دوای سەردانی شاندی ئیمرالی دەم پارتی بۆ لای هاوسەرۆکی پێشووی هەدەپە، لە کۆنگرەیەکی ڕۆژنامەنووسییدا ئاماژە بە وتەکانی فیگەن یوکسەکداغ کرا کە وتوویەتی: لەگەڵ پرۆسەکەداین و هەرچییەک بکەوێتە سەر شانمان ئامادەین بە خۆشحاڵییەوە جێبەجێی بکەین.

ئەمڕۆ، شاندی ئیمرالی دەم پارتی کە لە سری سورەیا ئۆندەر، پەروین بولدان و ئەحمەد تورک پێکدێت، سەردانی بەندیخانەی کۆجاعەلییان کرد و دیداریان لەگەڵ فیگەن یوکسەکداغ، هاوسەرۆکی پێشووی هەدەپە کەوت، شاندەکە هەروەها چاویان بە سەمرا گوزەل پەرلەمانتاری پێشووی هەدەپە کەوت.

شاندەکە دوای چاوپێکەوتنەکەیان کۆنگرەیەکی ڕۆژنامەنووسییان ئەنجام دا.

سری سورەیا ئۆندەر لە کۆنگرە ڕۆژنامەنووسییەکەدا وتی: دیدارمان لەگەڵ سەرۆک فیدان ئەنجام دا، تەندروستی و دۆخی باشە، چاومان بە نوێنەرەکەمان سەمرا کەوت، سڵاویان بۆ هەموو کەسێک هەبوو، سەبارەت بە پرۆسەکە سبەی فیگەن یوکسەکداغ لە هەژماری تۆڕە کۆمەڵایەتییەکانی خۆی لێدوان دەدات، بەڵام داوای کرد پێتان بڵێم؛ ‘ئێمە لەگەڵ پرۆسەکەین و هەرچییەک بکەوێتە سەر شانمان، ئامادەین بە خۆشحاڵییەوە جێبەجێی بکەین”، من پێش پێنج ساڵ ئازاد کرام، دیسان لێرە قسەمان کرد، لە ماوەی ١٠ ساڵدا ئەم وڵاتە زۆر شتی قورسی لەدەست دا، دوو شت هەن کە گەڕانەوەیان نییە، یەکەمیان ئەو کەسانەی گیانیان لەدەست داوە و دووەمیان کاتە، هەموو شەهید و قوربانییەکانی ئەم وڵاتە ڕێزی ئەم وڵاتەن، گەورەترین دیاری کە دەتوانین پێشکەشیان بکەین، کۆتایی هێنان بە شەڕ و تاجی ئاشتیی لەسەرنانە، ئێمە جددی و دڵسۆزین.

سری سورەیا ئۆندەر ئاماژەی بەوەشدا، منداڵانی ئەم وڵاتە، شایەنی ئەوە نین میراتی شەڕ وەربگرن، بەرپرسیارێتی ئێمە ئەوەیە کە وڵاتێکی ئاشتییخواز ڕادەستیان بکەین، گفتوگۆی نادرووست دەکرێت، ئەم زمانە بە قەدەر چەک زیان دەگەیەنێت، گوایە وڵات دابەش دەبێت، دوو زمان، دوو ئاڵا و هتد. لە ڕۆژەڤی ئێمەدا شتی وا نییە، باسمان نەکردووە و شتی واش نەوتراوە، شتی وا نییە، ئێمە ئامادەین لەگەڵ هەموو ئەوانەی گومان لە پرۆسەکە دەکەن دابنیشین، تەنها داواکاریم ئەوەیە کە واز لەم زمانە ژەهراوییە بهێنن.

وتیشی: ئێمە پرۆسەکە بە ڕوونی بەڕێوە دەبەین، بەڵام دوو خاڵی گرنگی هەیە، یەکەم جددی بوون و دووەم دڵسۆزییە، مافی ئێمەیە چاوەڕێی شتی وا بین، ئەم دەردە، دەردی هەموومانە، چاوەڕێین هەموو کەس بە ئەرێنی سوودمەند بێت، ئێمە زمانی خۆمان ناگۆڕین، لە دژی ئەم زمانە هێرشبەرە زۆرترین شت کە دەتوانین بیڵێین ئەمەیە، گەل بڕیاری دڵسۆزی دەدات، ئەمە هەفتەیەکە ئێمە لە ڕێگاین، لە ڕێگادا ئەوانەی داوای ئاشتی دەکەن، ئەوانەی باوەشمان پێدا دەکەن، ئەوان دەڵێن خێرا بن و جار بە جار ئاگادارمان دەکەنەوە، لەم بارەیەدا ویژدانی گەل ڕێگای ڕاست نیشان دەدات، ئەمە بەرپرسیارێتی هەموومانە.

سری سورەیا ئۆندەر، سەبارەت بە پرسیاری پەیوەندیدار بە چاوپێکەوتن لەگەڵ پارتە کوردستانییەکان وتی: بەڵێ بەردەوام دەبێت، دەم پارتی پیلانی بۆ دادەنێت.