یۊ جە فەرماندەکاو قەرارگەی ناوەندی هەپەگەی حەقی ئارمانج، یاڎوو ئەنگین سینجەر (ئەرڎاڵ)ش بەرز نرخنا، کە ساڵەو ٢٠٠٣ گەشمەرڎە بی، چا بارەوە واتش، "فەرماندێوە سەرمەشق بۍ، کە جە تەماموو ژیوای شۊڕشگێڵنییشنە ڕەنجێوە گەورەش پەی وەڵاتی، گەلی و ئینسانیەتی کێشت".
ئارمانج ئەرەیاوناش، ئەرڎاڵ دلۍ گەریلاینە پێسە "فەرماندەی دەم بە خوەی" ئشناسیۍ و واتش، "ژیوای شۊڕشگێڵنییشنە خۊیدا ڕابەر و سەرکرڎەێوەن کە ڕەنجی گەورەش پەی وەڵاتی، گەلی و ئینسانیەتی کێشتەن. فەرماندێوەن وەروو ڕاسواچی و خاکەڕایی وجەوێویەرڎەیش بییەبۍ بە وەشەسیاو گرد لێوە".
ئارمانج ئانەیچش وست ڕووە، کە پێسە هامڕا و جەنگەوانۍ هاگاما چا میراتە گەورەیە بۊ، کە ئەرڎاڵیوە پەیشا مەنەنۊ و لایقۍ یاڎوو ئادی با.
جە فەرماندەکاو قەرارگەی ناوەندیی هەپەگە حەقی ئارمانج، بۊنەو ٢٠مین ساڵیاڎوو گەشمەرڎەبییەی فەرماندە ئەرڎاڵ (ئەنگین سینجەر)یوە، قسێش پەی ئاژانسوو هەواڵوو فورات (ANF)ی کەرڎۍ.
یوەم جار، کەی و چکۊ و چەنی گەشمەرڎە ئەرڎاڵتا ئشناسا؟ شمە کام هەرێمانە پێوە بێندێ؟
هامڕا ئەرڎاڵ جە پازارجکی مەرەشینە جە بنەیانێوە وەڵاتپارێزنینە پەیدا بییەبۍ. حەرچندە زارۊڵەییوە تا ئا وەختە ئاما دلۍ ڕیزەکاو پەکەکەیۊ ئەڵمانیانە ژیوابۍ، زانۍ چەنی وەشەسیای وێش پەی وەڵاتی و نیشتمانپەروەری پارێنۊ. جە گەنجییەوە بە نۊعێوە کارا و سەرمەشقانە بەشدارییش چالاکییە جیاجیاکاو جمیەری ئازادینە کەرد.ساڵەو ١٩٩٢ ئاما پەی ئەکادیمیاو مەعسوم کۊرکمازی و ڕابەر ئاپۊش ئشناسا. دماو ئانەیە ئەکادیمیاکەو مەعسوم کۊرکمازینە پەروەرڎەش دی، بەرەو بۊتان کیانیا پەی هەرمانۍ، ئاما هەرێموو هەفتانینی. ساڵەو ١٩٩٣ بە وەشەسیای عەگید و مستەفا یەندەمیوە کە شناسنامۍ وێش چادیشاوە نیێبۍ، بە دڵوەشی و سەرەبەرزیوە وێش یاونا بۊتان، کە فەرماندەکێما چندین ساڵۍ چا خەباتشا کەرڎەبۍ. جە گردوو مەنتێقەکاو بۊتانینە مەنۊ و گردوو ئا خەباتانە، کە بەشدارییش چەنە کەرڎۍ، پێرفۊرمانسێوە سەرکەوتەش نیشانە دا.
وەڵۍ ئانەینە ئەرڎاڵی بشناسمۍ و یۊی وینمۍ،ژنیەبێما کە جە ئەرەیاوناینە و بڕۍ چالاکییای تەرینە چەنی فەرماندەیی هەرێموو بۊتانی بەشدار بییەن، فەرماندێوە گەنجا کە دلۍ یەکینە گێڵیەرەکانە کارایانە بەشداریی جەنگیش کەرڎەن. ئا هامڕۍ کە چەنیش خەباتشا کەرڎەبۍ بەرڎەوام باسوو ئانەیما پەی کەرێنۍ، کە کەسێوە زیندە و پەڕوزەن، دەم بەخوە و ئازان.
من لە تشرینوو دووەموو ١٩٩٦ ئەرڎاڵم دۊڵەو باسرەتیی گابارینە ئشناسا. وەختۍ چەنی هامڕایم فەرماندەو ئەیالەتی بۊتان جەمالی قسۍ کەرێنمۍ، میەو دوێ-یەرۍ هامڕۍ پەی لایما مەیا. وەڵی ئانەینە کە کەس پەنەما واچۊ وەڵینەکەشا کێن، من زانام کە ئانە هامڕا ئەرڎاڵا. چوون وەڵتەرۍ هامڕۍ ئندەشا باسوو کەسایەتیی ئەرڎاڵی کەرڎەبۍ، وەختۍ دیما بەئاسانی ئشناساماوە.
زاناما کە یەکینەکەو چێروو فەرماندەیی هامڕا ئەرڎاڵی مەنتێقەو فندک_ینە چالاکیێوە سەرکەوتانەشا کەرڎەن و دماتەر ئامێنێوە لاو ئێمە. دماو چند دەیەقێوە هەواڵپەرسای. بەوردی باسوو پلانەو کەرڎەی چالاکییەکەیش کەرد. دماو یەرێ_چوار ڕاو مەنێوە چاگە، بە پاو پلانی جە یۊی بڕیێنمێرە، چا چند ڕوەنە کە پێوەرە بێنمۍ، زانام حەرچێشا بارەو واتەن گرد، تەنانەت زانام کەمیچشا بارەوە واتەن.
گابارنە بە دەیان چالاکیۍ سەرکەوتانێش کەرڎۍ
دووەم دیدارما مانگەو کانوونوو یوەموو ١٩٩٧ینە بۍ، ئی جارە نزیکوو دەگاو سپیڤیانوو گاباری بۍ. ئێمە چاگە پەی پەروەرڎەو تاکتیکی کە لاو فەرماندەیی ئەیالەتوو بۊتانیوە ڕێک وزیابێو، لوێنمۍ بەستا. ئەرڎاڵ و چند هامڕێوەما جە وێرەگانیو واراناوینە ڕووەشا کەرڎەبۍ بەستای. بەرەبەیاننە ئێمە یاوایمۍ مەنتێقەو ڕوسۊروو هەرێموو شەریبانی. جە ڕاو تەکمیلەیۊ کە ڕاو جە بێتەلیوە دریۍ زاناما، کە گابارنە ئۊپراسیۊنێوە وەرفراوان دەسش پەنە کەرڎەن و فرەو یاگانە ڕووبەڕووبییەیۊی دژوار بییەن. چا بەینەنە هامڕا ئەرڎاڵ هەوڵۍ دۍ جە ڕاو بێتەلی وچکلەیۊ پەیوەندی بە هامڕایوە کەرۊ تا بزانۊ دوژمن چکۊوە، ئینا چە خەتێوەنە، ڕووبەڕووبییەیۊ چکۊنە هەن و ڕانمایی دۍ بە هامڕایا. وەروو ئانەیە هامڕا ئەرڎاڵ دووۍ ساڵۍ بۍ فەرماندەیی گابارینە بۍ، گردوو مەنتێقەکەو وێش خاس ئشناسۍ. هەڵای نەیاوێبێنمۍ بەستا زاناما، کە هامڕێکێما دژوو ئا هێزا کە ئۊپراسیۊنشا کەرڎەن، چالاکیی کاریگەرشا کەرڎەن بە سزادای دەیان سەروازا، کۊڵۍ چەکۍ فرێشا دەسۍ کەوتێنۍ.
ئا دیالۊگ و ڕانماییۍ ،کە ئەرڎال ماوێوە کەمەنە چەنی هامڕایاش، کە دلۍ ئۊپراسیۊنینە بۍ، سازش کەرد، یارڎەیش دایمۍ بیاومێنە، کە ئاد چندە فەرماندێوە جەنگەران و جەنەئامان. وەختۍ یاوایمۍ بەستا بە نامۍ چالانی، ئێمە زاناما کە بەتایبەتی هامڕا جەمال فەرماندەو ئەیالەتوو بۊتانی و هامڕایاو ئاستوو فەرماندەیی سەرتاسەری بۊتانی ئامادێنۍ و ئامادەکاریی دەسپەنەکەرڎەی پەروەرڎەی دماینی کەرا. چاگە بە درێژایی زمسانی جە ڕاوەبەرڎەی پەروەرڎەینە خەباتما کەرد. پەروەرڎەکەنە فرەو فەرماندە بەنرخا پێسەو ئەشرەف باشکالە، قاسم ئەنگین، کورتای فەراشینۍ ئامادۍ بێنۍ، بەسەرکەوتەیی دماییش ئاما. هامڕا ئەرڎاڵ ئەوەڵۊ وەرپەرسوو هامڕا بەشداراو ئا پەروەرڎەیە بۍ. کارایانە بەشداری گردوو وانەکانە کەرۍ و بواروو بیرڎۊزی و ڕێکوستەی و سەروازینە هامکاری و یارڎەی هامڕایاش دۍ.
دماو ئانەیە پەروەرڎە تەمامیا کۊنفڕانسوو بۊتانی کریا، جە وەهاروو ١٩٩٨ینە چەنی گرووپێوە گەورەو هامڕایاما بە سەرمەشقایەتیی هامڕا ئەرڎاڵی جارێوە تەر لوایمێوە پەی گاباری. هامڕا ئەرڎاڵ فەرماندەیی گابارینە بۍ و هەمیچ فەرماندەو یەکینە گێڵیەرەکانە بۍ. بەینوو ساڵاو ١٩٩٧-١٩٩٨ بە فەرماندەیی هامڕا ئەرڎاڵی گابارنە بە تاکتیکی دۊڵەمەند بە دەیان چالاکیۍ سەرکەوتۍ کریۍ و گورزی گەورە وەنەو دوژمنی شنیا و چەکێوە فرۍ دەسوو دوژمنیوە گیریۍ. دماتەر لوا پەی هەرێموو جودیی و فەرمانەدەیی ئاستوو یەکەمییش ورگێرت.
جە ششەم کۊنگرەو پەکەکەینە هامڕا ئەرڎاڵ پێسە ئەنداموو کۊمیتەی ناوەندی ورچنییا و پێسە وەرپەرسوو ئاسوو یوەموو ئەیالەتوو گابار-مێردینی، کە ئا وەختە تازە مەرزیابێرە دەسنیشان کریا. جە ئاداروو ١٩٩٩ گابارنە کۊبییەیۊ ڕاوەبەراو ئەیالەتەکانە بە بەشداریی هامڕا حسێن ماهیری، کە تازە پانیشتۊ ئامابۍ ساز کریا. دماو کۊبییەیۊکەی کە بە سەرمەشقایەتیی هامڕا ئەرڎاڵی ساز کریا، چوارچوەو پلان و پەیڕەوی تازەینە سەروو بنەماو کۊشیای کاریگەری دژوو پیلانگێڵنیی میاننەتەوەیینە هامڕێما وزیۍ ئامادەباشییوە.
من و ئەرڎاڵی ساڵەو ١٩٩٩ بەرڎەوام گابارنە پێوەرە بێنمۍ، پێسە نوێنەروو کۊنگرەی حەوتەمی ئامایمۍ لاو یۊی، تا ساڵەو ٢٠٠٠ کە لوا پەی ئەورووپای ئێمە بەرڎەوام پێوەرە بێنمۍ.
شمە متاودۍ جە شێوازوو فەرماندەیی بیرڎۊزی، ڕێکوستەی و سەروازیی ئا ساڵا، کە پێوە چەنی ئەرڎاڵی بێندۍ چێو واچدێ؟
هامڕا ئەرڎاڵ جە بنەیانێوە کوردی، وەڵاتپارێزن و عەلەوی بۍ. زارۊڵەییوە شایەتوو هجووم و کرڎەوەکاو دەوڵەتوو تورکی بۍ وەراوەروو گەلوو کوردی-وەڵاتپارێزنی-عەلەویما. جە ساڵەو ١٩٧٨ مەرەشنە کۊکوشیی دەوڵەتوو تورکی دژوو عەلەوییە کورڎە وەڵاتپارێزنەکا کریا، ئێشوو کۊکوشیی مەرەشییش هەست پەنە کەرڎەبۍ. ئا وەخت فەلسەفە و ئایدۊلۊژیاو پەکەکەیش ئشناسا، ئاستێوە ڕێکوزیاتەرش بەدەس ئارڎەبۍ. یانۍ هامڕا ئەرڎاڵ لە عومروو گەنجنە بەشدار بیەیبۍ و زانابێش کە جمیەری ئاپۊیی ڕاسواچتەرین جمیەروو ئازادیی کوردی و کوردستانین. بە پەروەرڎەکەرڎەیش لایەنوو ڕابەر ئاپۊیۊ بی بە گەریلا و فەرماندە.
پەی ماوەو چندین ساڵا فەرماندەیی ئەیالەتوو بۊتانینە مەنۊ و بەشداریی فرەو چالاکی و جەنگەکاش کەرد، ساعیبوو ئەزموونێوە گەورەی سەربازی بۍ. گردوو ئا یاگانە کە چەنەش بۍ پەی چندین ساڵا بە خوڵقنای سیستموو پەروەرڎەی بیرڎۊزی، ڕێکوستەی و سەروازی گەریلاکێش پەروەرڎۍ کەرڎۍ و بەرڎێش وەڵێوە. بە کەسایەتیی دەم بەخوە و پەڕ جۊشوخرۊشش، بەرڎەوام لاو تەماموو هامڕایاوە ڕێزش وەنە گیریۍ. وەختۍ زەروور بیۍ فەرماندێوە چەنەئاما و وەختێچ جەنگەوان و وەختێوەیچ خزمەتکارێوە وەفادار بۍ پەی هامڕایاش. بە ژیوای و بەشداربییەیش بی بە ساعیبوو هەڵوێستی ئاپۊیی، کە گرد وەخت پەی فەرماندەی و جەنگەوانەکا بۍ بە نموونە.
لایەنێوە تەروو شێوازوو فەرماندەیی ئەرڎاڵی ئانەبۍ، کە خاسخاسۍ چەمداریی دوژمنی کەرۍ، هەوڵۍ دۍ بیاوۊنە، چکۊوە لاوازۍ و چکۊوە قەوەتێنۍ و بە پاو ئانەیە پلانۍ و تاکتیکۍ وردوینانۍ مجێرە. ئاد زانۍ کە چالاکی و جەنگی سەرکە‌‌وتە ئینا زانیاری و ورڎەکارییەکانە. بەرڎەوام سەروو زانیارییەکاوە مرڎۍ و چەنی هامڕایا و دەوروبەریچش هامبەشی کەرۍ. فەرماندێوە پاسنە بۍ، کە گرنگی بە زانیاری و ورڎەکارییەکاو جەنگی دۍ.
مامەڵەکەرڎەیش چەنی کۊشیای ئازادیی ژەنۍ و ئا ژەنا، کە چەنیش خەبات کەرێنۍ چەنین بێ؟
وەرانوەروو ئا دەور و هەرمانێوە کە ڕابەر ئاپۊی بە ژەنا بەخشێبۍ، بڕۍ کەموکوڵیما بێنۍ. هامڕا ئەرڎال سەرەمڕ وەراوەروو ئا کەموکوڵییاوە کۊشیۍ. جە ڕاو قسەوباسی تایبەتیوە چەنی هامڕا پیایا هەوڵۍ مدۊ ئا کەموکوڵییا وزۊ وەروو باسی. چەنی ئا ژەنایچە کە خەباتشا چەنی کەرۍ، تاوابێش هەماهەنگیێوە ساز کەرۊ ڕۊحوو هەرمانۍ پێکەوەرەییۍ خولقنۊ. ڕەخنە وەنەو کەموکوڵییەکا گێرۍ، وەلۍ هامڕاێوە بۍ کە سەرەمڕ بڕا بەخشنێوە و گرنگیی بە خەباتی هامڕایانەی دۍ.
هامڕا ئەرڎاڵ جە ڕاو ئا پەروەرڎەیۊ کە جە ڕابەر ئاپۊی و پەکەکەیۊ ورشگێرتە بۍ، هەرپاسە بۊنەو کولتوورێوە کە بەدەسش ئارڎەبۍ، هاگاداروو گرنگیی جمیەروو ئازادیی ژەنا بۍ. حەرشۊنێونە مەنێوە چەنی هامڕا ژەنا و هەم چەنی هامڕا پیایایچ پیاو قسەوباس کەرۍ و شێوازێوە تایبەت گێرێرە وەر، کە هامڕایا بەرەو وەڵۍ بەرۍ. وێش پەی وێش چا ساڵانە ڕاش وەرڎەموو هامڕا ژەنانە کەرڎۊ تا چالاکییەکانە و خەباتنە ساعیبۍ دەسوەڵێوستەی با. هامڕا ئەرڎاڵ حەرچندە ساعیبوو هەڵوێستێوە ڕەخنەگرانەیچ بییەبۊ، نەدیما کە کەسش وەنە عاجز بۊ یان چەنەش دوور گنۊوە. لاو هامڕا ژەنەکایچۊ وەشەسیا بۍ. نۊعوو فەرماندەییکەرڎەیش مایۍ قبووڵکەرڎەی بۍ.
ئەگەر دۊخوو ئیساتۍ وەرەچەم گێرمۍ و ورش سەنگنمۍ، گەشمەرڎە ئەرڎاڵ جەنگەنە کام تاکتیکوو چالاکی و کام نۊعەیە بەکار ئارێ؟ تا پەی چالاکییەکاو ئارۊی بۊ بە نموونە متاودۍ جا بارەوە چێش بواچدێ؟
ئەگەر گەریلایەتی مۊدێرنیتەی دیموکراتیکی پسپۊڕانە، کە ئارۊنە هەن ورش سەنگنمێ؛ وەختۍ کۊڵیایۊی پراکتیکیی ١٩٩٧-١٩٩٩وو گاباری بە فەرماندەیی هامڕا ئەرڎالی کریۊ، وینمۍ چا ڕۊزگارنە پراتیکیوە چانەش بۍ. چا قۊناغەنە هامڕا ئەرڎال زیاڎتەر سەروو وەڵێوەبەرڎەی چالاکیی کاریگەری ورد بییەبێوە و بە ئەنجام بەرگی هەقەتینش کەرڎەبێنە. شێوازێوە فەرماندەییش بۍ، کە بە تاکتیکەکاش بۊسە، لوایدلێوە و سابۊتاژ، چا شۊنانە کە دوژمن تەسەور نەکەرۍ و بە چالاکیی سوپرایز و شۊکئاوەر گورزی قورس وەنەو دوژمنی شانۍ. جە ئەنجاموو پلانەکێشنە، بەبۍ ئانەی بە هێزێوە کەمۊ دریۊش وەنە و چند دەیەقێوەنە ئەنجام بەدەس بارۊ و بە کێشایۊ چالاکی سەرکەوتانە ساز کەرۊ. ئا چالاکیۍ بە فەرماندەیی هامڕا ئەرڎاڵی ئەنجام دریێنۍ، دوژمنی وزێنۍ تەرسی و شڵەژیایۊ.
چا قۊناغەنە تاکتیکوو سابۊتاژی فرە دلێمانە باو نەبۍ، هامڕا ئەرڎاڵ بە هەوڵۍ و مانیایی وێش جە بواروو سابۊتاژینە بی بە پسپۊڕ. دوژمن بەرڎەوام ئا گولـلەتۊپ، کاتووشا و هاوەنۍ، کە نەتەقێنێوە فڕەشا دۍ یاگۍ جیاجیۍ. هامڕا ئەرڎاڵ کۊشا کەرێوە و تەقەمەنییشا چەنە وەش کەرۍ، هەوڵۍ دۍ وەراوەروو دوژمنی بەکارشا بارۊوە، چا بارەوە گەرەکما ویرەوەریێوە گێڵنووە.
ڕوێشا پەی ڕاوۍ چەنی هامڕا ئەرڎاڵی لوایمۍ دەوروبەروو دەگاو خورسێی گاباری، دماو ئانەیە پاگەرە بڕۍ گێڵایمۍ، هامڕا ئەرڎاڵ کوچێوە جە ئێمەوە دوور بۍ چڕیەیمێش عەلاساس، کە نەچیرێوەش گێرتەن. هامڕا ئەرڎاڵ فیشەکش نەتەقنابۍ ئێمەیچواتما ئاخۊ چەنییش ڕاوە کەرڎەبۊ لوایمۍ لاش. میەیمۍ گولـلە کاتووشێوە ٤٥ کیلۊییش پەنەن. دیاما پۊرە و واتش: "ئانا نەچیرەکەما! مشۊم ئارۊ ئا گولـلەیە بەرمێوە پەی یاگۍ وێما و تی ئێن تی-یەکەیشبەربارمۍ و کەرمێش بە بۊمب و دژوو دوژمنی چالاکییش پەنە کەرمێ". جانتا یان حیچچێوێوەما پەنە نەبۍ، کە وزمێشنە وەختۍ واتما با بلمۍ بنکەنە چێوی بارمۍ و وزمیشەنە ماچۊ نا دێر کەرۊ، چێش بۊ با بۊ مشۊم ئی کاتیوشایە یاونمێوە بنکە". تا یاوایمێوە بنکەکەما حەر جارە و یۊما ئا گولـلە کاتیوشایە ورگێرۍ. وزەما چەنە نەمەنەبۍ ئانە کە گەرەکما چێگەنە واچووش ئانەنەن هەرمانەو ئارۊی نەوزۍ سەوای. ئانەیە بە بنەما گێرۍ کە هەرمانەکۍ وەختوو وێشەنە پۊڕنۊ بیاونۊش ئاخر.
گەرەکما یۊ جە چالاکییە سەرکەوتەکا کە هامڕا ئەرڎاڵ بە تاکتیکوو سابۊتاژی کەرڎەبێش بە نموونە گێڵنووە، کە ئا وەخت جە مەنتێقەو بانۍ عەزیزاو گابارینە یاگێوە، کە دوژمن ڕۊنە چەنەش مەنێوە و شەوێنە چۊڵش کەرۍ بۍ. بەگردین سەروو خاکوو بانۍ عەزیزیوە، کەرڎەی چالاکی ڕۊنە فرە خەتەر بۍ، هامڕا ئەرڎاڵ بۊمبۍ چا یاگانە نیێرە، کە دوژمن بە ڕۊنە چەنەشابۍ و شەوێنە چۊڵشا کەرۍ. وایەرێوەش کێشنارەتا وار و چند گرووپێوە هجوومبەرڎەیش نزیکوو کەشەکەیۊ نیێرە، دماو ئانەیە کە دوژمنۍ لوۍ سەنگەرەکاوە، هامڕێکێما سەرسەعب بۊمبەکێشا تەقنێوە، هجوومشا کەرد و لوۍ سەروو دوژمنی، سیلاحۍ فرێشا دەسۍ کەوتۍ و بۍ حیچ زەرەرێوە گێڵێوە.
چا وەختانە گابارنە مشکیلەو نانی و وارڎەی فرە بۍ، هامڕا ئەرڎاڵ وەڵۍ چالاکیینە، نانێوە گولانەش دابۍ بە حەرهامڕاێوە، کە بەشدارییشا لە چالاکییەکەنە کەرڎەبۍ و پەنەش واتێبێنێ: "نانەکەی نەوەرڎۍ، دماو چالاکییەکەی وەختوو کێشیایۊنە وەرڎێش، ئەگەر ڕۊی یوەم دوژمن ناما، نیمەیش وەرڎۍ، نیمەکەی تەر پەی ڕۊی دماتەری و دماو چالاکییەکەی ورگێرڎۍ، تا وزەتا پەنە بۊ وەختوو کێشیایۊنە وەرڎێش". فەرماندێوە چانە بۍ فرە ورد ویرۍ و پلانی نیێرە. هامڕا ئەرڎاڵ وێش ئا چالاکییەیە ئامادە کەرۍ، پلانیش پەی نیێرە و نزیکۊ سەرپەرشتییش کەرۍ. هامڕا ئەرڎاڵ فرە چالاکیۍ سەرکەوتانۍ چانێش بێنۍ.
ئاخرۊ سەبارەت بە گەشمەرڎە ئەرڎاڵی حیچ چێوێوە هەن، کە گەرەکتابۊ واچدێش؟
دڵسۊزی و وەشەسیای هامڕا ئەرڎاڵی پەی وەڵاتەکەیش یەکجار فرە بۍ،. دایمە حەزش چانەیە بۍ، کە کەشەکاوە گەریلایەتی کەرۊ و پا سەروو ئانەیە گێرێرە. بەتایبەتی فرە حەزش جە گاباری بۍ، بەینوو ساڵاو٢٠٠٠-٢٠٠٣ێنە قۊناغەکاو ئەورووپاینە، بەرڎەوام بە تەلەفون پەیوەندیی بە ئێمەوە کەرۍ گابارنە. پەرەسانایەکاما پەنە یاونۍ. هەواڵوو دار، مێوەی و دەوەنەکا و ئا چێوا پەرسۍ، هەوڵۍ دۍ دۊخوو ئاگەیە بزانۊ. دایمە باسوو تاسەی و دڵتەنگیی وێش پەی گاباری کەرۍ، یانۍ سەرباروو ئانەیە ئەورووپانە بۍ، بۊتاننە و بەتایبەتی گابارنە ژیوۍ و فکرۍ هامڕایاش کەرۍ.
هامڕا ئەرڎاڵ بەرڎەوام باسوو گاباری پەی فرەو هامڕایاش کەرۍ کە وێش ڕێکوستەیش پەنە واتێبێنۍ و ئارێشا دلۍ ڕیزەکاو پارتیوە. پەوکای دایم ئا هامڕۍ کە ئینۍ حەزکەرێنۍ بلا گابار. یۊ چا هامڕایا گەشمەرڎە ئاڤاڕەش دێرسیم بۍ. گەشمەرڎە ئاڤاڕەش چەنی ئەرڎاڵی ئەورووپانە مەنەبێوە و فرە کاریگەریی ئادیش سەرۊ بۍ. ئاواتوو گاباری، کە هامڕا ئەرڎال پەی هامڕا ئاڤاڕەشییش ساز کەرڎەبۍ، وەختۍ یاوا گابار ئاما دی. هامڕا ئاڤاڕەش ماوێوە فرە گابارنە مەنۊ. پێسە هامڕا ئەرڎاڵی بە بەشداربییەی ڕاسواچانە و دروسوو وێش چەنی سروشتوو گاباری یۊشا گێرت و پێسە جەنگەوانێوە جەوهەری هامڕا ئەرڎاڵی بی بە ساعیبوو بەشداربییەێوە هەقەتینی و ڕاسواچانەی.
هامڕا ئەرڎاڵ دلێمانە پێسە فەرماندێوە دەم بەخوەی مشناسیۊ. جە ژیوای شۊڕشگێڵنینە فەرماندێوە سەرمەشق بۍ، کە ڕەنجی فرەش پەی وەڵاتی، گەلی و ئینسانیەتی کێشت. فەرماندێوە خاکەڕا، جەوێویەرڎە بۍ، کە بە ڕاسواچیی وێش لاو گردوو هامڕایاوە وەشەسیا بۍ. شۊڕشگێڵنیوە گەورە بۍ، کە پەی گردیما ڕەنجی فرەش کێشت و تارێخوو شۊڕشگێڵنیمانە یاگەپاێوە چانێش جیا ئاستۍ، کە حەرگیز ویر مەشۊوە. گەرەکما ئانەیە بواچوو کە پێسە جەنگەوانۍ و هامڕاێوەش، وێما بە ساعیبوو ئا میراتەیە بزانمۍ، کە پەیش جیا ئاستیمۍ و هەوڵۍ دەیمۍ لایقۍ ئادی بیمۍ.
س.ز
