ئانتۊنیۊ گۊتېرێز، سکرتېروو گرڎینەو نەتەوە یۊگېرتەکا، جە کۊبیەیۊ باڵای تایبەت بە پەرسەکا کەشوو هەوای جە جەمەو گرڎینەو نەتەوە یۊگېرتەکانە قسېش کەرڎۍ.

گۊتېرێز ۋاتش،"قەتیس بیەو گەرمای مەڵامەتوو گەرمبیەی گەردونیا، ئېساڵ بی بە مەڵامەتوو گەرمبیەی جە ڕادەبەدەری و زیاڎ بیەی ئاێر کۊتەیۊ".

ئانتۊنیۊ گۊتېرێز، سکرتېروو گرڎینەو نەتەوە یۊگېرتەکا باسش چانەی کەرڎ،" مرۊڤایەتی بەرەکۍ جەهەنەمیش کەرڎېنېوە. گەرمبیەی زەمینی زەرەرۍ مەتەرسی دارېش هەنۍ، ئا جوتیارۍ حاڵشا پەرېشان بیەن، ۋەرهەمەکېشا بە مەڵامەتوو لافاویۊ دلېنا مشا. قەتیس بیەو گەرمای بۊ بەمەڵامەتوو زیاڎبیەو نەوەشیەکا و فرەبیەو حاڵەتەکا ئاێر کۊتەیۊ. بەهەزاران ئینسانېچ تەرسینە ئاوارۍ بیېنۍ".

ئەمریکاو چین کە دووە گۊرەتەرین هېزېنۍ کە با بە مەڵامەتوو پیس بیەی ژیۋگەی، بەشڎاریشا جە کۊبیەیۊ باڵای تایبەت بە ئاوو هەواینە نەکەرڎەن. حەرپاسە بەریتانیایچ ڕاش جە بڕۍ وەعدۍ تایبەت بە کەمکەرڎەیۊ فاڕیایەکا کەشووهەوای گېرتۍ.

سکرتېروو گرڎینەو نەتەوە یۊگېرتەکا باسش چانەی کەرڎ، هەڵای دېر نەبیەن کە ئاستوو گەرم بیەی زەمینی جە پلەو ١.٥ینە ڕاگیریۊ، ئاینڎە ئینا دەسوو سەرکردەکانە.

سکرتېروو گرڎینەو نەتەوە یۊگېرتەکا ئیشارەتش پانەی کەرڎ،"ئېمە هەڵای متاومۍ جەهانېوە جە هەوای پاکی، هەرمانەی پاکۍ، وزەو دۊسوو ژیۋگەی بنیاڎ بنیەیمۍ".