گوڵستان تارا و هێرۆ بەهادینە پېسە دووۍ هەسارا جە ڕووبەری تاریکینە زەریفی حەقیقەتی و هیوای بەخشاوە،  چا جوگرافیانە کە چنەشەنە ژیوێنۍ ۋەرگرییشا جە ئازاڎیی کەرڎ. قەڵەم و کامێرەکەشا جە ۋەرا ۋەرو تاریکی ستەمینە پېسە چراوێوە هۆرکەرڎ؛ بیۍ بە هەنگامېوە کە تاریکی مڕەمنۆوە و بیۍ بە سیمبوڵو مڎارمانی و ئازاڎیی.

هەر وشێوە کە جە قەڵەمو گوڵستانۍ و هیرۆیۆ نویسیێوە، سەڎێوە جە حەسرەتو ئی خاکیە بەروزۍ. ئەرەکۊشایشا پېسە سرودەو زەریفی ئازاڎیی جە دڵو کورڎەسانینە دەنگش داوە و پەی هەمیشەیچ دەنگ مڎۆوە. چی خاکەنە هەر هەنگامێوە پەی ئازاڎیی و حەقیقەتی بنریۆ ئانە ڕاو ئاڎیشاش چنە موینیۆ و ئا میراتەی کە ئاڎۍ پەیشا جیا ئاستێنمۍ نیشانەو جیلی تازەیش مڎۆ.

دەنگشا هرووژمەکەش ۋییەرنا

ئی دووە ژەنە ڕۆنامەوانۍ کورڎی جە ٢٣ۍ ئابینە جە ئاکاموو هرووژمۍ وەحشیانەو دۆڵەتو تورکینە تیرۆرۍ کریۍ، بەڵام دەنگو پارێزنەری حەقیقەتییشا ئی هرووژمشە ۋییەرنا. نەک تەنیا ئێش و هیواو گەلاشا بە دنیارە وەڵاکەرڎۆ؛ جە هەمانکاتەنە بیۍ بە سیمبولی زیڼەو ئەرەکۊشای پەی ئاینڎەی بەشکۆو ئی خاکیە. بە هەر هەنگامېوە، بە هەر وشێوە پەی ئانەی ئەرەکۆشای ڕەواو گەلوو کورڎی بیاونا بە جیهانی، بەبێ مردای هەرمانەشا کەرڎە. قەڵەم و کامێراکەشا بی بە دەنگو گەلی و تاریخو مڎرامانی.

دۆڵەتو تورکی و هەمکارەکێشا، دوڵسۆزی گوڵستانۍ و هێرۆییشا بە مەرام گێرت، بەڵام حەجگیز نمەتاوۆ دەنگو حەقیقەتیشا کپ بکەرۆ. هەڵوێسی ۋەرگریکارانەو گوڵستانۍ و هیرۆی چی خاکەنە گرڎ ڕوۍ قەوەتتەر مبۆ. ئەرەکۊشایشا دمایش پنە نامان؛ بە پێچەوانۆ جە هەر گێڵایۍ ئازاڎیی و پارێزنای حەقیقەتینە سەر جە نۆ زیڼە مبۆوە. میراتی جیامەنەو هەردووە ڕۆنامەوانی قارەمانی، نەک بە تەنیا پەی گەلێوە، بەڵکم ئەرەکۊشای شکۆدارانەو مرۆڤایەتیشا ڕۊشن کەرڎۆ و مکەرایچش.

تاوانەی دژە مرۆڤایەتیە جە ۋەرا ۋەرو حەقیقەتینە

هەواو کورڎەسانی گرڎ کاتێ ئاسەوارو ئێشی و مڎرامانی جە ۋێشەنە هۊرمگێرۆ. ئی هەوا تەژییە جە مڎرامانەکا هامشێوەو گوڵستانۍ و هېرۆی. ئادۍ پەی ئانەی بانۍ بە دەنگو گەلوو کورڎی قەڵەم و کامێرەکەشا پېسە تفەنگێوە کەرڎ شانەشا. ئاڎۍ تەنیا نەبیۍ بە شایەتۍ ئا کەسا کە شۊنەو ئازاڎیرە مگێڵا، جە هەمان کاتەنە بە وشەکاشا ئەرەکۊشایشا گێڵناوە. دژو ئا کەسا بېنۍ کە هەوڵ دێنۍ بە تاریکی زوڵمی و خیانەتی گېڵای ئازاڎیی ئاستەنگ بکەرا. دۆڵەتو تورکی و هامکارەکێش جە بانگەوازو حەقیقەتو ئی دووە ژەنەیە تەرسۍ و بە مەرامشا گێرتۍ. ۋەرو ئانەی ئا حەقیقەتا گێڵنێنێوە بە شێوێوە دڕنڎانە تیرۆرۍ کریۍ. ئی هرووژمە نەک تەنیا کۆمکوژی ڕۆنامەوانان، جە هەمانکاتەنە تاوانێوە گۆرۍ مرۆڤایەتییەنە کە دژوو ژەنۍ، ئازاڎیی و حەقیقەتی ئەنجام دریا.

ئا قیمەتۍ کە گوڵستانە و هیرۆشا نەمرۍ کەرڎۍ ئارۆنە شێوە مڎۆ بە ئایندەو گەلوو کورڎی. فیداکاریشا پېسە ۋەری سەرو ئی خاکەیرە بریقە مڎۆوە، تاریکی مڕەمنۆوە.

یاڎەوەرییەکۍ گوڵستانۍ و هیرۆی و گرڎوو گەشمەرڎاما مبۆ بە ئەرەکۊشای زەریفی ڕۊشنایی و جە ئەرەکۊشای نەوەکا ئاینڎەیمانە بەردەوام مبۆ

سەرکۊتەی حەقەتینە بەردەوامیداین بە میراتو ئاڎیشا

ڕوێوە حەقەو گوڵستانۍ و هێرۆی مکریۆوە. سەرکۊتەی حەقەتینە، ئازایی و ئیراڎەشا میاونمۍ بە جیلی تازەی. یاڎەوەرییەکۍ ئی دووە ژەنە قارەمانا جە ئەرەکۊشای ئازاڎیی کورڎەسانینە پېسە شۊڵەچراوێوە بەردەوام مبۆ. ئەرەکۊشایشا نەک بەتەنیا پەی شکۆو گەلا، جە هەمانکاتەنە بەشێوەن جە ئەرەکۊشای بە شکۆو مرۆڤایەتی. مرۆڤ هەرچڼە هەوڵ بڎۆ ڕاسی سەرکوت بکەرۆ، ڕوۍ ڕاسی هەر سەرە بەرمارۆوە. گوڵستانە و هێرۆ زانێنە کە گەل بە بێ ئازاڎیی و حەقیقەتی نمەتاوۆ بژیۋۆ. پارێزنای ئا بەهایا پەی ئاڎیشا نەک بەتەنیا ئەرکێوە بۍ، بەڵکم پەنەوازیێوە بیەیچ بۍ. هەر هەنگام و وشێوە ئاڎیشا پی هۆشمەندیۆ شێوە گێرۍ. ئا ئێشەی گەلوو کورڎی چەشێش ئیراڎةو ئاڎیشا قەوەتتەر کەرۍ. بە ئەرەکۊشای ۋێشا حەقیقەتو باوەڕی گەلی ئازاڎیی و گێڵای ئازاڎیشا بە گرڎوو دنیێرە وەڵا کەرڎۆ.

خیانەت یاوان بە ئاستێوە کە ئیتر چەمپۆشیش ۋنە نمەکریۆ

گوڵستانە و هێرۆ نەک تەنیا ڕۆنامەوانێوە ئازۍ گێڵای شۆنەو حەقیقەتیرە بێنۍ؛ جە هەمانکاتەنە ئا خیانەتە ترسناکەو سەرو گەلوو کورڎیشا تۆمار کەرڎ. فرە بەڕۆشنی خیانەتو ئا کەساشا نیشانەدا کە چنی پەی بەرژەوەندی ۋێشا پەشتیشا کەردێنە جە ئەرەکۊشای ئازاڎیی گەلا. بە مەرام گێرتەی ئی دووە ژەنە قارەمانا جە لایەنو هەمکارا دۆڵەتو تورکیوە بەرش وست کە خیانەت چڼە کاولکەر و قوڵا. گوڵستانە و هێرۆ بە قەڵەم و کامێراکاشا دەمامکو ئی خیانەتەیشا هۊرماڵا و تاوانەکۍ دژ بە گەلیشا تۆمارۍ کەردۍ. تیرۆرکەردەیشا ئانەش نیشانەدا کە یاوان پا ئاستەی کە ئیتر نمەتاویۆ چەمپۊشیش ۋنە بکریۆ. جە هەمانکاتەنە ئی کۆمکوژییە پەی گەلوو کورڎی بانگەوازین جە دژوو خاوەنداریکەردەی جە خیانەتی، پەی بنیاڎ نیای یۆبیەین.

گرڎ کاتێ مبانۍ بە سەرچەمەو ئیلهامی

ڕۆنامەوانا ئەرەیاۋنای ئازاڎیی هیچ کاتێ نمازا حەقەتینەکۍ جە تاریکینە گومۍ با. قەڵەم و کامێرەکێشا بە تەنیا ئامێرێوە نەبێنۍ، بەڵکم جە ڕاو ئازاڎیینە هەنگامەی ئازایانۍ بۍ. وەشەسیایشا پەی وڵاتی و لکەدایش بە وڵاتو ۋێشاوە بەردەوام مبۆ و ڕاو ئاینڎەو گەلوو کورڎی ڕۊشن مکەرۆوە. یاڎەوەرییەکێشا تا ڕۆو ئازاڎیی ئی خاکیە، پېسە سەرچەمەو ئیلهام بەخشیینۍ زیڼۍ مبا. ئا میراتییەی کە جیاشا ئاستەن، جیلی تازە پنەش مزانا کە چڼە پەی ئاینڎەو ئازاڎی و حەقیقەتو گەلی گرنگا.

گوڵستانە و هێرۆ نەک تەنیا پەی ئا سەردەمەی چنەشەنە ژیۋۍ، بەڵکم پەی جیلی تازەیچ پېسە سەرچەمەو ئیلهامی یاڎۍ مکریاوە. ئەرەکۊشایشا جە گێڵای ئازاڎیی و ئیراڎەو گەلوو کورڎینە گرڎ کاتێ یاڎ مکریۆوە.

هەرچنەی هەوڵ بڎا باوەڕداری گەلی بە حەقیقەتی و ئازاڎیی سەرکوت بکەرا، ئانە گرڎ کاتۍ ڕێوە موینۆوە پەی سەرهۊردایۆ ۋێش. هەنگامەکۍ گوڵستانۍ و هێرۆی بانۍ پا شۆڵەچراوۍ کە جە ئاینڎەنە پېسە شایەتحاڵۍ زیڼەی پەی ئی حەقیقەتەیە گەشێ باوە.

ۋەرپرسیاری هەرە گۆرەما

یاڎەوەرییەکێشا پېسە شۆڵەچراوەو مڎرامانی و گێڵای ئازاڎیی گەلا ڕۊشن مکەرۆوە. جە ئیساتێنە ئەرکی هەرە گۆرەو ئێمەن کە میراتو ئاڎیشا زیڼە ڕاگێرمۍ و درێژە بە ئەرەکۊشای دادپەرەوەری بڎەیمۍ. ڕاو گوڵستانۍ و هێرۆی مبۆ بە هیوایۍ پەی ئاینڎەی، ئەو میراتییە قەوەتەی کە پەیشا جیائاستێنمۍ گرڎ کاتێ پېسە سیمبوڵو مڎرامانی و ئازاڎیی درەوشیۆوە.

نەریتو ئەرەیاۋنای ئازاڎیی کە گوڵستانە و هێرۆ نوێنەراتیش کەرێنۍ، گرڎ کاتێ پەی ئەرەگیرا بیەن بە تەرسێوە گۆرۍ. ئی نەریتە ئێش، مڎرامان و هیواکاو گەلوو کورڎیش بە دنیارە وەڵۍ کەرڎێوە، هەر پۊکەی هەوڵمڎا کۆششکارا ئەرەیاۋنای ئازاڎیی کپ بکەرا. گوڵستانە و هێرۆ ۋەرو ئا مەڵامەتیە کریۍ مەرام. ئانۍ کە شۊنەو ئاڎیشارە مەیا قەڵەماکاشا هۆرگێرا و نمازا زەمەیەنە مەناوە. نەریتو ئەرەیاۋنای ئازاڎی بە میراتو ۋێشۆ پارېزنای حەقیقەتی بەردەوام مکەرۆ. گرڎ کاتێ گێڵای حەقیقەتی دژوو ئا کەسا مبۆ کە گەرەکشانە ڕۊشنایی حەقیقەتی خامۆش بکەرا.

جە ئەرەیاۋناو کورڎی ئازاڎیی متەرسا

دەوڵەتو تورکی پۊکەی جە ئەرەیاۋناو کورڎیی ئازاڎیی متەرسۆ، چونکی گرڎ کاتێ سیاسەتەکا فشاری، ستەمی و خیانەتی بە شیێوێوە ڕۆشن ئاشکرا مکەرۆ. ئەرەیاۋنای کورڎیی ئازاڎی بە پارێزنای حەقیقەتیوە ڕۊشنکەردەیۆ گەلی و قەوەتکەرڎةی مڎرامانەکا جە دژوو فاشیزمی مسۆگەر مکەرۆ. سیستەمو کۆڵۆنیالیستی دۆڵەتو تورکی گرڎ وشە و هەواڵێوە کە نمازۆ حەقیقەت جە تاریکینە گوم بۆ، پېسە مەترسیێوە پەی سەرو ۋێش موینۆ. ئەرەیاۋناو کورڎیی ئازاڎی تەنیا هەواڵ نمەڎۆ؛ جە هەمانکاتەنە مبۆ بە دەنگو ئەرەکۊشای گەلی و ئی دەنگەیچە مبۆ بە تەرسی هەرە گۊرۍ دۊڵەتو تورکی. هەڤاڵەکێما گوڵستانە و هێرۆ ۋەرو ئانەی نوێنەرۍ هەرە قەوەتۍ ئی نەریتەیە بێنۍ، پۊکەی کریۍ مەرام.

پېسە فەخری و ئەرکی قبوڵش مکەرمۍ

گەشمەرڎۍ گوڵستانە و هێرۆ نەک تەنیا پیشە، بەڵکم ئاڵاو مڎرامانی و هیوایشا دا بە کۊششکارا ئەرەیاۋنای ئازاڎیی. جە ۋەرا ۋەرو ستەم و زۆردارییەکانە قەڵەم و کامێرەکێشا پېسە چەکێوە قەوەتی بەکار ئارڎۍ. وەختۍ کە میراتی ئاڎیشا هۊرگێرمۍ، جە ئەرەیاۋناینە پڕمێوە؛ ۋەرپرسیاریۍ گېرمۍ ئەستۆ کە ئازایی و ئیراڎەشا ڕۆ بە ڕۆ زیاتەر مکەرۆ. دلۍ ئی میراتیەینە ئەرکو ۋییەرنای گرڎو ئاستەنگیەکا، بەروستەی حەقەتینەکا و یاۋنای دەنگو گەلی بیەیش هەن. گەشمەرڎەکێما نەک جە گێڵای شۆنەو حەقیقەتیرە شکسشا نەوارد، بەڵکم بیۍ بە هێماو زاڵبیەی سەرو سەختییەکارە. چی میراتیەنە سەرەڕاو ئانەی ڕووبەڕوو فشاری، هەڕەشا و سەختییەکا بیمێوە، پەی ئێمە بەماناو ۋەرپرسیاری نویستەی و وەڵاکەرڎەیۆ حەقیقەتین. ئا هەنگامۍ ئاڎیشا جیاشا ئاستە پېسە سیمبوڵو ئازایی، مڎرامان و فیڎاکاری ئەرەیاۋنای ئازاڎیی، گرڎ کاتێ غیرەت و ئیلهامما پنە مڎۆ. پۊکەی سەرو ڕاو ئاڎیشا پارېزنای ئازاڎیی و حەقیقەتی نەک پېسە پیشەی، پېسە شەرەفی و ئەرکێوە موینمۍ.

سەرو ڕاو گوڵستانۍ و هێرۆی پەی ئازاڎیی و پەی ئاینڎەی بەشکۆو کورڎەسانی، ئەرەکۆشمۍ، بنویسمۍ و شیکەرڎةیۆ بکەرمۍ.