گێرتەی و بێسەروشۊنکەرڎەی چالاکە سیاسی و مەدەنییا وەرکەوتوو کورڎسانینە بەرڎەواما
هەڵمەتەو گێرتەی و دەسبەسەرکەرڎەی چالاکاو وەرکەوتوو کورڎسانی، کە سەروبەندوو ساڵیاڎوو سەرەورڎای ژەنی، ژیوای، ئازاڎینە هەس کریابێوە، بەرڎەواما و بڕۍ چالاکۍ تەرێچ گیریۍ.
بە پاو هەواڵێوە کۊمەڵەو مافەکاو ئینسانوو کورڎسانی دووۍ چالاکۍ بە نامەکاو نەرگس سولەیمانۍ و فریشتە فەدایی فەڕۍ، خەڵکوو شاروو قوروەی هێزە ئەمنییەتییەکاو دەوڵەتوو ئیرانی، دەسبەسەرۍ کەرڎۍ و فاڕێشاوە پەی یاگۍ نادیارۍ. بە پاو زانییارییەکا، دەسبەسەرکەرڎەی ئی دووە کەسا بە بۍ وستەیڕووەو فەرمانەو دادوەری بییەن.
یاگۍ واتەینە، نەرگس سولەیمانییە وەڵتەرێچ وەختوو وێنیشانەدایەکانە دماو کوشیای ژینا ئەمینیۍ، هێزە ئەمنییەکاو ئێرانی دەسبەسەرە کەرڎە.
هاموەخت شاروو دێوڵانیچنە گەنجێوە ١٨ ساڵە بە نامۍ محەمەد زەند کەریمی، خەڵکوو دەگاو بلبلانی لاو هێزە ئەمنییەکاوە، دماو دایوەنەی و ئەشکەنجیوە فرەی دەستبەسەر کریا و فاڕییاوە پەی یاگێوە نادیارۍ و حیچ هەواڵێوەش نییا.
شاروو سنەیچنە دووۍ هاموەڵاتۍ بە نامەکاو کەیوان کەمانگەرنەسەبی و موختارر زارعی، جە چالاکە مەدەنییاو ئا شارەیە، هێزەکاو دەوڵەتوو ئێرانی دەسبەسەرۍ کەرڎۍ وفاڕیێوە پەی یاگێوە نادیارۍ.
بە هەمان شێوە شاروو خۊڕەمئاواو لوڕستانینە چالاکێوە بواروو ژیوگەی بە نامۍ ئەحمەد عەلیخانی هێزە ئەمنییەکا دەستبەسەر کەرد و پەی یاگێوە نادیارۍ فاڕییاوە و سەبەبوو گیریاکەیچش نویستەی بابەتین جە تۊڕەکۊمەڵایەتییەکانە.
جیا جە گێرتەی ئا کەسانە، دماو ویەرڎەی چند ڕوێوە چارەنویسوو بەشێوە جە گیریایا وەڵتەریچ دیار نییا.
پێسە کۊمەڵەو مافەکاو ئینسانوو کورڎسانی وەڵاش کەرڎەنۊ، شاروو دەڕەشاروو ئیلامینە هاموەڵاتێوە ٣٢ ساڵ، بە نامۍ ئەدیب هیمەتی ماوەو حەفتێوەن هێزە ئەمنییەکا گێرتەن و تا ئیساتۍ چارەنویسش نادیارا.
هاموەخت بە پاو هەواڵێوە تۊڕەو مافەکاو ئینسانوو کورڎسانی شاروو ئیلامینە بە تۊمەتەو بەشداری جە ڕاوڕسموو یوەم ساڵیاڎوو گیانبەختکەرڎەی موحسین قەیسەریینە، کە جە گیانبەختکەرڎاو سەرەورڎای ژەنی، ژیوای، ئازاڎی-ین چوار کەسۍ بە نامەکاو محەمەد حسێن قەیسەری (براو موحسینی)، عەلی شێرخانی، مەحمود سادقی و کناچەکێش بە نامۍ هودا سادقی گیریێبێنۍ. دماو چند سەعاتێوە محەمەد حسێن قەیسەری و مەحمود سادقی ئازاڎۍ کریێبێنۍ،وەلۍ تا ئیساتۍ چارەنویسوو هودا سادقیۍ وعەلی شێرخانی نادیارا و مەزانییۊ چکۊ گیریێنۍ.
بە پاو ڕاپۊرتێوە وڵێتەروو تۊڕەو مافەکاو ئینسانوو کورڎسانی جە مانگەو خەرمانانوو ئێساڵینە (٢١وو ئابی تا ٢٢ۍ ئەیلوولی) زیاتەر جە ٥٠٠ چالاکا وەرکەوتوو کورڎسانی چڕیێنێرە ناوەندە ئەمنییەکا و هەڕەشێشا وەنە کریێنە، کە بە حیچ نۊعێوە بەشداری مەراسیمەکاو ساڵیاڎوو سەرەورڎای ژەنی، ژیوا، ئازاڎینە نەکەرا و چا مانگێچەنە ١٦٢ چالاکۍ سیاسی و مەدەنیۍ و ئەنداماو بنەیانەو گیانبەختکەرڎاو سەرەورڎایەکەی گیریێنی، کە تا ئیساتێچ فرێشا گیریێنۍ.
س.ز
