گەریلاکۍ ئازاڎیی کوردسانی چێروو ئاڵاو پەکەکەینە بە قارەمانێتیێوە گۆرەو بێ دوودڵی ۋێڕاگری کەرانۍ.

جە کوردسانەنە ئیتر گەل سوپێوەش هەنە، کە ۋەران ۋەر بە گرڎ جۆرە هجومېوە متاوۆ ۋێش پارێزنۆ. ئا سوپۍ کە جە تەرەفوو رابەر ئاپۆی و جەنگاوەراشۆ ئەرەمەرزیێنە، جە روو تاکتیکیوە، رێباز و پڕۆفیشناڵیش ئینا قۆناغێوە تازێنە. بە چالاکیە داستانیەکاش پاسە کەرۆ کە زەرەری گیانی فرە ۋەروو دەوڵەت و سوپاو تورکی گنۊ. سوپاو تورکی کە پېسە یۆ جە بەقوەتتەرین سوپاکا پێناسە کریۆ؛ جە ئەنجامدای کۊکوشی مەدەنیەکا، بەکارئاردەی چەکی قەڎەغەکریای و تاڵانکەردەی سڵ مەکەرۊوە، سەرەڕاو ئانەیچ ۋەران ۋەر بە گەریلای بێچارە و دەسەوسان بیەن. سوپاو تورکی و وەزارەتوو جەنگی ئینۍ شۆکوو زەرەرە گیانیە دژوارەکانە مەزانا کە بە چ شێوێوە پەردەپۆشش کەرا. بە شارتەیۆ ژمارەو ئا کوشیایا جە دەزگا یاۋنەریەکانە، جەنازۍ سەروازەکا کە کۊتێنۍ مەشاریاوە.

قەسەمشا واردەن کە سەیەو دوژمنیچ نازاوە

جە ۋەرنیشتوو زاپی تا مەتینا، چاوە تا خواکورک گەریلا دلۍ ۋەروۍ و ۋارانی، سەردا و سۆڵەینە جە سەنگەرەکا دوژمنی مڎا، ئیراڎەو ۋێشا، پاگیری سەروو سەرکۊتەی جارێوەتەر نیشانە مڎا. دۆس و دوژمن گرڎ موینا کە گەریلا بە شێوێوە گیانبازی چنی ملا سەروو سەنگەرەکا و هەزاران سەروازا دوژمنی. جە ۋەران ۋەروو ماتەوزەو هێزوو گەریلاینە حیچ تەکنەلۆجیا و هێزێوە مەتاوۆ ۋێش گێرۆ. گەریلا کە سەروو دڵسۆزی و پابەندی بە ئازاڎییوە گەل و رانماییەکا رابەرایەتی گرڎ ڕووۍ ۋێش پەروەردە کەرۆ و جە تاکتیکەنە ۋێش تازە کەرۊوە، وەعدش دان و قەسەمش واردەن کە جە کەشەکا کوردسانینە سەیەو دوژمنیچ نازاوە.

بۊ بە دەرمانوو دڵوو گەلوو کوردی

پېسە مزانیۆ جە هەرێموو ۋەرنیشتوو زاپینە هێزەکاو گەریلای جە چوارچێوەو هەڵمەتەو گەشمەرڎە ساڤاش مەرەشی، جەنگوو خابوری و ئۆپراسیۆنوو شۆڕشگێڵنی گەشمەرڎە هەڵمەت دێرەلوکینە جە مېڎانەکا مدرامانوو کەش و ئامێدینە جە دژوو سەنگەرەکا دەوڵەتوو تورکی چالاکیشا کەرد. چی چوارچێوەنە لاوکەمیۆ ٦١ سەروازۍ کوشیۍ. هاوار و ناڵەو سەروازەکا و جەنازەو سەروازەکا کە سەروو ۋەروێوە کەوتێبێنۍ، حەرپاسە سەنگەرەکۍ سەروازاشا سۊچنۍ، جە کامێرەو گەریلاکاوە تۆمارکریۍ. توڕەیی حەقکەردەیۆ و جۆش و خرۆشوو سەرکۊتەی گەریلای سەرەڕاو ۋەروۍ و سەردایچ دیاربۍ. ئا هەڵمەتۍ گەریلای، بۊ بە  دەرمان پۍ سەروو دڵوو گەلوو کوردی.

دەوڵەتوو تورکی یەرۍ ساڵێن بانگەشەو ئانەی کەرۆ کە تەنیا یەرۍ مانگۍ مەنەن، دمایی بە گەریلای مارمۍ و پی جۆرە گەلوو تورکیای هۊرخەڵەتنا. ئینە جە وەختێنە گەریلا سەرەراو دەرفەتە کەمەکایچش بە ئیراڎێوە پۆڵایین، بە گیانی ئاپۆیی، پەشتیش بە میراتوو مدرامانوو پەکەکەی بەستەن و رووە جە دیدگاو کوردسانی ئازاڎیی و رابەری ئازاڎیی کەردەن، پی جۆرە جە دژوو سوپێوە پا جۆرەیە جەنگ کەرۆ کە ئا سوپۍ سڵ جە حیچ تاوانێوە مەکەرۊوە. گەریلا گرڎ جارێوە ئانەی ۋیروو دوژمنی مارۊوە کە کەس مەتاوۆ تەمەنێوە پۍ جمیەروو ئازاڎیی کوردی دیاری کەرۆ. گەریلا جە مەتیناوە تا ئاڤاشین، جە زاپۆ تا خواکورک و چاوە تا چوار پارچەو کوردسانی نوقتۍ و وەربەسوو پارێزنای وەش کەرۆ.