی ئەرەگیری جە ٢٥وو ئایاروو ٢٠٢٢ دەس بە هجوومە ئەرەگیرییەکاش پەی سەروو مەنتێقەو گەشمەرڎە دەلیلوو زاگرۊسی (وەرنیشتوو زاپی) کەرۊ. یڵدزە بەشداری جە هەڵمەتەو شۊڕشگێڵنیی گەشمەرڎە ساڤاش مەرەشینە کەرۊ. جە تونێلەکاو جەنگینە بە یاراییێوە فرەوە گژییۊ. تەماموو جەنگەکەینە ئامانجش پارێزنای هامڕایەکاش و بییەی بە سەرمەشقوو ژیواێوە کۊلێکتیڤی و پێوەیی بۍ . حەر هەلێوەش پەی ڕەخسییۊ بە نیشانەماڕۍ و چەکی تاکەکەسی مدۊ وەنەو ئامانجەکەیش.  

گەریلۍ یەژا ستاری یڵدزە جە مەیدانوو مدرامانوو کەشوو جودی-ینە دلۍ گردوو چالاکییەکانە هەڵمەتەی شۊڕشگێڵنییەو گەشمەرڎە ساڤاش مەرەشینە بەشدارە بۊ. تا گورزی قورس و کاریگەر وەنەو  دوژمنی بدۊ، چا مەیدانانە کە دلێشنە سەروەرەنە، ئەرکدارەنە دلۍ تیمە گێڵییەرەکانە. شەوەو ٢٠وو تەمووزوو ٢٠٢٣، سوپای ئەرەگیرەو تورکی گەرەکش بۍ وەزۊرە وار، یڵدزە چەنی یووە جە گەریلا سەرمەشقەکا ڕۊبین ئاڤێنتە بۍ، جوابووئەرەگیراش داوە. وەلۍ سوپاو تورکی وەراوەروو ئا مدرامانینە دڕندەتەرە بییە و ئاندەی تەر درێژەش بە هجوومەکاش دا، ڕۊو ٢٥وو تەمووزی، ڕۊبین ئاڤێنتە و یڵدز شاهین بۊتانە، ئا کۊشەرۍ کە بیۍ بە ڕەمزوو سەرمەشقایەتیی ژەنا، لوۍ دلۍ کارەوانوو گەشمەرڎاوە.

س.ز