پەی ئانەی گوڵستانەکۍ ئی وڵاتیە تیرۆرۍ نەکریا و پەی ئانەی وڵاتما بێ گوڵستان نەبۆ پەنەوازا گرڎوو گەلوو کورڎی، ڕۆنامەوانا، شۆڕشگێڵنا، ژەنا و گرڎ مرۆڤێوە ئازاڎیواز ۋەرەنگارۍ فاشیزمو دۆڵەتو تورکی باوە.
ئی چن ڕووە گەرەکم بۍ دەربارەو گوڵستانەو ئێمە، گوڵستانەو وڵاتەکەیش، گوڵستانەو گەلەکەیش و هەمڕاکاش بنویس و. بەڵام ۋەرو ئا ئێشەی کە ئینا دڵمەنە و سەرەمەنە خولیۆوە، پۊکەی متەرس و قسەکێم لاوازۍ با جە ئاستو ستایشکەردەی و باسکەرڎەی گوڵستانێنە. ئانۍ گوڵستانەشا ئشناسێنە بیێنۍ بە شایەتۍ ڕاسی ئاڎۍ، بەڵام ئانۍ کە نەشناسێنەشا و نەڎیێنەشا جە فرەو چێوا مەحرومۍ بیێنۍ. چونکی چانسو ئشناسای مرۆڤێوە زەریفێشا جە دەسدا. سەختی پێناسەکەرڎەی گوڵستانۍ تەنیا ۋەرو ئانەی نیا کە ژەنە ڕۆنامەوان، شۆڕشگێڵنە و جەنگەوانۍ ئازاڎیی ژەنێنە.
تیرۆرکەرڎەی گوڵستانۍ فرە سەختا، چونکی فرە ڕێزدارە بۍ. مرۆڤێوە پاکە و بەویژدانە و دلۆڤانە بۍ. چی سەردەمەنە فرە بەکەمی تووشوو مرۆڤێوە پېسە گوڵستانۍ مبی. چونکی گوڵستانە زانۍ چێشش گەرەکا. کارەکتەرێوە ڕۆشنایش جە مەرامو ئازاڎیی ۋێشەنە وەشکەرڎەبۍ. کار و مېڎانو هەرمانکەرڎەیش دیاربۍ، مرۆڤێوە پا جۆرۍ بۍ کە فرە عال زانۍ کە چێشش گەرەکا و داواو چێشی مکەرۆ. گوڵستانە زانۍ چنی هەمڕایی بکەرۆ، چنی خەبات بکەرۆ و چنی جە دژوو نادادی مردۆوە. زانۍ کە چنی توڕەییەکاش جە ۋەرا ۋەرو ناداپەروەریینە بەروزۆ. هەستەکۍ گوڵستانۍ فرە قوڵۍ بێنۍ. هەستو هۆشمەنڎی حەقیقەتی و عەشقو ئازاڎیش جە ۋێشەنە یەکانگیر کەردێبێنۍ. گوڵستانەکێما هەر بەڕاسی پېسە نامەکۍ ۋێش ولی و گوڵستانە بۍ.
پېسە ئانەی کە چنی دلۍ گوڵشەنێوەنە گوڵی ڕەنگاورەنگ هەن، گوڵستانەیچ مرۆڤێوە ڕەنگاوڕەنگەی فرە زەریفە بۍ. پەی هەمڕاکاش هەمیشە هەمڕێوە عالە، گۆشگیرە و ڕانیشاندەرە بۍ. بڕۍ وەختۍ بە هەستو ئەڎایۆ جە دڵۆ هەست بە ئێش و دڵو هەمڕاکاش کەرۍ، سەرەڕاو ئانەیچ حەجگیز جە ۋەرا ۋەرو لاوازییەکانە سازش نەکەرۍ. پېسە شۆڕشگێڵنێوە سەرو گرڎ لاوازییەکارە ۋییەرۍ و نیشانەش دا کە مرۆڤ کەموکوڵییەکا ۋێش بوینۆ. گوڵستانە حەجگیز جە هێڵۆو ۋێش پاشیمانە نەبێوە بەڵام مرۆڤێوە خاکیە و بەخشندۍ بۍ، هەرپۆکەی گرڎ کاتێ شیاوەو ڕەزامەڼی هەمڕاکاش بۍ.
کوردسانەنە دیار نییەن کەی و چکۆ گەشتوو ژیوایت دماییش مێ
گوڵستانە کەموکەسرییەکاو وێش قبووڵی کەرێ و زانێ چەنی داواو چەنەویەردەی بکەرۆ، گرد جارێوە وێش بە ساعیب حەقە نەزانێ و کەسێوە بەخشندێ بێ، وەختێوە زانێ غەڵەتێوەش کەردەن قبووڵش کەرێ و گوڵستانە نیگەرانە بێ وەراوەرو ئینسانە ئاڵۆزەکاوە. ساڵەو ٢٠١٠یوە مشناسووش، دلێ ئی ساڵانە هەرمانەی هامبەشەما پێوە نەبێ،وەلێ پەی هەرمانێ ڕۆنامەوانیێ یۆی گێرێنمێوە، هیچ وەخت هەستوو ئانەیم دلێنە وەش نەبییەن کە ثێوە نمەژیومێ، فرە خاس یۆترینی ئشناسێنمێ،گرد جار چێوەکاما پەی یۆترینی هامبەش کەرێنمێ. بەدڵێوە ئاسودەوە متاوو بواچو کە تایبەتمەندیی حەرە گەورە و بێگەردش ڕووەوەشەکێش بێ.
٢٠ ڕوێ وەڵێ گەشمەردەبییەیشنە پیوەرە بێنمێ، سەروو ٢٠ ئەوەکۆڵیایاوە هەرمانە کەرێنمێ گەرەکمەن یادەوەرییوە ئا وەختەیتا پەی باس بکەروو،کە هەرگیز هۆشم نمەشۆوە، هامڕاێوە ڕۆنامەوانما چا بەرهەمەن داواو یەرێ نویستەیاش وەنە کەردا، وەختوو نویستەی بابەتەکەینە گوڵستانە گەرەکس بێ نویسەتەیەکەیم بوانۆوە. فرە گرنگیی بە هەرمانەو ڕەفێقەکاش دێ. دماو ئانەیە نویستەیەکەیش وانانێوە بە ڕووێوە غەمگینەوە پەنەش واتا " ڕوێوە نویستەێوەم پەی منویسی؟"بەخووەوە پەنەم واتە "حەر ئیساتێ پەیت منویسوو" و واتش:" حەر بەجیددی پەیم منویسی؟" پەنەم واتۆ بەڵێ پەیت منویسو تۆ هامڕێمەنی و شایەتەو هەرمانێ و ژیوایتەنا.پەنەش واتاوە " گەرەکمەن ڕوێوە بوانووشۆ". پەنەم واتە" هەروەخت ئی هەرمانێ تەمامیا پنەت ماچووە" دمایی واتش:" گەر ڕوێ گەشمەردێ بیا، تۆ بنویسەش" پەنەم واتۆ نا. هومێد مکەروو ئا ڕووەیە نەوینوو. دمایی دەسش گێرتا و واتش" نا گەرەکم نییەن ئا رووەیە، بوینوو و هومێد مکەروو کە من و تۆ یانەئاوای جە هامڕایەکاما نەکەرمێ" ئاخ گوڵستانەکێم ئانە ئیسە بە چەمێوە پەڕ هەڵسێ و دڵیوە خەمگینۆ و قەڵەمێوە لەرزیاوە، تۆ منویسووە...
چند ڕوێن ڕسمو گوڵستانێ سەروو میدایەکاوە هەنێ، هەڵای باوڕم نییەن کە لوێنە، نا...بڕوا بە لوایش نمەکەروو. وەڵێ چند ڕاو اوەڵێ مەردەیشنە پێوەرە بێنمێ و خواحافیزییما وەنەو یۆترینی کەرد و قەرار بێ یۆترینی بوینمێوە.حیچ کامام نەزانێنمێ کە یۆترینی نمەوینمێوە. ئیساتێچ باوڕ بە هەواڵوو مەرگیت نمەکەروو، وەلێ وەختێ ویرێ مکەرووە ئینە هەوەڵ جار نییەن کە خاستەرین هامڕایەکاما جەدەس بدەیمێ، چونکوم ئێگە کوردسانەن و دیار نییەن سەفەروو ژیوای کەی و چەنی دماییش مێ.
گەر دوژمن پەکەکەی دلێنە بەرۆ ئانە مافوو ژیوای نمەدۆ بە هیچ کوردیوە.
هەڵبەت ژیوای و مەردەی ڕاسیێوە ئی ژیوایەینێ، گردوو گیانداراو ئی ژیوایە ئەزموونش مکەرا، وەلی ئێمەی کورد مەردەێوە سرووشتی نمەمرمێ، مکوشییەیمێ و تیرۆرێ مکریەیمێ. خەڵکانێوە کە بە ئاسایی مژیوانە بە ئاساییچ ممرانە، وەلێ کورسانەنە چونکوم ژیوای ئاسایی نییەن مەردەیچ هەمان چێو، بە پیلانە و تەڵە و خیانەت تیرۆرێ مکریەیمێ. جگە ئا مەردەیا بۆنەو تووڕەیی و ئێش و لەشکرکێشیی سەروو وەڵاتی و شارەکاماوە ڕووبەڕووما بۆوە، بە فیشەکێ بۆردومانوو فڕۆکەی و ئەشکەنجەی مکوشیانێ. زارۆڵێوە مزیۆرە بەرۆ و بە فیشەکوو دوژمنی مکوشیۆ و جەنازەکەش مگنۆنە باوشەو ئەدێشۆ، شوانێوو قاچ منیۆ ئەڵغامێوەرە و کوتەکوتە بۆ، خێزانیوە سەروو سفرەیوە، وەختوو نانینە بۆمبێوەشا وەرمگنۆ و کەس نمەزانۆ چکۆوە ئامان!
وەختێو ڕۆنامەوانێوی بەشەوقۆ ملۆ سەروو هەرمانەکێش، گردوو جەسەیش بۆ بە بووڵە و هامڕێکیش جەسەیش کۆ مکەراوە. هامشێوەو گوڵستانێ و تارێ، چندین ڕۆنامەوانێ و شۆڕشگێڵنێ پێسە تیرۆرێ کریێنێ، یانێ کوردسانەنە وەڵێ گرد چێوێنە بۆنەو کوردبییەیماوە مکوشییەیمێ. جە تیرۆروو گوڵستانێ و تارێنە واوەی ئی ڕاسییە بەرکەوتۆ و پەنەوازا گرد کەسێوە بزانۆش. بابەتەکە بابەتوو پارت و لاینەێوە نییەن، گردوو ئانیشا پاسە میاوانە وێشا مخەڵەتنانە، وێش هێزە خاینەکێ ئینەشا گەرەکەن، بەڵێ گرد وەختێ دوژمن وەختێو پەکەکەی پێسەو بەهانێوە نیشانە مدۆ، بەڵام ئامانجی سەرەکیی دوژمنی ئانەنە گەرەکش نییەن بەئازادانە بژیوۆ.
دوژمن تا پەکەکەی دلێنە بەرۆ، مشۆم کوردێ خاینێ پەی پلانەکاش بەکارێ بارۆ، وەلێ گەر پەکەکیچ دماییش بێ، دوژمن قەت مەجالەو ژیوای ئازادی نمەدۆ بە هیچ کوردێ و پارتێوە، بڕێو کەسێ هەڵای چی ڕاسییە نمەیاوانە، جە دڵۆ نیگەرانێما مکەرۆ.
تا گوڵستانەکاو ئی وەڵاتەیە تیرۆرێ نەکریا، تا وەڵاتما بێ گوڵستان نەبۆ، پەنەوازا گردوو گەلوو کوردی ڕۆنامەوانێ، شۆڕشگێڵنێ، ژەنێ و گرد ئازادیوازێوە، وەرگیریی دەوڵەتی فاشیستوو تورکی بکەرا، نەک بەتەنیا کوردێ پەنەوازا گرد کەسێوە ویژداندار و ئازادیواز گردوو ڕۆنامەواناو جیهانێ وەرگێری بکەرا، دەنگشا بەرز بکەراوە و پێوە دنیێشا بفاڕا پەی گوڵشەنێوە و گوڵستانێوە.
