فشارەکاو هێزەکاو دەوڵەتوو ئێرانی پەی سەرووژەنا و بنەیانەو گیانبەختکەرڎاو سەرەورڎای 'ژەنی، ژیوای، ئازادی' بەرڎەواما و چا چوارچوەیچنە سۊلماز حەسەنزادۍ واڵی یۊ جە گیانبەختکەرڎاو سەرەورڎاکەی و ٣ هامڕێش لاو ئا هێزاوە گیریۍ.
سیاسەتی سەرکوتکەرانەو دەوڵەتوو ئێرانی وەراوەروو ژەنا، چالاکا و بنەیانەو گیانبەختکەرڎاو سەرەورڎای 'ژەنی، ژیوای، ئازادی' بەرڎەواما.
تۊڕەو مافوو ئینسانوو کوردستانی وەڵاش کەرڎۊ، شەوەو ٢٧وو ئی مانگۍ حەر یۊ جە سۊلماز حەسەنزادۍ، واڵۍ 'محەمەد حەسەنزادە'ی یۊ جە گیانبەختکەرڎاو سەرەورڎای 'ژەنی، ژیوا، ئازادی' و یەرۍ هامڕێش بە نامەکاو 'شەیدا ڕەزاییۍ، شیرین خەیاتۍ و سیمین خەیات'ۍ جە بازگەو لوایدلۍ شاروو سەقزینە، هێزە ئەمنییەکا گێرتۍ و بەرڎێشا پەی یاگێوە نادیارۍ.
ئانەیچ وزیان ڕووە، حەسەنزادۍ و هامڕێکێش بەبۍ وشتەیڕووەو ئەمرەو دادوەری گیریێنۍ و تا ئیساتێچ چارەنویسشا نادیارا. دماو گێرتەیچشا، هێزەکاو سەر بە دەسەڵاتی ورشا کوان سەروو سۊلماز حەسەنزادۍ شاروو بۊکانینە و یانەکەشا وشکنێنە.
ئینە جە وەختێوەنە کە سۊلماز حەسەنزادۍ وەلتەرێچ ڕۊو ٥وو ئەیلوولی چەنی تاتەیش، ئەحمەد حەسەنزادە، دماو چڕیەیشا پەی ئیتلاعاتوو شاروو بۊکانی، دەسبەسەرە کریێبۍ.
س.ز
