جەسەرەتاو ئی مانگېوەو بەپاو ئامەرەکا گەریلای، جە ئاکاموو هجومە ئەرەگیریەکا سوپاو ترکی ئەرەگیری پۍ سەروو خاکوو پانیشتوو کورڎسانی زیاڎ جە ١٢٠ سەروازا ترکی کوشیېنۍ. ئامارەکۍ فرە چانەی زیاتەرېنۍ، بەڵام گەریلا تەنیا متاۋۊ ئا ژمارەیە پەشڕاس کەرۊوە، یاخوڎ گەریلا تەنیا ئامارېوە کە جە ڕاو بەڵگەیۊ سەلەمنۊش ۋەڵاش کەرۊوە.

چی جەنگەن فرەو جاری سوپاو ترکی ناچار بیەن جە ڕاو سۊچنای و بۊمبۋاران کەرڎەیۊ جەنازەکاش سۊچنۊ پۍ ئانەی نەبا بە بەڵگە پۍ شکسەکاش ۋەران ۋەروو گەریلاینە. بەپېچەوانەو ئامارە نا ڕاسەکا و بانگەشە بۍ بنەماکا سوپاو ترکی، تەنیا ئامارېوە متمانە پنە کریا کە جە بارەو ئەمارەکا زەرەرە گیانیەکا جەنگیوە وزیا ڕووە، ئامارەکۍ گریلاینۍ.. ئینە جیا چانەی بڕۍ جارۍ سوپاو ترکی بانگەشەو ئەرەگیرکەرڎەو مەنتیقېوە کەرۊ، بەڵام دیسان مۋینمۍ حەر چا مەنتیقەنە گەریلاکۍ ئازاڎیی کورڎسانی گورزەی گۊرۍ ئەو سوپاو ئەرەگیری شانا.

گەریلاکۍ یەژاستاری جە کەشە ئازاڎەکا کورڎسانینە سەلەمناشا کە بە ئیراڎەو قەناعەتۊ کریۊ دووەم سوپاو ناتۊی شکس پنە بارا. تەنانەت ئەردۊگان جە قسەکاشەنە داوش جە ۋڵاتە فرە نەتەوەکا کەرڎ کە بە ئاشتیانەو هېمنانە قۊرتەکاشا چارەسەر کەرا، ئینەیچ جە وەختېنە کە جە ۋڵاتەکەشەنە زیاڎ جە سەدېوەن ئیسفاڎە جە گرڎ شېۋە جینۊسایدۍ و کۊکوشیۍ کورڎا هۊرگېرۊ و خودو ئەردۊگانیچ تورکیاش جە ئاێروو جەنگیۊ تلنان، کە ئا ۋڵاتەشە ڕووەو شکسۍ گۊرەی ئابوری و کارەساتېوە بۍ هامتای ئاڕاسە کەرڎەن.

ئی جەنگە ئەرەگیریە کە ڕاسەوخۊ ئەردۊگان دژوو کورڎی فەرمانڎەیش کەرۊ، بېجگە جە درووا و کارەساتی حیچ دەسکۊتۍ تەرش پۍ ئا ۋڵاتیە نەبیەن کە لاف و جەندرمایی مەنتیقەکەی مڎۊوەنە. تەنانەڎ ئەردۊگان جە بەشېوە قسەکاشەنە هەڕەشېش جە ۋڵاتا ۋەرنیشتی کەرڎ، پۍ ئانەی بتاۋۆ پەی بە زینڎەیی قوتاربیەیش چی جەنگەیە هامکاری زیاتەرشا چنە هۊرگېرۊ. گردوو ئی پەلە قاژا ئەردۊگانی پەی ئامای دی وەرمېوەن کە جە هەنگامە سەرەتاییەکاسەنە چەقان و نەتاوانش جە مەغزوو ئەردۊگانی و هام ئاوازەکاشەنە ترازیۊ. ۋەرم و دلېنەبەرڎەی جەستەیی و کولتوری کورڎی. بەڵام جە خەتەو وەڵېوە ئی جەنگەینە گەریلا ۋەرگیری کەرۊ و ئاڕاسەو جەنگەکەی دیاری کەرۊ. ئانە بەدی کریۊ کە ئەگەر داواکاریە تازەکۍ ئەردۊگانیچ جابەجۍ کریا، سوپاو فاشیستی ترکی مەتاۊۊ چی جەنگەنە حیچ دەسکۊتېش بۊ. ئەنقەرە کە فرە بەعالی ئاگاڎاروو ئینەینە، دەسەو دامېنووو خائینا بەنام کورڎی جە پانیستوو کورڎسانی بیەن و جە ڕوانی ۋیەردەنە و دماو دیڎاروو هاکان فیدانی و خانەواڎەو بارزانی پەڕېوە تازە جە تاریخوو خیانەت و ئا خانەواڎەیە هوردریاوە.

هېزەکۍ سەر بە خانەواڎەو بارزانی چېروو نامۍ پاسەوان و سنورینە و چېروو ئاڵاو سوپاو عېراقینە بە بەهانۍ چۊڵکەردەی مەنتیقە سنوریەکانە جە پېسمەرگەکا ۋەرکەوتی دەسشا بە لەشکرکېشی پۍ ئا مەنتیقا کەرڎ، کە ۋەڵتەر پېشمەرگەکۍ ۋەرکەوتی جیاشا ئاستېبېنۍ. جە بنەڕەتەنە ئا مەنتیقۍ ۋەردەوام چېروو هەژموون و گەریلاینە بېنۍ و ئیسە بە ئەمرەو ئەنقەرەی و بە گۊشکەرڎەی خانەواڎەو بارزانی پلانەی تازۍ پۍ ئەرەگیری وپېشکەش کەرڎەی ئا مەنتیقا بە ئەردۊگانی ئینا ئارانە.

جەنگ و بەینوو گەریلای و سوپاو ترکی ئەرەگیری یاوان بە ئاستۍ کە چەمۍ دۊسی و دوژمنیش ئینۍ سەرۊ. بەتایبەتی چنی سەڎ ساڵەو لۊزانی، دلۍ کورڎەکانە هەنگامۍ عالۍ جە بواری سیاسینە هۊرگیریۍ پۍ ئانەی بتاویۊ بەشېوە جە باروو سەروو شانا گەریلای سوک کەرا. بەڵام خانەواڎەو بارزانی جە درېژەو خیانەتە هەمیسەییەکاشەنە حۊڵ مڎۊ تەماموو کورڎسانی و ئەرەنیشتاش سەروو دەس و دۊلەتوو ترکی ڕووبەڕوو کۊکوشی و قڕکەرڎەی کەرۊوە. ئەنقەرە کە جە ۋەران ۋەروو گەریلاینە ۋېش بە شکس وارڎە منیۊرە، گەرەکشا جە مەنتیقەکەنە کورڎەکا بڎۊ گژۍ هەنترینیرە یاخود گەلا تەریرە، یا ئەگەر پېس کریۊۋڵاتا تەریچ تلنۊ جەنگەکەیۊ. چی چن مانگا دماینە نا ئارامی و هجومی جیا جیۍ مەنتیقەکەنە ۋینیۍ، کە سەرە داموو گرڎیشا گېڵۊوە پۍ ۋەرپەرسا ترکی، جە ڕاسینە دۊڵەتوو ترکی چی ساڵا دماینە جە وەشکەرڎەی نا ئارامی و پشېوینە جە مەنتیقەکەنە، منافەسەو ئېرانی کەرۊ. ۋەرموو ئەنقەرەی ئانەن کە ڕەنگا بتاۋۊ چی ڕېوە      وەڵۍ بە جمیەروو ئازاڎیی کورڎی گېرۊ.

گەریلا بەتەنیا ۋەران ۋەروو ئی تەنگەژەو پشېویا جەهانینە مردانۊ و شانەش دان ۋەروو بارېوە قورسی، حەر پۊکەی گەریلا هیواش دڵ و گرڎ ئینسانۍ ئازاڎیوازینە جە سەران سەروو جەهانینە بە زینڎەی ڕاگرتەن. چی جەنگەنە کە هاموەخت چنی جەنگوو ئۊکرانیای و ڕوسیای ملۊڕاوە، بەڕۊشنی ۋینیۊ کە ئا هېزەی جەنگ کەرۊ جە سەروو چەک و تەقەمەنی وچەکڎاریۊ پەنەوازش بە ئیراڎەی هەن. گەریلا سەلەمنەروو ئینەین، حەرپېسە ۋینیۊ کە سوپاو ئۊکرانیای بەبۍ پاڵپەشتی ۋەردەوام و جە ڕادەبەدەر کە پنەش میاۋۊ، مەتاۊۊ ۋەران ۋەروو ڕوسیای مردۊوە، بەڵام گەریلا تەنیاپاڵپەشت بە ئیراڎەو ۋېش تاوانش پۍ ماوەو هەشت ساڵا دووەم گۊرەتەرین سوپاو ناتۊی چەقنۊ.

جە ڕاسینە ئینە مدرامانوو گەریلاین کە پاسەش جە ناتۊی و جەمسەرەکا تەروو جەهانی کەرڎەن جە هامکېشەکاشانە فاکتەرۍ فرە گونجنا. ئی جەنگەو بەینوو گەریلای و سوپاو ترکی دەرزی فرەش پۍ گردوو ئازاڎیی وازا چنەن و مدرامانوو گەریلای ورەش بە فرەو کەسا بەخشان. ئینە تەنیا بانگەشېوە بۍ بنەما نیا، ئاسانتەرین ڕا پۍ سەلەمنایش پەیوەس بیەی ژمەرېوە فرە جە گەنجا مەنتیقە جیاجیاکا جەهانین بە ریزوو گەریلایۊ. یاخوڎ بەڵگېوەتەرو دەسپنەکەرڎەو هەنگامۍ ڕادیکاڵېن جە هەناوو دیکتاتۊریەتە ۋن مجەکا پېسە ئېرانی جە ڕاو دروشمەو "ژەنۍ، ژیای، ئازاڎیی"وە. گەریلا بەتایبەتی ژەنە گەریلاکۍ بە درېژایی ساڵا کۊشیایشا تا ئیسە بەشېوە فرە کە نەفاڕیاتەرین شېوازەکا سیستمەکاشا فاڕېنۍ. دروشمەو ژیای کە جە لاو عەبدوڵا ئۊجالانی ڕابەروو گەلوو کورڎیۊ وزیان ڕووە، دروشمەو"ژەنۍ، ژیای، ئازاڎیی"نە کە جە ئیسەنە جە سەران سەروو جەهانینە هاوارس پۍ کریۊ و چەخماخەو جمیەری شۊڕشگېڵنی جە سنورەکا ئېرانی تا ڕاپیمای هەزاران کەسی جە دلۍ جەرگەو ئۊروپاینە بەر وزوو ئی ڕاسیەینە کە ئەردۊگان سەرەڕاو گرڎوو فشۍ و چەواشەکاریەکاش نەتاوانش جمیەری ئازاڎیی  سەرکوت کەرۊ، بەڵکم جمیەری ئازاڎیی بەپاو دلېینەو تایبەتمەندیەکەیش ڕووەش جە گەشەکەرڎەی کەرڎەن. متاۋیۊ واچیۊ کە ئی جەنگەو گەریلای بەبۍ مردای جە ماوەو هەشت ساڵانە ئەنجامشدان، نەک حەر جەنگېوەن ۋەران ۋەر بە ئەنقەرەی، بەڵکم جەنگېوەن بەینوو جەهانۍ کلاسیکی و جەهانۍ تازەینە کە ڕابەرو گەلا مژدەو ئامای دی ئا جەهانە تازەیشە دان.

مردنای جەهانی تازەی دەسەڵاتوو فاشیزمی ئەردۊگانی و دەسەڵاتوو سیستمی سەرمایەدارینە نیا. جە ئیسەیچەنە کە خیانەتکارا خانەواڎەو بارزانیچ بە لیستوو دوژمنا ئازاڎیی زیاڎۍ بیېنۍ، ئاڎېچ مەتاوا ۋەر بەسەرکۊتەی گەلا چەوەسیای گېرا. بە تەماشەکەرڎەیۍ ڕاسوو درووس کریۊ ئاسۊ و سەرکۊتەی گەلا ستەم ۋنە کریای بۋینیۊ.